Það verður enn bið á íslensku "Örkinni".

Nú er myndin um Noah, örkina hans Nóa, að komast fyrir almennings sjónir.

Vonandi rennur upp sá dagur sem íslenska heimildamyndin "Örkin" verður fullgerð og sýnd. Þangað til verður það hin erlenda mynd, sem mun væntanlega gleðja fólk með myndskeiðum af íslenskri náttúru.

Engin heimildamynd mín hefur verið eins kostanaðarsöm fyrir mig og "Örkin", því að það kostaði mikið að taka upp allt myndefnið í hana.

Sérferðir mínar frá Reykjavík austur á land og upp á norðausturhálendið urðu alls um 100 og dagarnir sem fóru bara í þessi ferðalög voru meira en 300. Kvikmyndatökumennirnir Friðþjófur Helgason og Sigurður Grímsson fóru í margar af þessum ferðum með mér, einkum Friðþjófur.

Að öllu eðlilegu má búast við að þessi mynd muni kosta hátt í 100 milljónir þegar öll kurl verða komin til grafar. 15 milljónir fengust í beina styrki til hennar en kostnaðurinn er orðinn talsvert meiri við að ná öllu þessu myndefni og ekki er í sjónmáli neinn möguleiki til að afla fjár til framhaldsins.

Aðalatriðið er, að það tókst þó að ná myndefni sem aldrei verður hægt að taka aftur.

Það hefur tafið, að vegna virkjana- og stóriðjuæðisins, sem rann á Íslendinga um síðustu aldamót, hefur þessi mynd orðið að víkja fyrir bráðari verkefnum um allt land.

Hjalladalur er sokkinn og mun fyllast af auri og því verður ekki snúið við. Hins vegar er von til að snúa öðru við víða um landi eða að minnsta kosti að hafa einhver áhrif með því að standa vaktina þar.

Hitt veit ég, að það verður ekki fyrr en myndin "Örkin" verður sýnd, hvenær sem það verður, sem þjóðin og umheimurinn munu fá að sjá, hvað raunverulega var gert með Kárahnjúkavirkjun.

Um þá, sem stóðu að þeim hervirkjum, verður hægt að segja: "Fyrirgef þeim, þótt þeir vildu ekki vita hvað þeir voru að gera."  

Íslensk náttúra og örkin hans Nóa

Athugasemdir

[Þorsteinn Briem, 15.11.2013 kl. 00:06]

"Þetta reddast!"

[Jón Logi (IP-tala skráð) 15.11.2013 kl. 17:09]

Er mikið eftir af verkum til að klára myndina?

[Ómar Ragnarsson, 15.11.2013 kl. 23:57]

Ég á eftir að sigla um Kelduárlón og lokasiglinguna um Hálslón. Síðsumars var gert við Örkina, sem nú er geymd uppi í Borgarfirði. Síðan er ég að skrifa handrit að myndinni, en það kostar tíma og þar með fé, því að ekki geri ég annað á meðan.

Síðan er eftir að setja myndina saman sem er mikið verk. "Draumalandið" mynd Andra Snæs, kostaði 60 milljónir eða líkast til upp undir 100 milljónir á sínum tíma, og að baki henni lá ekki líkt því eins mikil vinna.

Ástæða þess að mín er þó ekki orðin dýrari en raun ber vitni er sú að ég notaði flugvél í staðinn fyrir þyrlur, nema aðeins lítillega einu sinni, notaði aðeins gamla bílgarma og svaf í þeim í stað þess að vera á hótelum.

[Ómar Ragnarsson, 15.11.2013 kl. 23:59]

Vantar inn í setninguna þarna fyrir ofan: "...mynd Andra Snæs kostaði 60 milljónir á sínum tíma eða likast til upp undir 100 milljónir á núvirði..."