Vatnið er vanmetið.

Fréttir af svipuðum toga og fréttin um slæma umgengni fólks á vatnsverndarsvæðinu í Heiðmörk heyrast á hverju ári og hafa heyrst í áratugi, allt frá því er Sigurður Þórarinsson skrifaði tímamótagrein um umgengnina í Krýsuvík. 

Þrátt fyrir sérstök vatnsverndarlög fyrir hið einstæða Þingvallavatn og vatnasvið þess, er vatnið að færast úr A-flokki í B-flokk vegna affallsvatns frá Nesjavallavirkjun og mengunar frá sumarbústaðabyggð og stórvaxandi bílaumferðar, sem hefur orðið vegna þeirra mistaka að leggja ekki nýja og styttri aðalleið til Laugarvatns um Grafningsháls og nýja brú yfir Sogið norðan við Álftavatn.

Þórisvatn var næstum eins stórt, tært og blátt og Þingvallavatn áður en Kaldakvísl var tekin úr farvegi síðum og látin renna í vatnið svo að nú er það aurlitað.

Út á við og á tylldögum dásömum við íslenska hreina og tæra vatnið sem djásn og auðlind en umgöngumst það ekki í samræmi við það.  

Sú var tíð að skólp rann óhindrað í Reykjavík til sjávar og að smám saman urðu strendur borgarinnar útataðar í viðbjóði. Þegar þáverandi borgaryfirvöld vildu gera átak í þessum málum kom á óvart hvað sinnuleysi borgarbúa var mikið og hve óvinsælar "dýrar" aðgerðir urðu.

Fræg var umgengnin í Öskjuhlíð þar sem voru brunnin flök og heiti lækurinn frægi með vafasömum lifnaði eftir lok skemmtistaða. Sem skemmtikraftur vildi ég reyna að varpa ljósi á þetta með sérstökum uppistandsþætti og brag, þar sem ljúfustu íslensku lögunum var steypt saman í syrpu, sem ég gaf nafnið

 "SKÍTASYRPA".

                ( Lag: Litla flugan) 

Lækur tifar ljúft um smurða steina. 

Ljótur pollur grár við skriðufót. 

Brunnið flak er brotið milli hleina. 

I blárri leðju liggur mökuð snót. 

Þótt ég væri ógnar olíusuga

ég aldrei gæti þurrkað þennan pytt. 

En sumir er til annars ekki duga

þar eflaust gætu þarna gert þar áfram "hitt"...

                   ( Lag: Nú blika við sólarlag )

            ....Nú blikar við sólarlag saurgerlafjöld. 

               Og svona´ætti að vera hvert einasta kvöld

               með ilmandi fýlu og fúlasta blæ

               og fjöruna brúna og myglandi sæ....

                  ( Lag: Lapi, listamannakrá )

....Ef lambasteik þú færð að borða´á Loftleiðahóteli

og labbar þig svo næsta morgun þar á salerni. 

Í hlýju veðri í sjóinn ferð að hressa kroppinn þinn

þá hittirðu þar máltíðina þína í annað sinn

og syndir fram á fyrrverandi lúxuskvöldverðinn... 

                ( Lag: Fuglinn í fjörunni )

              ....Fuglinn í fjörunni hann er mjög blár, 

              drullubleik er húfan´ hans og olíulitað hár,...

              ( Lag: Hvítu mávar ) 

...skítamávar, segið þið honum 

að þið salmonellum dreifið út um allt...

                    ( Lag: Amorella) 

                 ...ljúfasta salmonella,

                 ástvina mín, la bella, 

                 í görnum þú glöð vilt sprella 

                 og gefa mér bleikan lit, 

                 salmonella ! 

                 Gubbugella ! 

 

 

 

Skammarleg umgengni í Heiðmörk

Athugasemdir

[Hilmar Hafsteinsson (IP-tala skráð) 12.1.2013 kl. 20:00]

... alltaf gaman að skítaskrifunum þínum Ómar minn!

[Anna Sigríður Guðmundsdóttir, 12.1.2013 kl. 21:36]

Hreint vatn er gull framtíðarinnar.

Olía og iðnaðarmengun varð til í of miklu mæli, vegna vanhugsaðrar græðgi ráðamanna heimsins á síðustu öld.

Sumum gengur illa að skilja að hreinleiki vatns og andrúmsloftsins verður aldrei metið til fjár. Það er í raun lífæð jarðarinnar að hafa hreint andrúmsloft og hreint vatn.

Er einhver sem hefur raunverulegan áhuga á að selja þessa ómetanlegu  grunnstoðs-lífæð, fyrir innistæðulausa og falsaða pappírspeninga svikulla, kúgaðra og mútaðra (keyptra) embættismanna/bankaræningja?

M.b.kv.

[Haukur Kristinsson (IP-tala skráð) 13.1.2013 kl. 10:45]

Alltaf þegar ég les um vatn, þessa einföldu sameind, há-tveir-ó (H2O) og þýðingu þess fyrir okkur öll, kemur mér í hug myndin, sem sjá má með því að smella á slóðina fyrir neðan.

Otto Spork, hollenskur svindlari, gerir leynisamning við Snæfellsbæ um vatnsréttindi til 95 ára. Á myndinni má sjá Otto,  hans “squaw”, forseta ræfilinn, Ásbjörn Óttarsson og fleiri stórmenni.

Þessi mynd er líklega ekki innrömmuð á Bessastöðum, engu að síður ein sú táknrænasta í starfsferli forsetans.

http://www.dv.is/frettir/2009/3/26/otto-spork-gerdi-leynisamning-um-vatnsrettindi/

“Veistu hvað ég þrái” þó að

það sé bara til að hlæja að-

og ég gæfi af æfi minni

ár til þess að sjá og fá,

-hvað mig er að dreyma á daginn,

-hvað mér veldur vöku um nætur?

Vatn í læk og á.

[Aðalsteinn Sigurgeirsson, 16.1.2013 kl. 14:20]

Í tólf-mynda röðinni sem fylgir fréttinni um „skammarlega umgengni í Heiðmörk“  reynir Orkuveita Reykjavíkur að innprenta þá skoðun hjá lesendum Mbl og ráðamönnum borgarinnar, að almenningi sé ekki treystandi fyrir frjálsri för um Heiðmörk – að vond umgengni almennings sé komin svo langt út fyrir allan þjófabálk að vatnvernd stafi ógn af nærveru og athöfnum hans og að eina lausnin felist í því að loka Heiðmörk fyrir sama, vonda og skeytingalausa almenningi. Sýndar eru myndir af garðaúrgangi, sorppokum, rúmdýnum og sófasettum sem þessi almenningur hafi kosið að kasta í vegkanta Heiðmerkur í stað þess að fara með í Sorpu. Sýndar eru myndir af yfirgefnum bílhræjum og hundum í lausagöngu. Sýnd er mynd sem á að vera endanlegt sönnunargagn í „málinu OR vs. almenningur“: Mynd 4  með myndtextanum „Það hafa orðið mengunarslys í Heiðmörk. Þessi mynd er tekin eftir að olía rann út í umhverfið.“ Myndin sýnir vöruflutningabíl sem mun hafa oltið og olía + rafgeymasýra lekið í jarðveg. Myndin er tekin síðla vetrar 2007 og sýnir hún flutningabíl sem fór um Heiðmörk undir virku eftirliti OR og með fullu leyfi hennar, vegna framkvæmda Gunnars Birgissonar í Vatnsendakrika. Sýnd er mynd sem á að sanna að utanvegaakstur sé mikið vandamál (hjólfór í mosa við veg; mynd 6). Önnur er endanleg staðfesting á því að almenningur er ekki bara sóði, heldur einnig brunavargur (8: „Með aukinni skógrækt í Heiðmörk og útbreiðslu lúpínu eykst hætta á gróðureldum. Kviknað hefur í gróðri í Heiðmörk.“) Sú mynd á að leiða fram sanninn um að vatnsvernd stafi ógn af viðveru pýrómanísks almennings innan um gróður. Myndin sýnir reyndar brennandi mosaþembu (sem mikið er til af á landinu) svo víða þarf greinilega að taka til hendinni og setja skorður við umferð almennings um mosavaxin svæði -  svo fyrirbyggja megi að kvikni í mosa.

 

Myndum þessum hefur OR verið að safna á mörgum árum, augsýnilega í þeim tilgangi að safna sönnunargögnum gegn almenningi. Nú er það reyndar svo, að víða um land og á höfuðborgarsvæðinu má finna dæmi um slæma umgengni. Til þessa hefur samt engum dottið það þjóðráð í hug að loka fyrir allar vegasamgöngur í því augnamiði að bæta umgengni þess litla brots af þjóðinni sem sýnir umhverfi sínu sóðaskap, brunavargshátt og skeytingaleysi. Dæmi: Umgengnin í miðborginni er afar slæm allar helgar. Rusl og brotið gler þekur götur og gangstéttir. Menn verða líka fyrir líkamsárásum og eignaspjöllum. Ef OR hefði eignast allar lóðir í  miðborginni með gjafagjörningi borgarstjóra árið 2004, myndi  hún líklega beita sér fyrir því að öllum akstursleiðum og lausaganga fólks yrði hér eftir bönnuð í miðborginni.

 

Ég held að aðrar leiðir til úrbóta séu bæði skynsamari og skilvirkari. Ein leiðin væri sú að Sorpa hætti að taka há gjöld fyrir skil á gömlum sófasettum, garðaúrgangi o.fl., líkt og hún hefur stundað undanfarin ár og sem hefur mjög aukið á sorpeyðingarvandamálum í Heiðmörk og víðar. Önnur leið væri sú að OR beitti sér fyrir bættu eftirliti og löggæslu í Heiðmörk. Svo væri vert að huga að áróðri fyrir bætti umgengni borgara við umhverfi sitt- t.d. átak á borð við "Hrein borg - fögur torg" líkt og snemma á 8. áratugnum.