Mamma og jafnframt amma útskrifaðist með syninum.

Þegar lesin er heilmikil frétt um það að Jade Jagger yrði mamma og amma á sama tíma vaknar spurningin um það hversu óvenjulegt þetta sé.

Fróðlegt væri ef skoðuð væru gögn um meðalaldur brúðhjóna nú og fyrir hálfri öld og meðalaldur mæðra frumburða. Ég gæti ímyndað mér að munurinn væri að minnst fimm ár, en jafnvel meiri.

Sé þetta svona, er það að öðru jöfnu fátíðara nú en áður að konur verði ömmur og mömmur á sama tíma, en þetta var býsna algengt fyrir hálfri öld.

Sem dæmi um það hve þetta var ólíkt hér áður fyrr er það, að langamma mín var 16 ára þegar hún átti afa og að þeir Edvard og Jón, bræður mínir, hófu sambúð með konum sínum 16 ára gamlir.

Sama árið og Edvard, þá 16 ára, varð pabbi, hóf mamma hans nám og var í bekk með honum í Kennaraskólanum. Hún átti síðan Sigurlaugu í lok skólanámsins og þegar hún útskrifaðist eins og sonur hennar var hún amma fjögurra barna á sama tíma og hún varð mamma í sjötta sinn.

Ruglingslegt? Já, að minnsta kosti fyrir Sigurlaugu, sem heyrði jafnaldra sína í barnahópnum kalla föður sinn afa og var ekki alltaf viss um það á tímabili hvað hún ætti að kalla hann.   

 

Verður amma og mamma á sama tíma

Athugasemdir

[Þorsteinn Briem, 12.2.2014 kl. 20:18]

Ég er afi minn - Laddi

[Þorsteinn Briem, 12.2.2014 kl. 21:19]

Á árunum 1961-1965 var meðalaldur brúðguma hér á Íslandi 27,4 ár (áður ókvæntra 26,2 ár) en brúða 24,4 ár (áður ógiftra 23,5 ár).

Árið 2005 var hins vegar meðalaldur brúðguma hér á Íslandi 36,6 ár (áður ókvæntra 33,7 ár) en brúða 33,8 ár (áður ógiftra 31,3 ár).

(Ármann Snævarr, Hjúskapar- og sambúðarréttur, útg. 2008, bls.169.)

[Þorsteinn Briem, 12.2.2014 kl. 22:19]

Á árunum 1961-1965 var meðalaldur mæðra frumburðar hér á Íslandi 21,7 ár, samkvæmt Hagstofu Íslands.

Árið 2012 var hins vegar meðalaldur mæðra frumburðar hérlendis 26,9 ár en feðra 29,7 ár.

Mæður frumburða voru því að meðaltali 5,2 árum eldri árið 2012 en á árunum 1961-1965.

Og áður ógiftar brúðir hér á Íslandi voru að meðaltali 7,8 árum eldri árið 2005 en á árunum 1961-1965 og áður ókvæntir brúðgumar að meðaltali 7,5 árum eldri.

[Ómar Ragnarsson, 12.2.2014 kl. 23:17]

Takk, Steini. Ég giskaði bara á þetta og það lá nokkuð nærri. Mismunurinn á aldri samsvarar nokkurn veginn lengd háskólanáms.