Kertasníkir íhugar alvarlega stöðu sína.

Bloggritari hefur í meira en hálfa öld verið í sérstöku vinasambandi við Gáttaþef og getur haft það eftir honum að Kertasníki bróður hans sé verulega brugðið eftir að hafa frétt af því að einn umsækjandanna um stöðu útvarpsstjóra sé í felum undir dulnefninu Enginn frekar en að láta það vitnast að hann sé númer þrettán.

Nú er nefnilega komið á gott netsamband við heimkynni jólasveinanna og þeir geta fylgst vel með netmiðlunum.

Og á mbl.is hefur fyrirsögn fréttarinnar um umsækjendurna komið Kertasníki úr jafnvægi, en hún er  svohljóðandi. "Enginn var númer þrettán."  

Öldum saman hefur Kertasníkir ekki haft áhyggjur af því þeirri stöðu sinni að vera hinn þrettándi í röðinni þegar hann kemur síðastur jólasveinanna til byggða fyrir jólin og hann hefur verið stoltur yfir að hafa númer þrettán á landsliðstreyju jólasveinalandsliðsins.

Nú íhugar hann hins vegar þá stöðu sína alvarlega.

Meðal annars hefur hann íhugað það að fyrir næstu jól komi hann ekki til byggða, heldur sendi Engan í staðinn.  

Með því muni staða hans skýrast þótt það kunni að verða álitamál að meta hvað í því felst ef börnin fagni Engum meira en Kertasníki.

En sjálfur verður Kertasníkir ekki í vafa um það að ekkert geti orðið honum til meiri framdráttar en það að börnin fagni Engum betur en honum.

Varðandi landsliðstreyju jólasveinanna með númerinu 13 á bakinu liggur nokkuð ljóst fyrir hvað mat Bjarni Felixson hefur lagt á getu Kertasníkis og myndi gera í þessu tilfelli með því að kveða upp sinn úrskurð: "Hann er betri en Enginn."

 

 

Fimm staðfesta umsóknir sínar

Athugasemdir

[Þorsteinn Briem, 13.1.2014 kl. 21:31]

Mannval vill nú mikið RÚV,
margur umsækjandinn,
á lista má sjá lítinn Stúf,
og líka er þar Fjandinn.

[Tryggvi Helgason, 13.1.2014 kl. 22:47]

Ég mæli eindregið með því að "Enginn", - númer 13, - verði ráðinn útvarpsstjóri. Þá þarf fólk ekki einu sinni að hafa fyrir því að kveikja útvarpinu eða sjónvarpinu, (sparar rafmagn), þar sem "Ekkert" aðstoðarmaður hans stýrir dagsskránni.

Kertasníkir verður svo bara að láta sér nægja að telja kertin.

[Þorsteinn Briem, 13.1.2014 kl. 22:52]

6.12.2013:

"Fréttastofa RÚV nýtur mest trausts samkvæmt nýrri könnun MMR. Af þeim fréttamiðlum sem kannaðir voru báru svarendur mest traust til fréttamiðla RÚV.

Af þeim sem tóku afstöðu sögðust 76,5% bera mikið traust til Fréttastofu RÚV og 71,1% sagðist bera mikið traust til ruv.is."

"Af þeim sem tóku afstöðu sögðust 50,2% bera mikið traust til mbl.is.

Traust til mbl.is hefur dregist nokkuð saman frá því í desember 2008 þegar 64% aðspurðra sögðust bera mikið traust til mbl.is."

RÚV nýtur mests trausts

[Þorsteinn Briem, 13.1.2014 kl. 22:54]

6.12.2013:

Bera lítið traust til Fréttastofu RÚV: 7,2%,

bera lítið traust til Ruv.is: 7,4%,

bera lítið traust til Mbl.is: 20,7%,

bera lítið traust til Morgunblaðsins: 26,1%.

RÚV nýtur mests trausts

[Már Elíson, 13.1.2014 kl. 23:21]

Þetta er gamalt, Stony, og þreytt, og hefur birst áður hjá þér. - Taktu þér taki á nýju ári og gerðu eitthvað af viti.

[Þorsteinn Briem, 13.1.2014 kl. 23:44]

Hefur aldrei hvarflað að þér að það sé gamalt og þreytt að agnúast sífellt út í það sem ég birti hér, Már Elíson?!

Ykkur vesalingunum hefur margoft verið bent á það af bæði mér og Ómari Ragnarssyni að þið þurfið ekki að lesa þær staðreyndir sem ég birti hér, enda þótt þær fari gríðarlega í taugarnar á ykkur.

Bráðum springið þið í loft upp af örvinglan og bræði, þannig að sviðakjammar, súrir hrútspungar og lundabaggar dreifast yfir heimsbyggðina.

[Örn Johnson ´43 (IP-tala skráð) 14.1.2014 kl. 13:02]

Sæll, Ómar. Ég skil ekki hvers vegna þú hefur enn ekki tekið upp baráttu gegn mestu mengunarsóðum þessa lands. Þeir hafa algjörlega frjálsar hendur til að stofna til mengunnar hvar og hvenær sem þeir vilja. T.d. í Reykjavík er rosalegu mengun vegna starfa þessara mengunarsóða, mengun sem menn eins og þú ættir að hafa forgöngu í að verði hætt. Þessir sóðar sitja við skrifborð og eru á góðum launum hjá borgarbúum. Væntanlega hafa þeir fína starfstitla, líklega skipulagsfræðingar. Þeirra hlutverk er að telja niður eða upp að fjórum. Það komast nefnilega fjórar mengunarhraðahindranir fyrir á venjulegum gatnamótum, stundum setja þeir "aðeins" þrjár á hverja þeirra en aldrei færri en tvær. Svo skella þeir niður ómældum fjölda á milli gatnamóta, margoft án nokkurrar sýnilegrar þarfar. Hver hraðahindrun krefst þess að dregið sé úr hraða og svo gefið í, með tilheyrandi auka mengun. Auk mengunar kostar svona akstur mun meiri bensíneyðslu. Hvar í heimi eru svona fyrirbrigði? Ég hef víða farið erlendis og hvergi séð svona fyrirbrigði. Ef á að tengja þetta við umferðaröryggi er nærtækast að spyrja hvort börn erlendis séu í útrýmingarhættu? Svo er auðvitað ekki.

Ómar, taktu upp baráttuna gegn þessari mengun og aukinni bensíneyðslu.