Er "forsendubrestur" bara sums staðar ?

"Forsendubrestur" er orðið sem notað er um það að vegna skyndilegrar lækkunar krónunnar tvöfölduðust skuldir heimilanna.

Það hefði ekki þurft að vera eins hroðalega slæmt og það var nema vegna þess að flokkarnir tveir sem nú eru að semja um stjórn landsins næstu fjögur ár höfðu hrundið af stað ferli, sem fjórfaldaði skuldir heimilanna á örfáum árum, á meðan sett var á tilbúið "gróðæri" af áður óþekktri stærð, sem sprakk síðan auðvitað í höndunum á þeim sem kveikt höfðu eldana.

En það eru til fleiri útgáfur af "forsendubresti". Forsenda þess að fólk greiðir af launum sínum í lífeyrissjóð er sú hugsun að á síðustu árum ævinnar geti það treyst á að geta veitt sér mat og húsaskjól. 

Í tugþúsundum tilfella hrekkur lífeyririnn illa eða alls ekki til hjá þeim sem lægstan hafa hann. 

Þess harkalegra er það þegar látið er sem forsendan fyrir myndun lífeyrissjóðanna sé ekki eða hafi aldrei verið til, heldur sé í góðu lagi að taka þessa peninga til þess að borga annars konar "forsendubrest", sem í mörgum tilfellum var bundin forsendum, sem gátu augljóslega ekki gengið upp og margir af helstu kunnáttumönnum í þessum málum vöruðu sterklega við strax í upphafi að gæti ekki endað með öðru en með ósköpum. 

Engir slíkir vöruðu þá launþega við, sem lögðu fé í sína lífeyrissjóði, við því, að forsendurnar fyrir því að leggja af launum sínum í þá væru rangar, heldur gerðu allir þetta í góðri trú á siðvætt þjóðfélag réttlætis og sanngirni.

Þeir, sem nú vilja seilast í þetta fé umfram það sem þegar hefur verið gert með slæmum afleiðingum fyrir lífeyrisþega velja sér "forsendubrest" að geðþótta á vægast sagt ósiðlegan hátt.  

„Slíkt væri stríðsyfirlýsing“

Athugasemdir

[Gulli (IP-tala skráð) 5.5.2013 kl. 10:21]

Mér finnst frekar hlálegt að lesa svona:

"Samiðn lítur á slíkar yfirlýsingar sem stríðsyfirlýsingu á hendur launamönnum og frjálsum samningsrétti launafólks"

Síðan hvenær hefur launafólk frjálsan samningsrétt um lífeyrismál?

[Sigurður (IP-tala skráð) 5.5.2013 kl. 11:02]

"Engir slíkir vöruðu þá launþega við, sem lögðu fé í sína lífeyrissjóði, við því, að forsendurnar fyrir því að leggja af launum sínum í þá væru rangar, heldur gerðu allir þetta í góðri trú á siðvætt þjóðfélag réttlætis og sanngirni"

Fólk hefur ekkert val um þetta Ómar.

Fólk er ekkert að meta neinar forsendur eða nokkurn skapaðan hlut þegar það horfir á eftir laununum sínum í þessar svikamyllur.

Fólk er skikkað með lögum til að greiða í þetta, og hefur ekkert val um neitt annað.

Hefði ég val, myndi ég ekki greiða krónu í þessa sjóði, þar sem ég hef ekki minnstu trú á að ég fái nokkuð af þessu til baka, heldur sé megnið af "eignum" lífeyrissjóða í dag ekkert nema froðan ein.

Þetta kerfi snýst ekki um neitt annað en að fóðra smákónga í bisnessleik, og fæstir hafa hundsvit á því sem þeir eru að gera, og er enda nákvæmlega sama.

Þeir fá alltaf sín laun, fríðindi og krúser til að komast heim eftir vinnu.

[Jósef Smári Ásmundsson, 5.5.2013 kl. 11:11]

Þetta eru náttúrulega Hamarsliðar (trésmiðir) sem eru með þessar stríðsyfirlýsingar.Ég get verið sammála því að það á ekki að nota sparnað fólks til þessara hluta en það á heldur ekki að nota hann til að halda uppi heilli stétt sem starfar í lífeyrirsjóðskerfinu og höndlar með þessa peninga.Best að afnema þetta kerfi og gera þetta á annan hátt.