Þarf að lagfæra hálendisvegina skipulega.

Ég hef í nokkrum bloggpistlum nú og í fyrra bent á að taka þurfi hálendisvegina skipulega til lagfæringar og endurskoðunar til þess að hægt sé að opna þá fyrr á sumrin.

Á einstaka stöðum nægir að vísu að ryðja burtu sköflum fyrr en nú er gert, eins og stungið er upp á í tengdri frétt á mbl.is, en þá þarf að vera tryggt að yfirborð veganna á þeim stöðum þoli ruðningstækin.

Einnig er til lítils að ryðja þar sem þannig háttar til að vegurinn verður síblautur af völdum vatns, sem lekur um hann þangað til viðkomandi skafl er allur bráðnaður.

Á sumum stöðum er brýnt að leggja nýja leið fram hjá dældum, sem fyllast af krapa og auri, og sést gott dæmi um það á myndunum, sem fylgja eiga þessum pistli, þar sem einhverjir fóru um veginn norðan við Herðubreiðarlindir þegar hlánaði í rúma viku snemma í apríl í fyrra.

Annars staðar er athugandi að aka ofaníburði ofan í suma kaflana þannig að þeir hrindi vatni af sér og undirlagið verði þéttara.

Í þetta þyrfti að verja sérstakri fjárveitingu, og miðað við stóraukna umferð ferðamanna og þar af leiðandi stórauknum tekjum upp á tugi milljarða ætti þetta ekki aðeins að vera mögulegt, heldur ber það vitni um nísku og græðgi að hirða bara hinn vaxandi gróða en gera ekkert á móti.

Helst þyrfti að fara í þessar vegabætur áður en sumarið er úti. því að annars dregst það enn eitt árið.

Að sjálfsögðu þyrftu þessar bætur að vera í algeru lágmarki til þess að skemma ekki fyrir "safari" upplifuninni sem það veitir að aka um frumstæða slóða.

Loks má geta þess, sem var bloggað um á þessari síðu fyrir nokkrum dögum varðandi það að setja sérstakar reglur um ferðir inn á vegina á jöklajeppum með ákveðnum skilyrðum og eftirliti áður en venjulegum bílum er hleypt á þá.    

Ryðja ætti hálendisvegi fyrr

Athugasemdir

[Torfi Hjartarson (IP-tala skráð) 24.6.2013 kl. 13:12]

Það þarf nú einfaldlega að byggja upp helstu vegi á hálendinu s.s. Kjalveg og Sprengisandsleið og setja á þá bundið slitlag og brúa manndrápsárnar. Ef menn þurfa að komast í safari í eða rally á hálendinu þá er ábyggilega til nóg af illfærum slóðum til þess. Þar sem oft er vitnað til Yellowstone í umræðunni þá er rétt að benda á að þar eru 500 km af góðum malbikuðum vegum til að tryggja að fólk komist til helstu áfangastaða og geti þaðan hafið náttúruskoðun sína og útivist. Það er löngu kominn tími til þess að fleirum en fámennum hópi jeppaeigenda verði kleyft að aka upp á hálendið til að njóta náttúru þjóðarinnar sem er sameign þjóðarinnar.

[Þorsteinn Briem, 24.6.2013 kl. 15:01]

Vegakerfið hér á Íslandi árið 2012 - Vegagerðin

[Ómar Ragnarsson, 24.6.2013 kl. 20:53]

500 kílómetrarnir í Yellowstone eru ekki nema innan við 2,5% af lengd hálendisleiðanna á Íslandi. Það er hægt að komast Fjallabaksleið og Kjalveg með lagni á flestum bílum, án þess að vera í "fámennum hópi jeppaeigenda."

[Torfi Hjartarson (IP-tala skráð) 24.6.2013 kl. 21:42]

En þessir 500 km eru aðalsamgönguleiðirnar í Yellowstone eins og Kjalavegur og Sprengisandsleið.  Það að komast Kjöl með lagni segir ekkert til um ástand bifreiðarinnar í ferðalok og fæstir vilja enda draumafríið á verkstæði í Skagafirði.

[Þorkell (IP-tala skráð) 25.6.2013 kl. 01:04]

Það væri nú ágætis byrjun að ferðaþjónustan færi að borga skatta og skyldur svo að Vegagerðin fengi nú eitthvert fé til framkvæmda, en hætti að væla endalaust um það hvað allir séu vondir við aumingja littlu ferðaþjónustuna og að allir verði að vera góðir og gera nákvæmlega það sem að þeir segja. Aðrir eiga að vinna á jólunum fyrir þá, hætta að veiða hvali, seli osfrv... leggja nýja vegi og opna aðra mikið fyrr, hætta að agnúast út í þá þegar þeir eru að selja ferðir inn á lönd annara og bara ganga úr rúminu fyrir þeim svo að þeir geti grætt enn meira á öllum túristunum án þess að þurfa nokkurntíman að skaffa nokkuð til samfélagsins. Þetta er verra en útrásarvíkingarnir í frekjunni!!

[Þorsteinn Briem, 25.6.2013 kl. 01:25]

Útgjöld hvers erlends ferðamanns til íslenskra fyrirtækja voru að meðaltali um 354 þúsund íslenskar krónur árið 2012, um 44 þúsund krónur á dag að meðaltali.

Árið 2012 komu um 673 þúsund erlendir ferðamenn hingað til Íslands og það ár voru útgjöld erlendra ferðamanna til íslenskra fyrirtækja samtals 238 milljarðar króna.

Erlendir ferðamenn voru að meðaltali 6,6 gistinætur hér á Íslandi að vetri til en 10,2 nætur að sumri til árið 2012, um átta gistinætur að meðaltali sumar og vetur.

Ofangreindar fjárhæðir samsvara því að útgjöld hvers Íslendings vegna ferðalaga til útlanda árið 2012 hefðu að meðaltali verið 704 þúsund krónur og meðalútgjöld hjóna því 1,4 milljónir króna.

Þá var meðaldvalarlengd Íslendinga á ferðalögum erlendis 15,9 gistinætur.

Ferðaþjónusta hér á Íslandi í tölum árið 2012 - Ferðamálastofa í apríl 2013

[Þorsteinn Briem, 25.6.2013 kl. 01:28]

"Ferðamenn sem eru erlendir ríkisborgarar og búa ekki á Íslandi geta fengið hluta virðisaukaskatts af vörum endurgreiddan."

"Heimilt er að endurgreiða virðisaukaskatt til erlendra ferðamanna af varningi sem þeir hafa fest kaup á hér á landi."

"Heimilt er að endurgreiða virðisaukaskatt af vörum á einum og sama vörureikningi sé kaupverð þeirra samtals fjögur þúsund íslenskar krónur eða meira ásamt virðisaukaskatti, þó einn eða fleiri munir nái ekki tilskilinni lágmarksfjárhæð."

"Það er skilyrði endurgreiðslu að kaupandi vörunnar hafi hana með sér af landi brott innan þrjátíu daga frá því er kaup gerðust."

Endurgreiðsla á virðisaukaskatti erlendra ferðamanna hér á Íslandi gildir því ekki til að mynda um þjónustu, svo og mat og drykki á veitingahúsum.

Reglugerð um endurgreiðslu á virðisaukaskatti nr. 294/1997 með síðari breytingum

[Guðmundur Bjarnason (IP-tala skráð) 25.6.2013 kl. 13:46]

Sæll Ómar.

Þú skrifar m.a.: "Að sjálfsögðu þyrftu þessar bætur að vera í algeru lágmarki til þess að skemma ekki fyrir "safari" upplifuninni sem það veitir að aka um frumstæða slóða."
Því spyr ég. Hvaða mann hefur þú að geyma kæri Ómar sem villt tröllríða öllu í öðru orðinu en friða allt í hinu?
Hvað um þessa nýju hugmynd um hálendisleið?
http://visir.is/kostar-3.500-ad-aka-halendisveg-austur/article/2013706259997
Svona vegur myndi útrýma ótal vegaslóðum sem þú elskar. Ekki satt?