"Það er engin leið að hætta..."

Tilfinningarnar sem Eiður Smári Guðjohnsen sýndi eftir landsleikinn í gærkvöldi eru alþekkt fyrirbæri í íþróttum og fleiru því sem menn taka sér fyrir hendur í lífinu af ástríðu og áhuga.

Það var hrifnæm stund að horfa og hlusta á Eið Smára vegna þess að í henni spegluðust blóð, sviti og tár að baki einstökum ferli mikils afreksmanns í íþróttum.

Þegar litið  er yfir það hvernig hann vann sig upp úr alvarlegum meiðslum á sínum tíma og gafst aldrei upp við mótlætið er ekki hægt annað en að taka ofan fyrir honum í þökk og aðdáun.

Ferillinn segir sína sögu, leikmaður með Chelsea og Barcelona, handhöfum tveggja eftirsóttustu landsmeistaratitla heims og auk þess meistaradeildartitils.

Það eina, sem hann átti eftir, var að leika úr úrslitakeppni HM. Hann var samt ekki einn um það að missa af lestinnin núna, - það varð hinn stórkostilegi Zlatan Ibrahimovich að gera líka.

Eiður átti ómetanlega þátt í velgengni landsliðsins okkar með því að koma inn á í leikjum, þar sem hann lagði upp sóknarsamspil, sem á sér varla hliðstæðu í íslenskri landsleikjasögu.

Þetta landslið er einfaldlega það fyrsta, sem hafði mannskap til að gera sóknarleikinn að sterkari hlið spils síns.

Listinn yfir afburða menn í íþróttum og fleiru, sem gátu ekki hætt á toppnum, heldur urðu að bergja til botns hinn beiska bikar óhjákvæmilegrar hnignunar er langur: Manny Palquiao, Oscar De la Hoya, Roy Jones, Mike Tyson, Muhammad Ali, Joe Frazier, Sonny Liston, Floyd Patterson,  Archie Moore, Joe Louis, Jack Dempsey, Jack Johnson... svo að aðeins ein íþróttagrein sé tekin sem dæmi.

Oscar De la Hoya orðaði það svo að hann gæti ekki sætt sig við þann endi ferils síns að liggja í striganum emjandi eins vesalingur. Hann varð að reyna einn bardaga enn, og þegar sá bardagi gekk óvænt vel fannst honum hann ekki geta hætt á meðan hann væri þetta góður.

Sem leiddi til fleiri niðurlægjandi tapbardaga hjá honum.

Eiður Smári getur hætt núna í landsliðinu sáttur við sitt mikla framlag á sínu sviði fyrir þjóðina.

Þegar komið er fram á fertugsaldur þurfa afreksmenn að leggja æ harðara af sér til þess að dala ekki um of og að baki svanasöngs Eiðs Smára hefur líklega legið mikil vinna. Þá er erfiðara að sætta sig við það að komið sé á endastöð.   

  

Glæsilegum landsliðsferli Eiðs lokið

Athugasemdir

[Már Elíson, 20.11.2013 kl. 14:37]

Frábær ferill, frábær endir á ferli. - Eiður hefur verið vanmetinn af mörgum og millum tanna misvitra manna. - Dramatískur endir á ferlinum með landsliðinu, en hann er líkamlega farinn að hægja á sér, það er ljóst, - og hann veit það.

[Þorsteinn Briem, 20.11.2013 kl. 14:45]

Margan góðan leikinn lék,
lofsverðir hans fætur,
Eiður loks af velli vék,
í viku hann nú grætur.

[Bjarni Gunnlaugur (IP-tala skráð) 20.11.2013 kl. 15:53]

Eiður er náttúrulega búinn að vera frábær í gegnum tíðina. Kanski hefur karlinn nægan kraft í einhverja landsleiki enn. Mögulega var hann að visa til þess að trúlega yrði hann ekki oftar valinn eftir þennan vonbrigðaleik (þar sem hann hafi átt að skora) fremur en að hann væri sjálfur ákveðinn að hætta. Hver veit?

Aum eru þau eftirmæli

alveg marklaust þetta rím

að Eiður Smári í viku væli

vitlaus ertu Steini Briem

[Þorsteinn Briem, 20.11.2013 kl. 16:24]

Ekki skilur Bjarni Gunnlaugur glettni frekar en aðrir vesalingar hér, greinilega með undirritaðan á heilanum.

Ég vissi ekki að Eiður Smári Guðjohnsen væri dauður og sjálfsagt betra að hann viti af því sjálfur.

Eftirmæli - minning, minningargrein.

(Íslensk orðabók Menningarsjóðs.)

[Ragna Birgisdóttir, 20.11.2013 kl. 19:23]

[Bjarni Gunnlaugur (IP-tala skráð) 20.11.2013 kl. 21:24]

Æi já Steini, þetta var nú raunar gráglettni hjá mér, meiningin ekkert sérstaklega mikil. Það er bara svo freistandi að pikka í menn sem stökkva umsvifalaust upp á nef sér.

Svo er ég aðeins að mana þig til betri yrkinga:

Við Ómars blogg í allan vetur

ég eflaust skeyti háð og flím

Ef ekki ferðu að yrkja betur

eins og gætir Steini Briem

[Þorsteinn Briem, 20.11.2013 kl. 21:53]

Grey skinnið.