Gefandi kynni.

Sumarið, sem ég var með Andra Frey Viðarssyni í útvarpsþáttunum "Ómar og Andri á flandri" þar sem flækst var um allt land, var afar gefandi fyrir mig af því að það var svo skemmtilegt og hressandi að kynnast honum.

Það var hreinn unaður að vinna með honum, svo duglegur, útsjónarsamur og hugmyndaríkur var hann og með nýjustu tækni alveg á hreinu.

Ég hélt fyrst að Sigrún Stefánsdóttir, þáverandi dagskrárstjóri, væri að grínast þegar hún gaukaði að mér, gamalmenninu, hugmyndinni að þessum þætti með manni sem kom úr algerlega ólíku umhverfi, en þetta var alvara hjá henni.

Það var ekki hægt annað en að slá til og gera eitthvað alveg nýtt, sem maður hafði aldrei gert áður, og það í samstarfi við miklu yngri mann, sem gat verið barnabarn manns, og hafði fengið orð á sig fyrir að vera heldur betur krassandi útvarpsmaður.

Upphaflega vinnuheitið var "Afinn og strákurinn" en ég sá strax hvað hann var með heppilegt nafn til að láta það ríma á móti því sem við ætluðum að gera, að vera á flandri.

Við sungum meira að segja heilt lag saman undir þáttaheitinu og ég man varla eftir jafn mikilli færni hjá nokkrum öðrum við að spinna undirbúningslaust og fyrirvaralaust af fingrum fram.

Ef aldrei væri nein umræða eða skiptar skoðanir um útvarpsþáttagerð Andra Freys heldur bara lognmolla, væri eitthvað mikið að.

Aðall hans er hve hann er hreinn og beinn og hreinskiptinn og frjór í hugsun. Það hleypir nauðsýnlegu lífi í þættina. Ekki vegur það minna að hann er næstum því tónlistarnörd og alæta á því sviði með afar mikla þekkingu á léttri tónlist og breitt áhugasvið.

Ég komst að því að þegar hann var í plötusnúðabransanum hefði hann verið 4000 lög fyrirvaralaust á takteinum!

Gunna Dís var nákvæmlega rétta manneskjan til að vinna með Andra Frey og saman virka þau þannig á hlustendur að þau gætu verið í fjölskyldum þeirra allra. Það er ekki lítill kostur.  

„Af hverju skiptiru þá ekki um stöð?“

Athugasemdir

[Kjartan Sigurgeirsson, 10.1.2014 kl. 08:32]

Sæll Ómar.  Ég vona að það hafi gefið Andra jafn mikið og þér þessi samvinna.  Það skemmdi talsvert fyrir mér þegar ég horfði á þáttinn hans Andri á flandri hvað hann var mikið gefinn fyrir að hafa sjálfan sig í forgrunni í viðtölum við fólk í stað þess að í viðtölum þínum við fólk um land allt var það í forgrunni, þú meira bara til að halda umræðunni gangandi.  Ég hef til dæmis aldrei séð til þín að þú gerðir grín að viðmælendum þínum, hvorki á meðan á viðtali stóð né að því loknu.  Ég verð að viðurkenna að ég hef ekki litið Andra réttu auga eftir að hann átti viðtal við mann á elliheimili á suðurlandi og gerði hálfpartinn grín að trú hans á samskipti við framliðna.  Það atriði er ekki frekar efni í grín hjá þeim sem á það trúa, en Múhameð er gamanefni fyrir Múhameðstrúarfólk.  Að öðru leiti hefur Andri staðið sig nokkuð vel, t.d. við val á efni og meðhöndlun þess.  Eins og ég segi, vona ég að hann hafi lært af samstarfi við þig, hann er efni í góðan fjölmiðlamann og væri synd ef hann eyðileggur það með þeirri "sjálfsdýrkun" sem fjölmiðlafólki er stundum svolítið veikt fyrir.