Minnir á atvik á Hrauninu fyrir 20 árum.

Ef girðingin á Litla-Hrauni er ekki öflugri en hún var fyrir rúmum tuttugu árum þarf engan að undra þótt fangar, sem eru vel að manni, geti farið léttilega yfir hana.

Upp í hugann kemur atvik sem gerðist í einum af árlegum knattspyrnuleikjum fanga við lið þekktra manna hér á árum áður, sem var broslegt en jafnframt dálítið harmrænt.

Ég var í hópi þessara árlegu gesta og meðal liðsmanna voru til dæmis Hemmi Gunn, Þorgrímur Þráinsson og Halldór Einarsson "Eusebio-bani".

Þetta var öflugt lið sem fór létt með að vinna þessa vináttuleiki.

En í þetta skipti mættum við gerbreyttu fangaliði. Fyrirliðinn, með hanakamb, í töff skreyttum leðurjakka, hafði þekkingu á íþróttum og hafði tekið samfangana í harðar líkamsæfingar undir gríðarlegum aga, sem skiluðu því að þeir rasskeltu okkur og við fórum algerar hrakfarir í þessum leik.

Þegar leikurinn stóð sem hæst ætlaði Henson að þruma boltanum, en hitti hann ekki nógu vel þannig að hann sveif í háum sveig yfir fangelsisgirðinguna og hafnaði fyrir utan hana.

Stjórnandi fangaliðsins, þessi með hanakambinn og allt það, brá þá skjótt við, hljóp eins og eldibrandur að griðingunni, flaug upp hana og niður hinum megin, sótti boltann og kom jafnhratt yfir girðinguna til baka!

Einhverjir fangaverðir voru þarna á sjái, en þetta gerðist svo snöggt, að því lauk án þess að nokkur hreyfði legg né lið, gott ef fangaverðirnir sáu þetta einu sinni eða áttuðu sig á því, svo örstuttan tíma tók þetta.

Ég segi bara: Ef girðingin er enn eitthvað á þessu róli þarf engan að undra þótt hún sé ekki mannheld, gagnvart mönnum, sem eru vel á sig komnir líkamlega.

Og líklega kominn tími til að þessu linni.

Strokufangans er enn leitað

Athugasemdir

[Jósef Smári Ásmundsson, 18.12.2012 kl. 18:46]

Skemmtileg saga en ertu ekki eitthvað að misminna með Eusebio banann.Páll Ragnarsson tannlæknir á króknum og fyrrverandi leikmaður Tindastóls fékk viðurnefnið Eusebio baninn þegar hann tók hann úr umferð í leik Vals og Benfica í Evrópukeppninni .Páll var þá varnarmaður hjá Val.

[Ómar Ragnarsson, 19.12.2012 kl. 01:14]

Nú þarf ég að spyrja Hemma Gunn, eðal Valsara, því að Framari eins og ég getur kannski ekki munað allt rétt varðandi Val. Þessi Evrópuleikur fór fram á Laugardalsvellinum 1967 og leikmaður HM 1966, skoraði ekkert mark og félagið hans ekki heldur í 0:0 leik.

En kannski er skiljanlegt að allir varnarmenn Vals sé bendlaðir við þessa aftöku portúgalska snillingsins sem var uppgötvarður í mesta fátækrahverfi Maputoborgar í Mósambík.

[Jón Logi (IP-tala skráð) 20.12.2012 kl. 17:38]

Þetta er þolanleg girðing, en merkilega óvöktuð. Maðurinn er léttur og líklega vel á sig kominn, og er því ekki í vandræðum með þetta.
Ég get getið þess, að sem 14 ára gutti var ég í málningarvinnu o.þ.h. innan spennuvirkisgirðingar hjá RARIK, - ekki ósvipaðri þessari. Það átti það til að ekki væri búið að opna fyrir okkur í málningardeildinni, og príluðum við þá bara yfir, - ekkert mál.
En að því slepptu er það ferlegt að þarna er um bæði hættulegann einstakling að ræða, og svo þjálfaðan hermann. Hafi hann ekki klárað túrinn hjá Legion D'etrangers þýðir það að hann hefur sloppið frá þeim,  - í báðum tilfellum ástæða til að hafa á honum spes eftirlit.
Og að þjálfuninni gefinni er kauði til þess vís að geta ýmislegt. Lúrt í felum lengi, farið í óvænta átt o.þ.h.

Nema hann hafi bara flogið með morgunferð?