Krýsuvík í gjörgæslu, - virkjað samt ?

Páll Einarsson jarðfræðingur hefur upplýst að varðandi hættu á eldsumbrotum hafi Krýsuvík verið "í gjörgæslu" vísindamanna undanfarin tvö ár.

Myndirnar hér á síðunni voru teknar í fjölmennri gönguferð áhugafólks um verndun svæðisins í gærmorgun.

Þar var frábært leiðsögufólk, Ellert Grétarsson, Sigmundur Einarsson og Ásta Þorleifsdóttir fór með fólki um svæðið og nágrennið.

Læt kannski fljóta með myndir teknar fyrir ofan Seltún og við Kleifarvatn þennan fagra dag.

Samt hefur verið gefið grænt ljós í rammaáætlun á virkjanir á Krýsuvíkursvæðinu og við Trölladyngju til þess að seðja um sjöttung af orkuþörf risaálvers í Helguvík.

Vaxandi straumur erlendra ferðamenna er ár hvert á svæðið og þeir útlendingar, sem ég segi frá því að þarna standi til að reisa mannvirki út um allt í stíl við Svartsengi eða Hellisheiði, eiga mjög erfitt með að trúa þessu.

Þeir, sem vilja umturna þarna öllu til þess að klára alla orku svæðisins á nokkrum áratugum í græðgisfullri rányrkju, segja, að ferðamenn geti alveg eins ekið Gullna hringinn.

En þetta er ekki svona einfalt. Mjög margir ferðamenn koma til Reykjavíkur og dvelja þar aðeins í nokkra daga, til dæmis á ráðstefnum og fundum. Þeir hafa þúsundum saman ekki tíma til að fara Gullnahringinn en miklu frekar tíma til að skjótast þrefalt styttri leið til Krýsuvíkur.

Eða jafnvel fjórfalt styttri leið ef hún er tekin á leiðinni frá Reykjavík til Keflavíkurflugvallar.

Leiðin um Krýsuvík og Grindavík hefur þann kost að útlendingum finnst mikið til um að koma til dæmigerðrar íslenskrar sjávarbyggðar, ég tala nú ekki um ef hann blæs svolítið úr suðri, svo að brimgarðurinn við innsiglinguna nýtur sín.

Svartsengi og Krýsuvík bæta hvort annað upp. Annars vegar er í Krýsuvík nær ósnotrið hverasvæði eins og það kemur frá hendi skaparans og hins vegar er hið manngerða Bláa lón.

Munurinn er hins vegar sá, að ef Krýsuvíkursvæðið verður látið í friði, mun það geta orðið svipað um aldir, en Svartsengisorkuverið og Bláa lónið munu hins vegar ekki endast nema í nokkra áratugi í viðbót, en þá verður búið að tæma orkuhólfið og svæðið orðið kalt og dautt. 

Í ofanálag er búið að gefa grænt ljós á virkjun í gígaröðinni Eldvörpum sem mun hraða tæmingu svæðisins um minnst 10 ár !  Og samt geipað við útlendinga um "hreina og endurnýjanlega orku".

Gígaraðir finnast hvergi í heiminum nema á Íslandi en samt eru Eldvörp eitt af þessum földu náttúruverðmætum landins, sem helst má ekki vitnast um, af því að það verður að efla þar rányrkjuna á gufuorkunni sem allra mest.

Neðsta myndin er loftmynd af hinu litfagra gili, Sogunum, við Trölladyngju, þar sem þegar er búið að valda miklum spjöllum með borplönum án árangurs, en eitt þeirra sést við mynni gilsins.

Hvet til að tvísmella á myndina til að sjá gilið betur. Það þarf að fara austur í Landmannalaugar til að sjá annað eins.  

Þrátt fyrir að tvísýnt sé um nokkurn árangur vilja virkjanamenn endilega halda þarna áfram á sömu braut.   

Enn skelfur jörð á Reykjanesi

Athugasemdir

[Þorsteinn Briem, 11.5.2013 kl. 02:04]

Óhreyft landið einskis virði,
ekkert ég um fegurð hirði,
dásamlegt það allt nú yrði,
ef álver risi í hverjum firði.

[Jón Logi (IP-tala skráð) 11.5.2013 kl. 12:12]

Ég verð nú bara að segja, að áformin finnst mér svakaleg. En SV-hornið virðist ætla að halda þessu til streitu. Þá væri kannski hægt að vona það, að eitthvað annað mætti fá frið, - en það dugar ekki. Það verður samt að spæna upp virkjunum víðar til að þjónka þessu álveri, sem svo skaffar nokkrum hundruðum atvinnu. Heilslátrun jarðvarma á skaganum dugar ekki til að skaffa næga orku. Og túrisminn þarna á skaganum.....hvernig gæti hann orðið, og hvernig verður hann eftir þetta?
Ég var fyrir nokkru með ferðamenn við Goðafoss, í botnlausri blíðu. Þar var hellingur af fólki. Nema hvað, að athugull maður (verkfræðingur) í mínum hópi spurði mig hvers vegna Íslendingar létu allt þetta vatnsafl fara til spillis, - það væri hægt að skapa arð með að virkja það.
Ég svaraði því til með bendingu á mannmergðina, og sagðu að þarna væri virkjunin, - fossinn væri að skila ágætlega.
Kallinn hugsaði smá, og var svo sammála. Hafði bara ekki hugkvæmst þetta, - sem var þó beint við nefið á honum.

[Sigurgeir Jónsson, 11.5.2013 kl. 16:37]

Var að koma úr Krýsuvík.Sá engan ferðamann.En það er allt fullt af ferðamönnum við sunnanverðan Vatnjökul.Virkjum strax á Krýsuvíkursvæðinu, þá koma kanski einhverjir erlendir ferðamenn þangað sem eyða peningum eins og gerðist í Svartsengi.Látum Grindvíkingana um þetta.Þeir kunna með peninga að fara og líka að ná í þá.

[Sigurgeir Jónsson, 11.5.2013 kl. 16:43]

Kom við á Reykjanesvita og að virkjuninni.Þar var allt fullt af ferðamönnum.Þar hefur verið virkjað.

[Þorsteinn Briem, 11.5.2013 kl. 17:00]

13.3.2009:

"Tap HS Orku (Hitaveitu Suðurnesja) á síðasta ári nam tæplega 11,7 milljörðum króna."

"Skuldir nema hins vegar 30,5 milljörðum króna."

HS Orka tapaði 11,7 milljörðum króna

[Sigurgeir Jónsson, 11.5.2013 kl. 17:04]

Og á hótelinu á Nesjavöllum var fullt af ferðamönnum, þegar ég kom við þar í vikunn .Þar hefur verið virkjað.Og á Sigöldu- Búrfells-Landmannalaugasvæðinu er allt fullt af ferðamönnum þegar þeir komast þangað.Og ekki má gleyma Laxár-MývatnssvæðinuÞar er Laxávirkjun.Það er segin saga þar sem hefur verið virkjað þar er allt fullt af ferðamönnum.Og Smyrlabjargarárvirkjun í Suðursveit.Þar var virkjað, enginn ferðamaður sást þar áður en hún var virkjuð.Nú fara þar um fleiri hundruð ferðamenn suma daga á sumrin.

[Sigurgeir Jónsson, 11.5.2013 kl. 17:10]

Og Kárahnjúkar,Sjálfsagt fer að styttast í að farið verður að sigla þar um með ferðamenn inn að jöklinum.Kanski verður Ómar Ragnarsson skipstjórinn og steini.br.háseti stýrimaður,kokkur og vélstjóri.Nú þurfa þeir að drífa í þessu.Það verður alltaf fullt hjá þeim.Legg inn farpöntun.Sama hvað hún kostar.

[Þorsteinn Briem, 11.5.2013 kl. 17:10]

Kort af Suðvesturlínum - Landsnet - Áætlaður kostnaður á fjögurra ára framkvæmdatíma 22 milljarðar króna í ágúst 2008 en 30 milljarðar króna á núvirði

[Þorsteinn Briem, 11.5.2013 kl. 17:17]

22.3.2013:

Orkuveita Reykjavíkur tapaði 2,3 milljörðum króna árið 2012

[Þorsteinn Briem, 11.5.2013 kl. 17:19]

10.4.2013:

HS Orka hf. - Sautján atriði sem hafa tafið framkvæmdir við álver í Helguvík

[Ómar Ragnarsson, 12.5.2013 kl. 13:46]

Hálslón var af Landsvirkjun talið henta afar vel sem miðstöð fyrir ferðir á svæðinu, eftir ísnum þegar það er lagt og eftir vatninu á sumrin.

Það gleymdist að árleg vatnssveifla í lóninu er 50-60 metrar, sem samsvarar því að Hvalfjörður væri tæmdur og fylltur árlega. Strax og vatnsborðið ísilagt fer að síga brotnar ísinn við bakkana og verður ófær yfirferðar.

Áður er lónið kom var oft farið á jeppum þvert yfir Hjalladal innanverðan á jöklajeppum.

Það er gersamlega ómögulegt núna.

Þegar ís leysir af lóninu í júníbyrjun þarf að fara ofan af nokkurra metra háum bökkum, sem myndast þegar lónið er fullt, og komast niður halla sem er 300 - 1000 metra langur og með 50 metra hæðarmun, þangað til hægt er að komast niður að vatninu.

Ef veður er eins og best verður á kosið, sunnanhnjúkaþeyr með 15 stiga hita og heiðríkju sést ekki út úr augunum vegna leirstorma.

Af hverju er ég að segja þetta? Af því að ég hef verið á ferli við þetta lón á öllum árstímum í þau sex ár, sem liðin eru síðan það var myndað, nær alltaf aleinn.

En auðvitað vita allir aðrir miklu meira en þetta en ég, og ef ég sýni myndir af þessu, er sagt að ég hafi falsað þær.

Það eru til um það opinberar tölur að um þúsund manns komi í Krýsuvík daglega yfir ferðamannatímann.

Samkvæmt áliti Sigurgeirs væri enginn við Gullfoss og Geysi nema þar hefði verið virkjað.

Sigurgeir heldur líka að ferðamenn komi til Íslands til þess að heimsækja allar virkjanirnar, Reykjanesvirkjun, Sandfellsvirkjun, Eldvarpavirkjun, Svartsengisvirkjun, Trölladyngjuvirkjun, Nestúnsvirkjun, Austurengjahversvirkjun, Gránhnjúksvirkjun, Hverahlíðarvirkjun, Hellisheiðarvirkjun, Nesjavallavirkjun, Ljósafossvirkjun, Írafossvirkjun, Steingrímsstöð, Urriðafossvirkjun, Hvammsvirkjun, Holtavirkjun, Hagavatnsvirkjun, Búrfellsvirkjun, Sultartangavirkjun, Búðarhálsvirkjun, Hrauneyjafossvirkjun, Sigölduvirkjun, Vatnsfellsvirkjun, Skrokkölduvirkjun, Hágönguvirkjun, Norðlingaölduvirkjun, Hólmsárvirkjun, Búlandsvirkjun og um 70 aðrar virkjanir, sem þrýst er á að reisa.

Í meirihlutann af þessum virkjunum kemur nær enginn ferðamaður.

Ég veit heldur ekki um neinn sem fer veginn upp að Skálafellsjökli til þess að skoða Smyrlabjargavirkjun, heldur er fólið á leið til að skoða jökulinn og dásemdir hans og vel hefði verið hægt að leggja þennan veg án þess að virkja og virkjunin því engin forsenda fyrir aðgengi.

Veit heldur ekki um neinn sem ekur framhjá Sigölduvirkjun til þess að skoða hana heldur er fólkið á leið inn að Landmannalaugum.

Bandaríkjamenn gætu verið með tugi gufuaflsvirkjana í Yellowstone með bláum lónum, gulum lónum, rauðum lónum og njörvað þjóðgarðinn inn í net virkjanamannvirkja líkt og gert hefur verið á Hellisheiði auk virkjana fossanna stóru í þjóðgarðinum.

Þrátt fyrir virkjanaleysið í Yellowstone kvartar enginn þar vestra yfir skorti á virkjunum né sér eftir því að aðgengi var skapað að þessum náttúruundrum með því að eyðileggja þau fyrst.  

[Jón Logi (IP-tala skráð) 12.5.2013 kl. 14:52]

Það verður þá, Sigurgeir, að virkja Gullfoss og Geysi eins og skot ekki satt? Og svo láta Goðafoss og Dettifoss í pottinn með. Skógafoss og Seljalandsfoss líka.