Mikið var !

Á yngri árum vann ég nokkur sumur á höggbor við framkvæmdir inni í íbúðahverfum. Hávaðinn var mikill og engar heyrnarhlífar notaðar. Ég má þakka fyrir að hafa ekki skemmt heyrnina og að hafa erft sæmilega endingargóða heyrn frá forfeðrum og mæðrum.

Ónæðið var mikið fyrir fólk í næstu húsum og byrjað var snemma á morgnana.

Nú eru komnar reglugerðir um störf verktaka sem langflestir fara eftir en því miður ekki allir.

Tillitsleysi er enn of algengt. Verktakar veita til dæmis of sjaldan lögboðnar upplýsingar um lokaðar götur þannig að ökumenn er stundum komnir nánast á skurðbakkann þegar lokunin verður þeim ljós, öllum til vandræða.

Þetta skapar óþarfa umferðartruflanir.

Eitt sinn lokaði verktaki öllum botnlangagötum við norðanverða Háaleitisbraut snemma morguns, þar sem alls um 700 manns búa, án þess að gefa nokkrar upplýsingar um það sem til stæði.

Þegar ég kvartaði við yfirmanninn brást hann reiður við, hreytti í mig skömmum, ónotum og skætingi og sagði að ég vissi ekkert  hvað ég væri að tala um, samkeppnin væri mikil, tilboðið hans hefði verið lágt svo að engin peningur væri til annars en verksins sjálfs.

Við athugun kom í ljós að hann hafði brotið reglugerð um málið, en hins vegar átti borgarkerfið að sjá um eftirlit með því að hún væri virt. Hringurinn lokaðist og ekkert gerðist.

Þannig er þetta alltof oft. Maður sér muninn erlendis, þar sem vegfarendur eru upplýstir með skiltum mörgum kílómetrum áður en komið er að framkvæmdunum.  

Eitthvað hefði gerst ef Vegagerðin hefði lokað bílaeigendur í 700 manna þorpi úti á landi inni að morgni dags og langt fram á dag.

Ef rétt er að aðeins einn starfsmaður á höggbor hafi valdið ólögmætum hávaða á Hampiðjureitnum sýnir það einstakt tillitsleysi.

Ég man nefnilega frá því að ég var á höggbornum í gamla daga að það þurfti ekki nema einn bor til að valda nær jafnmiklum hávaða og ef þeir hefðu verið fleiri.

Á Hampiðjureitnum hefði verið hægt að stytta ónæðistímann með því að hafa þá tvo í helmingi styttri tíma. En ekkert slíkt virðist hafa verið gert til að koma til móts við fólkið, sem hávaðinn bitnaði á.  

Ef verktakinn þar hefur uppi sömu réttlætinguna og gert var hér við Háaleitisbrautina um árið varðandi lágt tilboðsverð, er það ónýt afsökun, því að auðvitað verður að gera tilboðið með tilliti til gildandi reglugerðar um verkið.  

Það getur verið nauðsynlegt að nota "borgaralega óhlýðni" þegar þeir sem valdið hafa stunda lögbrot eða sýna yfirgang. 

Það gerðist þegar fólk þaut þolinmæðina eftir langvarandi yfirgang við Hampiðjureitinn og greip til sinna ráða.   

Ólétt kona stöðvaði vinnu höggbors

Athugasemdir

[Jósef Smári Ásmundsson, 14.7.2013 kl. 15:58]

Held að Lögreglan eigi að framfylgja þessum reglum.En ég hef lengi unnið í hávaða og sýnt töluvert kæruleysi hvað varðar notkun á heyrnarhlífum.Ennþá hefur ekkert gerst með heyrnina(7,9,13)sennilega út af því að ég hef sterk eyru.En hef reyndar grínast með það að það sé vegna þess að ég er oftast einn í mínum heimi og er þessvegna ekki að hlusta .Og þá gerist ekkert

[Þorsteinn Briem, 14.7.2013 kl. 15:59]

Reglugerð um hávaða gildir til að mynda um hvenær hávaðasamar framkvæmdir eru leyfðar.

Háværar framkvæmdir eru heimilar virka daga kl. 7-21 en um helgar og aðra frídaga kl. 10-19.

Sérstaklega hávaðasamar framkvæmdir eru leyfðar virka daga kl. 7-19.

Utan þessara tímabila eru slíkar framkvæmdir ekki heimilar nema með sérstöku samþykki eða leyfi.

Reglugerð um hávaða nr. 724/2008

[Þorsteinn Briem, 14.7.2013 kl. 16:13]

"Hljóð er bylgjuhreyfing í lofti og eðlisfræðilega er enginn munur á hávaða og hljóði en frá sálrænu sjónarhorni er hljóð upplifun.

Hávaði er skilgreindur sem óæskilegt eða skaðlegt hljóð."

Hávaði - Umhverfisstofnun

"Ég er dáinn úr ást þó hjartað dæli blóði,
ég heyri engan mun á hávaða eða hljóði."

Stuðmenn - Ástardúett

[Þorsteinn Briem, 14.7.2013 kl. 16:45]

omarragnarsson.blog.is:

Flettingar frá upphafi: 4.000.000 (fjórar milljónir).

[Tryggvi Marteinsson (IP-tala skráð) 14.7.2013 kl. 18:45]

Þetta ástand er svona vegna þess að þegar við setjum lög og reglugerðir sem í sjálfu sér er ágætt og nauðsynlegt þá eru engin viðurlög við að brjóta þau. Ekki í þessu frekar en öðru. Bara skamm er allt er orðið vitlaust en annars ekkert.

[Ómar Ragnarsson, 14.7.2013 kl. 20:43]

Faðir minn heitinn var öryggisvörður hjá Reykjavíkurborg um nokkurra ára skeið og náði í fyrstu ekki neinum árangri, af því að menn komust upp með að brjóta lögin áfram þrátt fyrir ótal áminningar og kæru.

Hann brá á það ráð að fá sér ljósmyndavél og taka myndir í gríð og ergi. Brá þá svo við að árangur fór að nást, enda gaf hann í skyn að menn mættu búast við því að myndir birtust af framferði þeirra.