Hvernig getur "eitthvað annað" bjargað neinu?

Fyrir tæpum aldarfjórðungi var hrópað fyrir norðan að álver við Eyjafjörð yrði að rísa þar til að "bjarga Eyjafirði" frá því að fara í kaldakol. Ástæðan var sú að vegna hnignunar og hruns Sovétríkjanna lagðist útflutningur iðnaðarvöru frá verksmiðjum samvinnufélaganna á Akureyri af, SÍS fór á hausinn og vá var fyrir dyrum. 

Til að bjarga Eyjafirði kom mönnum ekkert annað í hug en framleiðsla á hráefni með góðu eða illu.

"Eitthvað annað" kæmi ekki til greina.

Niðurstaðan varð samt sú að þegar neyðst var til að söðla um fyrir norðan, Akureyri gerð að háskólabæ og allskyns frumkvöðla- og nýsköpunarstarf skaut rótum, varð árangurinn sá að Eyjafjarðarsvæðið og Norðausturland blómstraði og hrunárin 2008-2011 var þetta eina landsbyggðarsvæðið þar sem fólki fjölgaði á sama tíma sem fækkaði annars staðar á landsbyggðinni, þótt ekkert væri þar álverið.

Frá því í Hruni og til þessa dags hefur verið sunginn hávær söngur um það að álver yrði að rísa í Helguvík "til að bjarga Suðurnesjum."

Meira að segja hefur verið gefin út yfirlýsing ríkisstjórnarinnar um að álver verði að rísa og til þess að svo megi verða er stefnt að því að skipta um fólk í stjórn Landsvirkjunar svo að hægt verði að fara aftur til 1995, lækka orkuverðið nógu mikið til að "orkufrekjur iðnaður" (mesta orkubruðl, sem mögulegt er) fáist til að kaupa orku á "lægsta orkuverði í heimi" eins og sett var fram í bænaskjali til stóiðjurisa heimsins fyrir 18 árum.  

"Eitthvað annað" komi ekki til greina.

Fréttin "hratt hefur dregið úr atvinnuleysi á Suðurnesjum" hlýtur að röng miðað við þennan söng. Hvernig getur "eitthvað annað" bjargað neinu?

Þá vill það gleymast að nú um stundir vinnur minna en 1% vinnuafls landsins í álverum, og að jafnvel þótt bætt sé við "afleiddum störfum" eru þetta ekki nema 2% vinnuaflsins, - 98% er "eitthvað annað."

Og jafnvel  þótt öll orka Íslands yrði sett í álver myndu innan við 2% vinnuaflsins fá vinnu í álverunum og minna en 5% samtals með öllum mögulegum afleiddum störfum.

Sem þýðir að minnst 95% myndu vinna við "eitthvað annað".   

  

Landið loks að rísa á Suðurnesjum

Athugasemdir

[ÞÞ (IP-tala skráð) 23.11.2013 kl. 12:02]

já og sérvaldir verkfræðingar skrifuðu skýrslur og mældu jarðvergsdýpt og í tæp 20 ár og sendu reikninginn til Landsvirkjunar.ÞÞ

[Þorsteinn Briem, 23.11.2013 kl. 13:57]

1.11.2013:

Ferðaþjónusta nú stærsta starfsgreinin í Reykjanesbæ

[Sigurður Antonsson, 24.11.2013 kl. 07:54]

Eins og sögupersóna í Hamskiptum Frans Kafka gekk þingmaður háttvirtrar Melrakkasléttu eins og kónguló á veggjum og loftum. Til að ná inn meðgjöf með stóriðju á Bakka. Flokksystkinin hans hjálpuð til við að raða upp húsgögnunum eins og best hentaði göngu þingmannsins. Í sögunni um Gregor auðveldar systir hans gönguna.

Allt samfélagið hefur verið meira og minna meðvirkt í meira en 30 ár um að halda uppi sömu gálgagöngu sóriðju. Kallað á kónga og erlend ráð þrátt fyrir að afneita því. Hálfvelgja og flótti frá raunveruleikanum styrkja ekki innviði þingsins.

Saga þjóðar út í eyhafi er saga sársauka."Manga með svarta Vanga"?