Sigmundur Davíð maður ársins.

Ef notuð eru algengustu alþjóðleg viðmið varðandi val á manni ársins, er erfitt að sjá hvernig nokkur annar en Sigmundur Davíð Gunnlaugsson geti orðið fyrir valinu að þessu sinni hér á landi.

Maður sem á langstærstan þátt í því að rífa flokk sinn svo upp í fylgi að hann tvöfaldi það og verður síðan í kjölfarið næstyngsti forsætisráðherrann í sögu landsins hlýtur að mínu dómi að verða fyrir valinu.

Ofangreindar staðreyndir ættu að duga og í svona vali verða menn að hefja sig upp fyrir pólitískar skotgrafir.

Ríkisráðið fundar í dag

Athugasemdir

[Þorsteinn Briem, 31.12.2013 kl. 10:45]

Sigmundur Davíð er alla vega maður társins.

[Davíð, 31.12.2013 kl. 11:12]

Gleðilegt ár,

Ég er ekki búinn að vera nógu duglegur að fylgjast með verkum hans en hvað er það helsta sem stendur upp úr hjá honum í starfi sem forsætisráðherra?

Með bestu áramótakveðju og smá forvitni

[Úrsúla Jünemann, 31.12.2013 kl. 14:37]

Á maður sem kom sér til valda með óraunhæfum loforðum að verða maður ársins? Á hvaða forsendum? Þetta er ómerkilegur lýðskrumari.

[Jóhann Kristinsson, 31.12.2013 kl. 14:53]

Ég er sammála Ómari, Simundur Davíð er auðvitað maður ársins, það er enginn vafi á því.

Kveðja frá Houston.

[Benedikt V. Warén, 31.12.2013 kl. 15:19]

Sammála síðuhafa og Jóhanni Kristinssyni.

Sigmundur Davíð stendur við það sem hann lofaði. Ýmsir geta síðan túlkað það á sinn hátt. En hvað sagði refurinn? "Þau eru hvort eð er súr". Þetta sér maður ljóslega þegar stuðningsfólk SF og VG tjá sig. Skiljanlegt viðhorf, þegar kom í ljós, að ekki var staðið við loforðin um "skjaldborg um heimilin".

Gleðilegt blogg ár og þakka liðið.

[Haukur Kristinsson (IP-tala skráð) 31.12.2013 kl. 17:03]

Það yrði enn eitt kjánaprik fyrir innbyggjara, ef pólitíkus, sama hvað nafni hann nefnist, yrði fyrir valinu sem maður ársins 2013.

Hvernig væri að viðurkenna að enginn eigi heiðurinn skilinn?

[Þorsteinn Briem, 31.12.2013 kl. 17:41]

Adolf Hitler: Man of the Year, 1938 - TIME

[Davíð, 31.12.2013 kl. 18:02]

Í mínum huga er ÓMAR RAGNARSSON MAÐUR ÁRSINS, frammistaða hans í haust í Gálgahrauni er eitthvað sem snertir ákveðnar taugar hjá mér. Það að sjá hann borinn í burtu af lögreglunni og standa á sínu og hvetja aðra áfram.

Til hamingju Ómar þú átt skilið að vera maður ársins að mínu mati. 

[Árni Gunnarsson, 31.12.2013 kl. 18:17]

Maður ársins er í mínum huga sá sem skilur eftir minningar um farsæl störf í þágu samfélagsins ellegar vinnur frækinn sigur sjálfum sér eða öðrum til farsældar og eftirbreytni.

Að sigur Framsóknarflokks í alþingiskosningum verði þjóðinni til gæfu mun koma mér á óvart.  

[Þorsteinn Briem, 31.12.2013 kl. 18:18]

Ómar Ragnarsson var maður ársins á Rás 2 sem fréttamaður árið 2003 og sem baráttumaður fyrir náttúruvernd árið 2006.

[Anna Sigríður Guðmundsdóttir, 31.12.2013 kl. 18:44]

"Ber er hver að baki nema sér bróður eigi". Þannig hljóðar gamall málsháttur, sem ég skildi ekki í fyrsta skipti sem ég heyrði hann, enda bara barn þá. En lífsins skóli kenndi merkinguna.

Hver er "Stóri Bróðir" í Framsóknarflokknum, og öðrum flokkum?

Við þurfum öll að fá sannar upplýsingar um það, áður en reynsluríki raunveruleikinn þarf að kenna okkur það, á harkalegan hátt. Og of seint.

M.b.kv.

[Þjóðólfur (IP-tala skráð) 31.12.2013 kl. 21:25]

LÍU-kallinn er maður ársins fyrir að búktala drengina til valda....

[Ómar Ragnarsson, 1.1.2014 kl. 03:42]

Maður ársins þarf ekki endilega að hafa unnið óumdeildar dáðir né vera óumdeildur og gallalaus. Aðal skilyrðið er að hann hafi haft meiri áhrif á atburðarás ársins en aðrir og það gerði Sigmundur Davíð með því að vinna að því að hér urðu stjórnarskipti af sjaldgæfum toga, þ. e. að stjórnarandstaða felldi stjórn og komst sjálf til valda.

Í árslok er engin leið að sjá fyrir hvernig spilast muni úr málum og því verður að miða við stöðuna eins og hún breyttist á árinu sjálfu en ekki einhverjum getsökum um framhaldið.  

Það gerðist aðeins tvisvar fyrr á fullveldistímanum, árin 1927 og 1971 að stjórnarandstaða felldi ríkisstjórn og tók sjálf við.

Jónas frá Hriflu var til dæmis tvímælalaust maður ársins 1927 á Íslandi.

Svo horft sé til vals á manni ársins erlendis án þess að því verði hvað einstaklingana snertir líkt saman við valið hér heima, má geta þess að tímaritið Time valdi harðstjórann og fjöldamorðingjann Adolf Hitler réttilega mann ársins 1938 burtséð frá því hvaða mann hann hafði að geyma.

Einstæður stjórnmálaárangur hans og stórbreyting á valdahlutföllum í Evrópu, sem fékkst fram með hótunum og loforðum sem voru svikin aðeins tveimur mánuðum eftir áramótin 1938-39, höfðu meiri áhrif á gang heimsmálanna en hjá nokkrum öðrum stjórnmálamanni í áratugi á undan.

Og árið 1943 varð Jósef Stalín réttilega fyrir valinu, þótt kannski hafi hann átt sök á dauða enn fleiri manna en Hitler. Sigurinn í Stalingrad og Kursk 1943 og viðsnúningur í heimsstyrjöldinni voru færð Stalín til tekna, en 20 sinnum fleiri Þjóðverjar börðust á austurvígstöðvunum en í Norður-Afríku.

Þegar litið er til þess að ég þekki Sigmund Davíð Gunnlaugsson ekki nema að góðu einu sem persónu og mann og lít framhjá skoðanamun okkar í ýmsum málum, hika ég ekki við að velja hann sem mann ársins.   

[Helgi Armannsson (IP-tala skráð) 1.1.2014 kl. 10:56]

sammala Davíð Örn ÓMAR RAGNARSSON a að vera maður ársins eg fékk stiklur i jólagjöf og hafði mjög gaman af

[Haukur Kristinsson (IP-tala skráð) 1.1.2014 kl. 12:33]

Hér er fyrsti pistill Jónasar á nýju ári. Ágætur og á heima í umræðunni.

RANGT ER GEFIÐ.

"Fólk er farið að fatta, að rangt er gefið í spili lífsins. Börn eiga ekki lengur von um betra líf en foreldranna. Fólk sér vítahringinn í lánafangelsi markaðshyggju, vaxandi gjá milli auðs og fátæktar. Fyrstu viðbrögðin eru reiði og tortryggni. Tækifærissinnaður loddari hleypur upp og lofar lýðnum skuldaleiðréttingu og hvaðeina. Það tekur tíma fyrir fólk að átta sig á, að lýðskrumari leysir engan vanda. Þegar það rís upp í alvöru af yfirvegun og skynsemi, er hætt við kollsteypu. Vítahringur gliðnunar samfélagsins verður stöðvaður, hugsanlega með handafli. Frjálshyggju verður þá varpað á haugana".

[Guðjón Sigþór Jensson, 1.1.2014 kl. 13:17]

Er SDG íslensk útgáfa af Silvio Berlusconi? Ótrúlega margt eiga þeir sameiginlegt: auðmenn eru þeir báðir, hafa hreðjartök á fjölmiðlum og eru ansi brattir í kosningaloforðum og yfirlýsingum þeim tengdum. Eitt skilur þó þá af: ekki fara neinar sögur af kvensemi SDG. En hann er ekki orðinn fertugur og grái fiðringurinn getur breytt öllu.

Hversu lengi við munum sitja uppi með þetta ítalska fyrirbrigði skal ósagt látið að svo stöddu. Meðan trúgirni íslensku þjóðarinnar er meiri en skynsemi þá er ekki von á góðu.