Tvöfaldur vítahringur.

Hinn svokallaði vítahringur varðandi samdrátt í innanlandsflugi er öðrum þræði vegna þess að þegar fólk ákveður hvaða ferðamáta það vill nota, eru það of oft skammtímafjárráð sem ráða úrslitum, hvernig það komist með sem minnstum útlögðum kostnaði viðkomandi ferð.

Þá verður niðurstaðan oft einkabíllinn, einkum ef hann er sæmilega sparneytinn og sé leiðin Reykjavík- Akureyri tekin sem dæmi, lítur oft á þá staðreynd að eldsneytiskostnaðurinn á honum einn og sér er kannski um 10 þúsund krónur fram og því finnst það hafa sparað hátt í helming ferðakostnaðarins miðað við flugfarmiða fram og til baka.

Þetta er alröng nálgun til lengri tíma litið, því að hlaupandi kostnaður vegna aksturs bíls tvöfaldast þegar slit á bílnum, hjólbörðum hans og öðru viðhaldi, sem fylgir akstrinum beint, er tekinn með í reikninginn. Hvað þá ef áhrif aukins aksturs á endursöluverð er reiknað með og föstum kostnaði deilt niður á ekna kílómetra.  

En ferðadaginn lítur fólk oft á þau útgjöld sem eitthvað sem fellur til í framtíðinni og hugsar eins og Danskurinn: Den tid, den sorg.

Stundum er það einfaldlega svo að það eru ekki til peningar fyrir flugfargjaldinu í augnablikinu og sannast þá spakmælið að það er dýrt að vera fátækur.

Þegar svona fer, reiknar fólk sér ekkert kaup þótt aksturinn taki aukalegan tíma sem samsvarar heilum vinnudegi miðað við tímann sem það tekur að fara flugleiðis og tekur heldur ekki með í reikninginn útgjöld vegna fæðiskaupa í ferðinni.

Þurfi fólkið síðan að gera þetta oft er það komið inn í vítahring þar sem of há útgjöld vegna eignar og reksturs bíls draga úr möguleikum þess til að spara þegar það er hægt með því að fljúga.

Niðurstaðan er sú að það kann að vera þjóðhagslega hagkvæmt að lækka flugfargjöldin innanlands.   

Innanlandsflugið orðinn munaður

Athugasemdir

[stefan benediktsson (IP-tala skráð) 20.2.2014 kl. 16:00]

Auðvitað skiptir líka máli að ferðir til Akureyrar eru oftar en ekki fjölskylduferðir, hjá venjulegu fólki. Þá dreifist aksturskostnaðurinn á 3-6 eftir fjölskyldustærð. Ef einkabílskostnaðurinn er 1 milljón á ári og Akureyrarferðin 1000 km, ársakstur 15000 km, er Akureyrarferðin 1/15 af árskostnaðinum eða um 67000 krónur. 4 manna flug fram og til baka slagar upp í það og þá eigum við eftir að ferðast td upp í Hlíðarfjall.

[E (IP-tala skráð) 20.2.2014 kl. 16:46]

Stefán, það vill svo til að Akureyringar þurfa - því miður - oft að fara í borg óttans, þótt það sé auðvitað skiljanlegt að fólk af því svæði langi til að komast í náttúrfegurð og friðsæld Akureyrar, fegursta bæjar á norðurhveli. En til viðbótar við það sem þarna greinir, þá þurfa Akureyringar, þegar þeir fara suður, eftir að komast milli staða í Rvík og það er yfirleitt ekki gengið eða farið með strætó þótt alls góðs maklegir séu, með allan þann farangur sem fylgir manni í slíkri ferð og það kostar umstang og fjármuni.

[Jóhann F. Kristjánsson (IP-tala skráð) 20.2.2014 kl. 19:55]

Svo furðulega vill til að almenningssamgöngur ná ekki til Akureyrarflugvallar.

Til viðbótar við himinhátt fargjaldið þá er leigubíll eini kosturinn ef veður er vont.

Ef einhver alvara væri í því að gera flug hagstæðara þá gengi strætó á flugvöllinn á Akureyri, fleiri leiðir strætó í Vatnsmýri og eða ókeypis skutla á milli BSÍ og flugvallar.

Hótel mættu einnig bjóða ódýrar skutlur líkt og tíðkast víðast erlendis.

Kostnaður á báðum endum er annars samtals 3-4000 krónur.

Skipulag almenningssamgangna er samspil margra þátta.

Ef hlekki vantar í keðjuna velja menn einkabílinn.

[Sigurður Sunnanvindur (IP-tala skráð) 21.2.2014 kl. 00:44]

Það tekur 45 mín að fljúga Rek-Ak.

Það tekur mig amk 15 mín að keyra á völlinn og leggja bílnum.

Mæting er 30 mín fyrir brottför, -segjum 20 mín.

Á Akureyri tekur 10-15 mín að bíða eftir farangri og keyra ínn í bæinn.

Samtals eru þetta tæpir 2 tímar.

Yfirleytt ek ég þessa leið á 4 klst sléttum, -án þess að stoppa og brenni til þess 30-32 lítrum af bensíni hef fullan aðgang að bílnum á leiðarenda og er lítið takmarkaður með farangur.

Það er fullkomlega eðlilegt að vægi flugsins minki með betri vegum og betri bílum.

Þjóðveg 1 þarf nauðsynlega að færa burt frá Borgarnesi, Blönduós og Varmahlíð. -en slíkt fækkar flugferðum enn frekar.

[Huckabee, 21.2.2014 kl. 01:49]

Þrátt fyrir allt fljúga fáir eins mikið og íslendingar.

langar raðir öryggis skoðanair ferðir til og frá flugvelli gera þennan góða farskjóta óheppilegan ef annað er í boði.

Það hefur áhrif á fasteignaverð(lífsgæði) hversu góðar samgöngur eru í boði.

Sjá Grænland Ísland sem glöggt dæmi um áhrif góðra samgangna ?

Niðurlagning Reykjavíkur flugvallar hjálpar ekki að gera ísland sem byggilegst.

[Þorsteinn Briem, 21.2.2014 kl. 04:26]

Reykjavíkurborg leggur ekki til að Reykjavíkurflugvöllur verði lagður niður.