Grindarbíll eða ekki grindarbíll?

Í tengdri frétt á mbl.is er sagt að Suzuki Grand Vitara sé á grind. Þetta getur verið svolítið misvísandi því að oftast er átt við sérstaka grind þegar svona er tekið til orða, sem yfirbygging hvílir á.

Þannig var Suzuki Vitara alla tíð þar til nýjasta gerðin kom fram. Þetta fyrirkomulag gerði kleift að lyfta yfirbyggingunni upp á grindinni um nokkra sentimetra með því að hækka undirstöður hennar, en með því opnaðist möguleiki til að koma stórum hjólbörðum, allt að 36 tommum í þvermáli, undir bílinn.

Þetta er ekki hægt á nýjustu gerð Vitara vegna þess að grindin er soðin saman við yfirbygginguna.

Það er vegna þess að í samvinnu Suzuki og General Motors var ákveðið að þrír bílar, Suzuki Grand Vitara, Chevrolet Equinox og Pontiac Torrent, skyldu vera með sömu grunnbygginguna.

Í handbókum segir að bandarísku bílarnir séu með sjálfberandi byggingu, sem er rétt skilgreining, en í árlegri yfirlitsbók hins svissneska tímarits Automobil Revue er byggingin talin sjálfberandi á amerísku bílunum en grindarbygging á Suzuki Vitara.

Á sínum tíma var Renault 4 með grind, sem soðin var föst við yfirbygginguna og fyrsta gerð Jeep Cherokkee var með álíka útfærslu, nema að bitarnir náðu að hálfu leyti upp í yfirbygginguna, svipað og svonefndir sílsar. Og í bílatímaritum og bókum mátti sjá rugling varðandi þetta.   

Það sem helst skilur Grand Vitara frá öðrum jepplingum er að hann er með háu og lágu drifi frá Suzuki og verður því að teljast mjög góð kaup í þessum flokki bíla.

Gallinn er hins vegar svipaður og á öðrum jepplingum, að þegar jepplingarnir eru hlaðnir, síga þeir svo mikið niður, að veghæðin fer niður í allt að 13-14 sentimetra.

Suzuki umboðið býður upp á hækkun á fjöðrun og örlítið stærri dekk sem hækkar bílinn um allt að 4 sentimetra fyrir innan við 200 þúsund krónur.

Það er svo lítill hluti af heildarverði bílsins að ég hvet kaupendur aldrifsbíla af þessari stærð til að íhuga þann möguleika vel svo að bíllinn njóti sín betur, hvort sem hann er hlaðinn eða óhlaðinn.

Það getur einnig komið vel til greina hvað varðar aðra jepplinga, en mér er ekki kunnugt um, hvort sérstaklega er boðið upp á það hjá þeim umboðum, sem hafa þá á boðstólum.

Áfram góður kostur í sínum flokki

Athugasemdir

[Ásgrímur Hartmannsson, 14.8.2013 kl. 20:03]

Hvort það er grind í bílnum eða ekki kemur allt niður á aksturseiginleikunum: ef þeir eru góðir, og bíllinn hegðar sér á vegi eins og bíll, en ekki heygrind, þá er hann með sjálfberandi yfirbyggingu, annars ekki.

Sú var tíð að mönnum tókst ekki almennilega aðsmíða svona sjálfberandi yfirbyggingar. En nú er búið að sjá við því öllu. Reynzla og þróun.

[BMX (IP-tala skráð) 14.8.2013 kl. 20:57]

Steini Breim með beinagrind,

á lykla borðið pikkar.

Hefur haus eisog gömul kind,

vitð oftast klikkar.

[BMX (IP-tala skráð) 14.8.2013 kl. 21:03]

Steini Breim með beinagrind,

á lykla borðið pikkar.

Hefur haus einsog gömul kind,

vitð oftast klikkar

[Þorsteinn Briem, 14.8.2013 kl. 22:01]

Ég hélt að þúfutittlingarnir hétu AMX.

[Gunnar Heiðarsson, 15.8.2013 kl. 09:52]

Nú þekki ég ekki nýjustu gerð Grand Vitara bílsins, en ef það er rétt sem þú segir Ómar, að grind sé sambyggð boddý, er ljóst að um sjálfberandi boddý er að ræða.

Þá er verið að plata fólk með því að segja að bíllinn sé byggður á grind og spurning hvort þarna fari ekki fram auglýsingasvik.

Allir bílar sem byggðir eru sem sjálfberandi, hafa einhverskonar burðargrind sambyggða boddýinu. Þeir eru þó fjarri því skilgreindir sem grindarbílar. Varðandi Cherokee jeppann þá fór aldrei á milli mála að þar var um bíl að ræða með sjálfberandi boddý. Engum datt í hug að tala þar um grindarbíl.

Skilgreining á grindarbíl er einföld. Ef hægt er að taka boddý af grindinni án þess að slíta sundur drifbúnað, að hægt sé í raun að keyra bílinn án boddýs, þá er um grindarbíl að ræða. Aðrir bílar teljast með sjálfberandi boddý, sama hversu margir burðarbitar eru í því og hvernig þeim er upp raðað.

Suzuki umboðið hér á landi ætti að sjá sóma sinn í að hætta þessum lygum, ef rétt er hjá þér Ómar. Það breytir engu þó menn séu eitthvað tvístígandi um þessa skilgreiningu erlendis, hún er skýr og klár hér á landi.

Grand Vitara bílarnir hafa komið vel út og engin ástæða til að ætla annað en þessi nýji geri það líka. Þessir bíar hafa sinn trygga aðdáendahóp, sem fer ört stækkandi. Umboðið þarf ekki að nota vafasamar fullyrðingar eða jafnvel lygar til að auglýsa þennan bíl, hann hefur sjálfur séð um það verk fyrir umboðið.

[Ómar Ragnarsson, 15.8.2013 kl. 20:07]

Ég tel að bygging Suzuki Grand Vitara sé sjálfberandi enda hef ég ekki séð einn einasta af þessum bílum "hækkaða á grind" eins og gert hefur verið við marga fyrri Súkkujeppa, Vitara, Jimny og Fox.

Ég er ekkert að álasa umboðinu eða bílablaðamanninum fyrir að halda öðru fram, enda virðast þekkt og virt bílablöð vera í vafa um þetta eða vera á villgötum með það.

Þar að auki er það oftast svo að bílar hafa mun betri almenna aksturseiginleika ef byggingin er sjálfberandi, þannig að fyrir þá, sem vilja betri almenna aksturseiginleika og eru ekki að hugsa um mikla upphækkun, er auglýsing á því að bíllinn sé á grind frekar letjandi en hvetjandi, ef gert er ráð fyrir því að kaupandinn þekki þetta atriði.

Stífleikinn hefur áhrif. Meira að segja er það svo, að oft sér maður gumað af því að nýjar gerðir ákveðinna bíla, sem hafa sjálfberandi byggingu, hafi verið gerðir 20-30-40% prósent stífari með nýrri og sterkbyggðari hönnun.

Og mér er kunnugt um það að Suzukiumboðið upplýsir kaupendur um þá takmörkuðu möguleika sem eru á að hækka hann,- að hækka hann á fjöðruninni eða "klippa" úr brettum.

En almennt séð á það við alla umboðsmenn fyrir jepplinga á Íslandi og raunar hjá bílaframleiðendum og bílablaðamönnum um allan heim, að hjá þeim ríkir þöggun yfir því hve bílarnir síga mikið niður við hleðslu.

Ástæðan er einföld. Þessir "crossover" bílar eru tískufyrirbrigði hjá millistéttarfólki, og mikil sala þeirra gefur framleiðendunum miklu meiri peninga í gróða á hvern bíl en fæst fyrir ódýrustu bílana.