Þarf maður að fara aftur upp til að kveikja ljós?

Einkennilegt er ef mastrið á Gufuskálum er ljóslaust svo lengi sem sagt er. Það hefur áður verið farið upp í það til að aflétta ljósleysi þegar þess hefur orðið vart, og í minnsta kosti annað skiptið af þeim tveimur, sem ég hef farið alla leið upp, skiptum við Þorvarður Björgúlfsson, þá kvikmyndatökumaður Stöðvar 2 um peru í því.

Ef engir yngri bjóða sig fram til að gera þetta núna er samt ekki víst að ég fari þarna upp í þriðja sinn.

Þrennt veldur því. Í fyrsta lagi eru fréttamenn,  eins og ég tel mig enn vera, yfirleitt að leita að einhverju fréttnæmu og eftir tvær ferðir upp á topp mastursins er svona klifur hjá sama manninum ekki sama frétt og hinar tvær fréttirnar voru, önnur fyrir Stöð 2 og hin fyrir Sjónvarpið. Nema fréttin verði sú í þetta sinn að það þurfi mann á áttræðisaldri til að redda þessu.

Í öðru lagi verð ég eitthvað lengur þarna upp en fyrir um fimmtán árum því óvíst er hvernig  þrískorin hné ráða við svo mikið klifur og síðan að fara niður aftur, sem er miklu verra fyrir aum hné hjá stundum "sárhnjáðum" manni.

Og í þriðja lagi er kominn tími til að hleypa öðrum í þetta. Að vísu veit ég ekki hve margar ferðir menn hafa farið upp á topp mastursins en þær virðast ekki vera margar ef rétt er að mastrið hafi verið ljóslaust í heilt ár án þess að brugðist hafi verið við því.

Og varla verður brugðist við því ef umsækjandi um stöðu útvarpsstjóra númer 13, þ. e. "Enginn" verður ráðinn.

Í norsku fjörðunum eru settar veifur á línur eins og háspennulínur sem liggja þar yfir firðina á milli fjalla til að flugmenn sjái þær. Slíkar aðvörunarmerkingar mætti vel setja á línuna, sem liggur yfir Hvalfjörð við mynni Botnsvogs og hefði átt að vera búið að setja á línuna fyrir löngu.

412 metra hátt mastur ljóslaust

Athugasemdir

[Þorsteinn Briem, 14.1.2014 kl. 01:45]

Vigdís Hauksdóttir niðurskurðarfræðingur hefur mikinn áhuga á ljósaperum og hamstraði þær nýlega, þannig að ég geri fastlega ráð fyrir að hún verði send upp í mastrið til að skipta þar um Gufuperu.

[Bergur Þ. Jónsson (IP-tala skráð) 14.1.2014 kl. 15:25]

Hverjum get ég boðið að ég fari og skipti um peru endurgjaldslaust? (kaupi kannski ekki peru í þetta samt sjálfur) ;)

Mig hefur langað mjög mikið að fara þarna upp allt frá því að ég átti heima á Hellisandi fyrir um 30 árum. :)

Kv. Bergur Þ. Jónsson

[Einar (IP-tala skráð) 14.1.2014 kl. 15:39]

Það gengur fyrir að kaupa bensín á jeppa útvarpsstjóra

[Guðmundur Þórðarson (IP-tala skráð) 14.1.2014 kl. 18:59]

Ég skal fara ef einhver kaupir peru!

Kv Guðmundur

[Dagur Torfason (IP-tala skráð) 14.1.2014 kl. 21:53]

Hvaða skilirði þarf maður að uppfylla til að mega fara þarna upp?

[Jón Grétar (IP-tala skráð) 15.1.2014 kl. 00:38]

Ég er með mann sem er meira en tilbúin að gera þetta. Hafðu samband við mig og ég skal koma ykkur saman svo þú getir upplýst okkur hvernig við förum að.

Kv. Jón Grétar.

[e-mail]