"Þeyrinn hlýi og himinbláminn..."

Við Helga notuðum kvöldið til þess að aka frá Reykjavik austur á Hérað til að komast sem svaraði ferð til sólarlanda, því að hér eystra er spáð allt að 23ja stiga hita um helgina.

Ferðin er þó vinnuferð öðrum þræði, því að ætlunin er að taka upp þráðinn á bátnum Örkinni, þar sem hann slitnaði fyrir sex árum, þegar ekki tókst að klára að sigla henni á miðlunarlónum Kárahnjúkavirkjunar vegna skemmda, þjófnaðar á utanborðsmótor og fjárskorts, mest vegna þess að fyrirtæki, sem byrjaði að styrkja verkefnið varð gjaldþrota í Hruninu.

Nú hefur borist boð frá ónefndum manni, sem birtist skyndilega og ætlar að kosta viðgerð á bátnum svo að hægt sé að ljúka þessu verki.

Því er nú gerður þessi leiðangur austur á Hérað til að sækja bátinn og draga hann til viðgerðar suður.

Og ekki er það amalegt að fara í leiðinni úr svölum suddanum og rigningunn syðra i 10 stigum hlýrra veður á Héraði.

Herðubreið, Kverkfjöll, Snæfell og önnur djásn norðurhálendisins skörtuðu sínu fegursta nú um miðnæturbil þegar komið var í náttstað eystra og þetta hraut af vörum:

 

             Steypiregn og garragráminn, -

             gremju vakti blandan sú.

              Þeyrinn hlýr og himinbláminn

              heilsa okkur eystra nú.  

Yfir 20 stig í kortunum

Athugasemdir

[Þorsteinn Briem, 19.7.2013 kl. 01:21]

Um níu af hverjum tíu Íslendingum ferðuðust innanlands árið 2009 og gistu þá að meðaltali tvær vikur á þessum ferðalögum.

Að meðaltali voru því um ellefu þúsund Íslendingar á ferðalögum innanlands á degi hverjum árið 2009.

Níu af hverjum tíu Íslendingum ferðuðust einnig innanlands árin 2011 og 2012.

Íslendingar voru að meðaltali 15 gistinætur á ferðalögum innanlands árið 2012, þar af samtals 465 þúsund á hótelum eða gistiheimilum.

Og það ár heimsóttu 43% þeirra Akureyri en 27% Þingvelli, Gullfoss eða Geysi og 18% Mývatnssveit.

Ferðaþjónusta hér á Íslandi í tölum árið 2012 - Ferðamálastofa í apríl 2013

[Þorsteinn Briem, 19.7.2013 kl. 01:28]

Sumrin (júní, júlí og ágúst) 2001-2012 var meðalhitinn hærri í Reykjavík en á Akureyri, samkvæmt mælingum Veðurstofu Íslands.

Í Reykjavík var meðalhitinn í júní um 0,7 stigum hærri en á Akureyri, í júlí um 0,6 stigum hærri og í ágúst um 0,6 stigum hærri.

[Þorsteinn Briem, 19.7.2013 kl. 01:37]

Meðalhitinn mældist 9,9 stig í Reykjavík í júní síðastliðnum, sem er 0,9 stigum fyrir ofan meðaltal áranna 1961-1990, samkvæmt mælingum Veðurstofu Íslands.

[Þorsteinn Briem, 19.7.2013 kl. 02:03]

Frá árinu 2001 hefur meðalhitinn í júní í Reykjavík þrisvar sinnum verið lægri en í júní síðastliðnum, 8,8 stig árið 2001, 9,4 stig árið 2006 og 9,2 stig árið 2011, samkvæmt mælingum Veðurstofu Íslands.

[Þorsteinn Briem, 19.7.2013 kl. 08:16]

Inn Eyjafjörðinn kemur oft ískaldur vindur norðan úr ballarhafi og víða á Tröllaskaganum á milli Eyjafjarðar og Skagafjarðar er ekkert sólskin mánuðum saman á veturna vegna hárra fjalla, líkt og til að mynda á Ísafirði.

Þar sést ekki til sólar frá því seint í nóvember til 25. janúar og þeim degi er fagnað með sólarkaffi og rjómapönnukökum.

En á Fjalli í Kolbeinsdal í Skagafirði sést sólin ekki í rúmlega 5 mánuði (154 daga) og í Baugaseli í Barkárdal, inn úr Hörgárdal í Eyjafirði, er sólarlaust í tæplega 5 mánuði en í Hvammi í Hjaltadal í Skagafirði sést ekki til sólar í fjóra og hálfan mánuð (135 daga).

Í Syðra-Firði í Lóni í Austur-Skaftafellssýslu sést hins vegar ekki til sólar í rúmlega 5 mánuði, um 160 daga, og hann er sá bær hér á Íslandi sem er lengst í skugga ár hvert.

En Eiríkur Eiríksson bóndi í Syðra-Firði orti:

Mikaels- frá messudegi,
miðrar góu til,
sólin ekki í Syðra-Firði,
sést það tímabil.

En að þreyja í þessum skugga,
þykir mörgum hart,
samt er á mínum sálarglugga,
sæmilega bjart.

Mikjálsmessa höfuðengils er 29. september og mið góa 4.-10. mars.

Gríðarleg snjókoma er einnig oft við Eyjafjörð, eins og til dæmis á Dalvík síðastliðinn vetur, þar sem jafnvel Þór Saari gnæfði yfir ljósastaura.

Og að sjálfsögðu er oft kalt í veðri hér á Íslandi, enda þótt sólskin sé á sama tíma, svokallað gluggaveður.

En sumum Íslendingum þykir hitinn óþægilega mikill þegar hann fer rétt yfir 20 stig, mörgum þykir rigningin góð og slagviðrið hressandi.

Eins þykir flestum erlendum ferðamönnum gott að koma hingað á sumrin úr gríðarlegum hita og sterku sólskini á þeirra heimaslóðum.

Margur Mörlandinn er á hinn bóginn lengi að jafna sig á jafnvel 20 stiga meiri hita erlendis þegar hann fer út fyrir landsteinana á sumrin.

Mun kaldara er hins vegar á veturna víða erlendis og jafnvel mun meiri snjókoma en hér á Íslandi, til að mynda á meginlandi Evrópu og í Norður-Ameríku.

Veðurklúbburinn á Dalvík er aftur á móti eins og gullfiskur með Alzheimer, líkt og Sjálfstæðisflokkurinn, og þykir því betra að gera veðurspár en tíunda jafnvel nýliðið veðurfar.

Og miklir eru þeir vesalingar sem gapa um vont tíðarfar á Suðurlandi nú í sumar, að sunnlenskum bændum undanskildum en þeir brynna músum í öllu tíðarfari.

[Úrsúla Jünemann, 19.7.2013 kl. 10:44]

Sammála, það er talsvert betra að vera í súld og sudda heldur en í óbærilegum hita. Og mikið er allt grænt og fallegt hér fyrir sunnan.

[Þorsteinn Briem, 19.7.2013 kl. 17:39]

Sigurður Viðar Guðjónsson, Vermont í Bandaríkjunum í dag:

"Nú ætlar hitinn alla að drepa, gærdagurinn var heitur en dagurinn í dag verður þó mun heitari og fer upp í 35 stig að minnsta kosti."

"Svona dagar verða svo stöðugt þyngri þá líður á, loftið verður þykkt og rakamettað af uppgufun eftir allt regnið undanfarna tvo mánuði."

"Og dagar sem þessi enda gjarnan með dúndrandi regnsprengjum og látum.

Þrumugnýrinn er líkastur því að sprengja hafi sprungið rétt fyrir ofan höfuðið, svo rignir dropum á stærð við bláber og þeir koma svo ört og þétt niður að allt sýnist sem stöðug buna.

Þetta er þó heit rigning og ekki nægilega svalandi.

Á svona dögum er heimþráin sterk og hér eru allir að spyrja mann um þetta fallega og svala land, Ísland."