Breyttar aðstæður í sölu bíla ?

Það kemur fram á tölum um sölu nýrra bíla á síðastliðinu ári að 40% af henni hafi verið til bílaleiga. Líklega er leitun að öðru landi þar sem slík hlutfallstala nýrra bílaleigubíla er nærri því svona há.  

Þetta er ein birtingarmynd þess hve ferðaþjónustan skilar víða fé inn í þjóðarbúið. Fyrir bílaumboðin er þetta fundið fé, en á hinn bóginn er það svo, að bílaleigurnar endurnýja flota sinn ört og þá koma mjög margir tiltölulega margir nýir bílar inn á markað notaðra bíla, oftast eknir talsvert mikið, en ungir samt.

Slíka bíla er oft hægt að fá keypta á mjög hagstæðu verði og þeir eru þar með orðnir skæðir keppinautar um hylli bílakaupenda, bæði keppinautar annarra notaðra bíla, en nýrra bíla.

Sá, sem kaupir notaðan bílaleigubíl tekur að vísu dálitla áhættu varðandi meðferðina á viðkomandi bíl, en það þarf svo sem ekki að vera neitt verri meðferð en hjá venjulegum eiganda, jafnvel betri.

Skriða tilboða með vaxtalaus lán sýnir harðnandi baráttu bílaumboðanna. Eitt þeirra hefur farið þá leið til að laða að kaupendur að lækka verð bíla sinna um 7% og telur sig hafa efni á því af því að gengi krónunnar hafi styrkst.

Það vekur athygli að hjá sumum bílaumboðanna hafa einstakar bílategundir, sem boðnar eru með vaxtalausum lánum, hækkað í verði þrátt fyrir hagstæðara gengi krónunnar.

Sá böggull virðist fylgja skammrifi oft á tíðum að ýmis konar afsláttarkjör eða kaupbætir er ekki í boði ef tekin eru vaxtalaus lán.

Þess vegna þurfa kaupendur að gefa sér tíma til að skoða vel, hvað sé raunverulega í boði.

Samdráttur um 5,6% í bílasölu

Athugasemdir

[Haukur Kristinsson (IP-tala skráð) 14.1.2014 kl. 11:18]

"Nýtt umhverfi......."

Þetta finnst mér ílla orðið hjá manni, sem skrifar góða texta.

[Ómar Ragnarsson, 14.1.2014 kl. 20:37]

Takk fyrir. Prófa að breyta þessu.

[Ómar Ragnarsson, 14.1.2014 kl. 20:39]

Búnn að breyta þess í "Breyttar aðstæður í sölu bíla."

[Samúel Sigurjónsson (IP-tala skráð) 14.1.2014 kl. 22:52]

Sæll Ómar, Þú gleymir því að bílaleigur fá niðurfelld innflutningsgjöld af bílum. Eftir sex mánuði geta þær sett 25% af bílunum á almennan markað og selt þá þar á fullu markaðsverði, án þess að greiða nokkur gjöld af þeim og hirða mismuninn sem er tugir prósenta af hverjum bíl. Það er staðreynd að bílaleigur og bílasalar spila grimmt á þessa glufu í kerfinu. Staðreyndin er að fluttir eru inn mun fleiri bílar sem bílaleigubílar en raunveruleg þörf er á, til að hagnast á þeim á ofurskattlögðum almennum markaði

[Huckabee, 15.1.2014 kl. 00:43]

SJS inleiddi þetta austur evrópska kerfi almenningur borgar sem aldrei fyrr

ÓGR var óska fjármálaráðherra heildsala í den

Bílaframleiðendur hafa dregið úr afslætti til bílaleigu fyrirtækja vegna þessara áhrifa á almenna markaðin