Vaxandi markhópur fyrir betri vöru.

Víðast um lönd eykst kjaramunur á milli fátækra og ríkra. Það þýðir að markhópur fyrir dýrar vörur og lúxusvörur fer síst minnkandi.

Sú var tíð að Jagúar og Land Rover voru í flokki tossanna í breskum bílaiðnaði sem mátti muna sinn fífil fegri á níunda áratugnum eftir hnignun tvo áratugi á undan.

Range Rover og Jagúar bílarnir voru að vísu í megindráttum frábærlega hannaðir bílar á þeim tíma og Jagúar bauð miklu ódýrari bíla en sambærilegir bílar kostuðu hjá Benz og BMW.

Gamli Land Rover Defender jeppinn var reyndar sér á parti, í meginatriðum óbreyttur frá 1948 og í hópi ódýrra og einfaldra jeppa.

Þó var það áreiðanlega einsdæmi, sem ég kynntist í reynsluakstri á Land Rover í aldarlok, að bílstjórinn gæti á fullri ferð skoðað veginn undir bílnum í gegnum rifu við mót gólfs og hliðar !

En þótt Range Rover og Jagúar væru dásamlegir bílar á yfirborðinu og pappírnum, gerði munurinn á samsetningargæðum og viðhaldskostnaðimeira en að vega þetta upp og þegar Lexus og fleiri vandaðir japanskir bílar bættust við virtust Jagúar og Land Rover vera dauðans matur.

En björgunin kom til fimm bílaframleiðenda og bílategunda, sem voru að hruni komnir, Skoda, Mini, Jagúar, Land Rover og Rolls Royce með því að erlendir bílarisar keyptu þessi merki og stóðu fyrir algerri upprisu þessara bíla.

Nú blómstra þessir bílar allir enda hefur markhópur kaupenda reynst traustur og síst minnkandi.

Nýi Range Roverinn er snilldarlega hannaður og smíðaður bíll og setur ný viðmið í sínum flokki.

Metár hjá Jaguar Land Rover

Athugasemdir

[Ásgrímur Hartmannsson, 12.1.2014 kl. 21:22]

Jagúar & Land Rover voru aldrei neinir tossar á Bretlandseyjum. Samanborið við afganginn af hinum siðmenntaða heimi, þá voru þeir það hinsvegar. Það þurfti að leita til ítalíu, í smiðju Alfa Romeo til að finna eitthvað verra.

Aðrir bílar á Bretlandi voru alger hörmung, og eru enn. Þess vegna eru svo margir á Bretlandi akandi um á BMW.

Þeir geta sjálfum sér um kennt.

Defender jeppinn er mikið betur smíðaður nú en þá - en verðlagður ca 100% of hátt miðað við hverskyns trog hann er. Kostar 23K pund í Bretlandi, sem er allt of mikið. Til samanburðar er Hilux á 17.3K. Sem maður væri miklu frekar til í að borga, enda betri bíll. Eða L200, sem er jafnvel ódýrari.

Discovery jeppinn er svo bara framhald af gamla Range Rover jeppanum. Hefur svipaða aksturseiginleika.

[Ómar Ragnarsson, 12.1.2014 kl. 22:43]

Defender jeppinn er kannski verðlagður of hátt, en þess ber að geta að það kostar miklu meira vinnuafl að setja hann saman en nútímabíla, vegna þess að hann er settur saman með gamla laginu, án róbóta.

Trabant sýndist vera afar einfaldur bíll, en það kostað fáránlega mikla vinnu við að setja hann saman vegna þess hve samsetningin var gamaldags.