Fínar ábendingar Ágústu. Einni bætt við.

Ágústa Johnson vinnur þarft verk með því að miðla okkur af þekkingu sinni á sérsviði sínu. Í flestum af þeim atriðum sem hún bendir á, gera ég og aðrir mistök í glímunni við aukakílóin.

Þó ætla ég að gera eina athugasemd, eina ábendingu, varðandi það sem hún segir um það að "einhæfar æfingar" geti verið varasamar af því að líkaminn læri brátt á það að gera þær þannig að hann sleppi billega við þær. 

Ég tek sem dæmi um undantekningu frá þessu æfingu sem ég hef stundað í mismunandi formi síðan ég byrjaði að fá áhuga á hlaupum fyrir meira en 60 árum, en það er einfaldlega að hlaupa í minnst 20 sekúndur í kapp við klukkuna og reyna í hvert sinn að setja nýtt "met." 

Þetta samsvarar keppni í 200, 300 og 400 metra hlaupum.  

Eftir að læknar bönnuðu mér að hlaupa vegna þriggja uppskurða á lélegum hnjám en gleyndu að banna mér að "læðast hratt," hafa stigahlaup verið aðferð mín við svona æfingar.

Stigahlaup, upp á við að sjálfsögðu, hlífa hnjánum við höggunum sem þau verða fyrir þegar lent er eftir hvert skref í láréttu hlaupi og upp brattan stiga er þetta einfaldlega hratt klifur.

Enda hafa hnén staðist þessi stigahlaup, en stóðust ekki venjuleg hlaup eftir árið 2006. 

 Fram yfir sextugt fólust stigahlaupæfingarnar í jafngildi þess að hlaupa frá 1. hæð upp á 14. hæð í blokkinni að Sólheimum 27 undir 60 sekúndum og komast sem næst 50 sekúndum. 

Síðustu árin felast þær í að hlaupa frá kjalla Útvarpshússins upp á 5. hæð á minna en 30 sekúndum og gera þetta með hæfilegu millibili þrisvar til fjórum sinnum á hverri 45 mínútna æfingu innan um aðrar æfingar þar sem líkaminn gæti kannski "svindlað" svolítið á.

Með skeiðklukku í hönd er ekki hægt að svindla á svona æfingum, svo framarlega sem maður leggur sig jafn mikið fram og í alvöru frjálsíþróttakeppni og reynir að setja nýtt met í hvert sinn.

Sem auðvitað verður æ erfiðara eftir því sem áttræðisaldurinn sækir að.  

Ég held því að galdurinn liggi í því að finna æfingar af þessu tagi sem taka 20-30 sekúndur í rykk eftir atvikum og eru endurteknar hæfilega oft á hverri æfingu. Hvað segir Ágústa um það?  

 

Það er út af þessu sem aukakílóin haggast ekki

Athugasemdir

[Þorsteinn Briem, 9.3.2013 kl. 15:29]

Guðlaug hefur Þór hún þæft,
þokkamikil skvísa,
þykir aldrei það einhæft,
þegar fer að rísa.

[Tryggvi Helgason, 10.3.2013 kl. 00:32]

Heyrði eitt sinn um mann sem stundaði mikið íþróttir og sem hljóp marga kílómetra, jafnvel daglega, auðvitað á grjóti og malbiki. Einn daginn vaknaði hann við það að hann gat ekki gengið, sársaukinn var slíkur. Það þurfti að skipta um (eða laga) báða hnjáliði. Eftir það mælti hann ekki með svona hlaupum og sagðist ekki sjá eftir nokkru meira en að hafa verið svo heimskur að leyfa sér öll þessi hlaup í mörg ár.

Þóttist góður að geta gengið hjálparlaust.

[Tryggvi Helgason, 10.3.2013 kl. 00:43]

Og svo með aukakílóin, - mitt ráð !!! Enga gosdrykki, hvorki sæta eða sykurlausa. Ekkert hveiti, eða mat sem inniheldur mikið að hveiti. Engann sykur eða mat sem inniheldur sykur að ráði. Annað þarf ekki og aukakílóin láta sig hverfa, - tvö á mánuði.

[Ómar Ragnarsson, 10.3.2013 kl. 09:26]

Ég stundaði innanhússknattspyrnu á steingólfi tvisvar í viku í nokkur ár. Hræðileg mistök ungs manns. En það er misjafnt eftir fólki hve vel hnén þola álag. En vegna þess að enginn veit það nákvæmlega fyrirfram hvernig hans hné þola álag fyrr en það kemur kannski óþyrmilega í ljós væri gott að hafa varann á fyrirfram. Þú tryggir ekki eftirá.

[Stefán Niclas Stefánsson (IP-tala skráð) 10.3.2013 kl. 09:47]

Þetta er góð grein hjá Ágústu. Langar að bæta við, að mikilvægt er að láta fylgjast með starfsemi skjaldkirtilsins, því vanstarfsemi hans hægir á brennslunni. Annað, sem minna er talað um og mjög vanmetið vandamál er, að karlmenn komast líka á breytingarskeið. Eftir fertugsaldur er þegar farið að hægja á framleiðslu testósteróns, sem hefur í för með sér aukna fitusöfnun á kvið með aukinni hættu á sykursýki 2, hjartasjúkdómum, beinþynningu og þunglyndi. Því er gott fyrir karlmenn, að fá testósteróngildin mæld hjá lækni, þegar aldurinn fer að færast yfir.