Á að ræna ferðamenn unaðsstundunum?

Það er hægt að ræna ferðamenn fleiru en hlutum úr farangri, eins og fjallað er um í tengdri frétt á mbl.is.

Reykjanesfólkvangur er hugsaður sem útivistarparadís við bæjardyr stærsta þéttbýlissvæðis landsins og alþjóðaflugvallarins, sem langflestir erlendir ferðamenn fara um, og þar stendur fyrir dyrum mun stórfelldara rán, rán á unaðsstundum.

Í kvöld var sýnd fyrir troðfullum sal í Norræna húsinu mögnuð og áhrifamikil hálftíma heimildamynd Ellerts Grétarssonar um Krýsuvík það rán unaðasstunda útivistarfólks þar, sem felast á í fyrirhuguðum virkjunum þar.

Myndirnar hér á síðunni eru fengnar að láni úr mynd Ellerts og sú efsta sýnir draumsýn virkjanafíklanna samkvæmt rammaáætlun, að af 16 hugsanlegum virkjunum á Reykjanesskaga, fari aðeins þrjú, þessi grænlituðu, í verndarflokk.

Í útreikningum fyrir þessar virkjanir er gert ráð fyrir nokkra áratuga endingartíma, en eftir það munu standa eftir umturnuð virkjanasvæðin án orku, og þurfa að stúta öðrum svæðum, Kerlingarfjöllum eða Fjallabakssvæðinu, til að viðhalda orkusölunni, ef það verður þá ekki búið að stúta þeim líka á þessum áratugum. 

Á næstu mynd fyrir neðan sést síðan belti risavaxinna háspennulína sem reyra á skagainn í eftir endilöngu.

Þar fyrir neðan er mynd af línuleiðinni frá Krýsuvík til Hafnarfjarðar.

Neðan hennar eru síðan nokkrar myndir af línustæðum vegna virkjana á Krýsuvíkursvæðinu og tákna rauðu línurnar línuleiðirnar.

Upphaf nútíma náttúrverndar má rekja til greinar Sigurðar Þórarinssonar 1949 um það að verið væri að gera Grænavatn að ruslakistu.

Það lausa rusl var þó hægt að fjarlægja, en sú ruslakista, sem  Reykjanesskaginn á að verða, felst í því að hann verði samanreyrður í net af virkjunum, stöðvarhúsum, skiljuhúsum, gufuleiðslum, borholum og borteigum, vegum og tröllauknum háspennulínum.

Sagt er að þessar nýju virkjanir muni draga að sér ferðamenn eins og þær fjórar virkjanir, sem komnar eru. 

En þegar fyrir liggur að langflestir ferðamenn, sem koma til landsins, koma til þess að upplifa ósnortna náttúru, sést hve fráleitt það er að þeir muni nota tímann til að skoða 16 virkjanir á Reykjanesskaga, hverja á eftir annarri.

Rauðu línurnar á sumum myndanna hér á síðunni tákna nokkrar af leiðunum sem háspennulínur og línuvegir eiga að liggja um. 

Á einni myndinn sést skyggt með rauðum lit það svæði þar sem byggingar, borteigar, borholur og gufuleiðslur Krýsuvíkur á að vera, inni í miðju hjarta þessa magnaða svæðis. 

Mynd Ellerts ber undirheitið: Náttúrufórnir í fólkvangi, fólkvangi sem upphaflega var settur á fót sem svæði, þar sem náttúran fengi sem best að njóta sín án þess að þar væri öllu umturnað með mannvirkjum og svæðinu breytt í iðnðarsvæði. 

Unaðsstundirnar, sem bjóðast núí kyrrð og friði í hinu dásamlega fjölbreytta landslagi Reykjanesfólkvangs verða ekki lengur á boðstólum. 

Það verður búið að ræna unaðsstundunum  frá tugum þúsunda ferðafólks sem njóta nú þessa svæðis í stuttum og löngum gönguferðum og breyta þeim í megavattsstundir handa erlendu stóriðjufyrirtæki sem flytur arðinn úr landi.

Hér fyrir neðan eru nokkrar fleiri myndir af línuleiðum og stöðum á þessu svæði, en sjón er sögu ríkari.

Vonandi kemst hin áhrifamikla mynd Ellerts fyrir almenningssjónir og einnig er rétt að benda á bók hans um 25 gönguleiðir á Reykjanesskaga, en hún var kynnt þannig í Morgunblaðinu, að birt var mynd af Bláa lóninu !

Rétt er að geta þess að myndir Ellerts voru teknar í kvöld með því að taka ljósmyndir af heimildarmynd hans í sýningu, þannig að gæðin á upprunalegu myndunum eru auðvita margfalt betri og myndin á svo sannarlega erindi einmitt núna. 

Neðst set ég inn myndir af svæðinu Trölladyngja-Sog sem ég hef tekið, en það svæði er undir í virkjanafyrirætlunum.  

Þar hafa verið boraðar tilraunaborholur og umhverfisspjöllum, sem voru gersamlega óþörf. 

Sogin og fleiri staðir á Reykjanesskaganum, eru þess eðlis, að fara þarf upp í Kerlingarfjöll eða austur á Landmannalaugasvæðið eða að Lakagígum til að finna hliðstæður. 

Og ofan á það að hafa stórskemmt svæðið, hefur ekki fundist orka, þannig að bæta á gráu ofan á svart í hinni óstöðvandi sókn á hendur hinum miklu náttúruverðmætum sem liggja við fætur okkar sem búum á þessu landshorni.

Og þetta á að gera á sama tíma sem rætt er um þörf þess að dreifa betur sífjölgandi ferðamönnum um landið !

Á efri loftmyndinni af Sogunum og Trölladyngju sést til Reykjavíkur efst á myndinni, enda er ekki nema um hálftíma akstur frá Reykjavík til þessa svæðis.

 

 

 

Stolið úr töskum ferðamanna

Athugasemdir

[Gunnar Th. Gunnarsson, 11.1.2013 kl. 01:29]

Ekki verður þetta "ósnortin náttúra" ef beina á ferðamönnum á þessa staði í stórum stíl. Það er ekki bæði sleppt og haldið.

[Ísak Harðarson (IP-tala skráð) 11.1.2013 kl. 01:48]

Gunnar, þá kýs ég fremur "talsvert ósnortna náttúru" fulla af ferðamönnum sem njóta hennar, heldur en að náttúran verði eyðilögð til frambúðar af virkjanaraski og þeirri sjónmengun sem rafmöstur yllu.

[Gunnar Th. Gunnarsson, 11.1.2013 kl. 02:53]

Þú ert í fullum rétti til að kjósa það

[Stefán Júlíusson, 11.1.2013 kl. 03:59]

Ég hef fengið nokkra vini í heimsókn eftir að ég flutti aftur til Íslands síðasta sumar.

Ég hef farið með þá alla um Suðurnesin. Þeim finnst frábært hvað hægt er að sjá mikið af ósnortinni náttúru.

Svo auðvitað í Bláa Lónið.

Það væri mikil synd fyrir uppbyggingu á ferðaþjónustu á Suðurnesjum ef allt svæðið verður undirlagt af virkjunum og rafmagnsstaurum.

Ferðamenn vilja sjá ósnorta náttúru þegar þeir koma til Íslands.

Virkjanir og rafmagnsstaurar eru til heima hjá þeim.

[Jón Ágúst Ágústsson (IP-tala skráð) 11.1.2013 kl. 06:30]

Mér dettur eftirfarandi í hug þegar ég les þetta blogg. Fréttin var hinsvegar um þjófnað úr ferðatöskum.

http://www.youtube.com/watch?v=99r8G-mRx-o

[Hanna Fríða (IP-tala skráð) 11.1.2013 kl. 10:43]

Hvað koma einhverjir svokallaðir ,,Fóstbræður" þessu við? Hverjir eru það?

[Grandvar (IP-tala skráð) 11.1.2013 kl. 12:07]

Eg verð alltaf jafn undrandi að sjá orkuver reist alveg ofan í Bláa lóninu.  Hvers vegna fékk þetta náttúruundur ekki að vera í friði fyrir óðum virkjanasinnum? Al láta sér detta annað eins í hug er ofar mínum skilningi.

[veidiklo (IP-tala skráð) 11.1.2013 kl. 12:39]

Nú er ég ekki Suðurnesjamaður ,en tel mig þó vita að , Bláa lónið er ekki nátturufyrirbæri.

það varð til eftir að virkjunin kom , og er af hennar völdum , sem sagt affallsvatn ,  en hvað veit  ég sem ekki er sérfræðingur í neinu.

kv veidiklo

[Sigurður Sunnanvindur (IP-tala skráð) 11.1.2013 kl. 13:12]

Grandvar er góður :)

Skítt með alla helvítis náttúruvernd! -Frumskylirði fyrir þessum virkjunum er arður til eigenda auðlindanna og arður til eigenda orkufyrirtækjanna!

Greiðir Landsvirkjun, OR eða einkafyrirtækið HS auðlindagjald til þjóðarinnar? -Munið að 83% raforkunnar er seld erlendum fyrirtækjum.

Njótum við arðs af starfsemi LV og OR? -Veit ekki betur en OR hafi verið komin í þrot og Höfuðborgarbúar hafi þurft að taka á sig stórfelldar verðhækkanir vegna raforkuframleiðslu fyrir óskylda aðila. -Arðgreiðslur LV? -ekki króna!

Það eru uppi áform um stórfelld spjöll og það er ekki einu sinni spurt "hvarf eru peningarnir í þessu brölti?"

[Ómar Ragnarsson, 11.1.2013 kl. 13:45]

Bláa lónið er ekki aðeins tilbúið fyrirbæri, heldur mun það ekki endast lengur en virkjunin, þ. e. í áætluð 50 ár eða jafnvel ekki lengur en í rúm 30 ár ef farið verður í Eldvarpavirkjun.

Ef Bandaríkjamenn vildu það, gætu verið blá, gul eða rauð lón út um allt Yellowstone. 

Þar er hins vegar ekkert slíkt til vegna þess að gildi þjóðgarðsins byggist á því að dómi Bandaríkjamanna, að náttúran þar sé ósnortin og allar boranir eru bannaðar þar og einnig á svæði utan þjóðgarðsins, sem er á stærð við Ísland.

Við Íslendingar hjálpum Bandaríkjamönnum til að hafa þetta svona hjá sér með því að virkja helst öll háhitasvæði okkar lands fyrir bandaríska stóriðju, og umturna þannig mun merkilegri náttúru en er að finna í Yellowstone.  

[Anna (IP-tala skráð) 11.1.2013 kl. 13:46]

eru fleiri sýningar á myndinni fyrirhugaðar svo vitað sé?

[Ómar Ragnarsson, 11.1.2013 kl. 18:01]

Ég veit að myndin hafði mikil áhrif á þá sem sáu hana og tekið var vel í hvatningarorð mín og fleiri þess efnis að hún kæmi fyrir augu sem flestra. Veit ekki betur en verið sé að vinna í því.

[Már Elíson, 11.1.2013 kl. 20:29]

Þessi Gunnar (sjá 1 og 3) - Hvaða mannkerti og Íslands-óvinur er þetta ? Hann virkar alltaf á mig eins að vilji alltaf vera á móti öllum, dregur úr öllu sem vænt er og þykist síðan vita allt (besservisser). - Minnir óneitanlega á stefnu sjálfstæðisflokksins sem alltaf hefur dregið úr öllu sem kemur mannkyni til góða og fórnar öllu sem fallegt er til hagsbóta fyrir rassg.....á sjálfum sér. - Hefur þessi einstaki Gunnar efni á þessu....að fórna einu fegursta landi í heiminum á altari vanþekkingarog forheimsku ?

Hver er þessi hyper-snillingur sem allt veit og hefur skoðanir á öllu og er sama um landið sitt ? - Ég er búinn að sjá ýmislegt miður gott um hann á korkinum sem ég vil ekki hafa eftir en það er best að hann geri grein fyrir niðurrifsstefnuskrá sinni sjálfur opinberlega.

Svona landráðamaður hefði einhverntíma verið tekinn fyrir og krafinn sagna.

[Lilja Dögg Bjarnadóttir (IP-tala skráð) 12.1.2013 kl. 00:05]

Ómar Ragnarsson þér er boði í kaffi á Nesveg 1, 233 Hafnir "Reykjanesbær".

[Gunnar Th. Gunnarsson, 12.1.2013 kl. 00:21]

Már Elíson hefur áður beint athugasemdum af þessu tagi til mín. Svo virðist sem rökræður eða skoðanaskipti séu ekki hans sterkasta hlið.

Það er ekkert að því að vera ósammála en að koma með;

 "mannkerti", "Íslands-óvinur", - "á móti öllum", - "dregur úr öllu sem vænt er",- "þykist  vita allt", - "  sem alltaf hefur dregið úr öllu sem kemur mannkyni til góða" - "fórnar öllu sem fallegt er til hagsbóta fyrir rassg.....á sjálfum sér" - "þessi einstaki Gunnar" - " fórna einu fegursta landi í heiminum á altari vanþekkingar og forheimsku" - "hyper-snillingur sem allt veit" - "er sama um landið sitt" -  "búinn að sjá ýmislegt miður gott um hann" -  "geri grein fyrir niðurrifsstefnuskrá sinni sjálfur" - "Svona landráðamaður"

Að koma öllu þessu fyrir í einni lítilli athugasemd hlýtur að vera met. Ég vona að þeim sem þykir vænt um Má rekist ekki á þessi skrif hans. Það hlýtur að vera sárt.