Styst til Evrópu og styttra til Skaftafells og Egilsstaða.

Hornafjarðarflugvöllur liggur nær Evrópu en nokkur annar íslenskur flugvöllur.

Bein flugleið frá Reykjavík til Færeyja er 750 kílómetrar en aðeins 475 kílómetrar frá Hornafirði og svipað gildir um aðrar flugleiðir til landsins frá Evrópu. Það er á bilinu 150-200 kílómetrum styttra að fljúga þaðan til Hornafjarðar en til Keflavíkur, og leiðin að Vatnajökli er 340 kílómetrum styttri frá Hornafirði en frá Keflavíkurflugvelli.  .

Braut Hornafjarðarflugvallar er 1500 metra löng og auðvelt að lengja hana upp í 1850 metra, sem er sama brautarlengd og á Egilsstaðaflugvelli. Ágætt væri að breikka jafnframt brautina úr 30 metrum upp í 45 metra eins og er á Egilsstöðum og þá gæti flugvöllurinn nýst fyrir farþegaþotur á borð við þær sem íslensku flugfélögin nota til millilandsflugs.

Ef hætt hefði verið við hin stórfelldu spjöll á einstæðum náttúruverðmætum, sem framin hafa verið við norðaustanverðan Vatnajökuls hefði verið hægt að skapa þar stórkostlegt ferðamannasvæði, einkum í kringum hin mögnuðu sköpunarverk Brúarjökuls sem hafa að mestu verið eyðilögð um aldur og ævi.

Egilsstaðaflugvöllur hefði getað gengt þar mikilvægu hlutverki eins og til dæmis flugvöllurinn í Rovanieami í Lapplandshluta Finnlands gegnir fyrir ferðaþjónustu í Finnlandi.   

Það var ekki gert og þess vegna liggur það vel við út því sem komið er að nýta flugvöllinn á Hornafirði, sem liggur svo stutt frá Vatnajökli og Vatnajökulsþjóðgarði.  

Er það því hið besta mál að lagt hafi verið fram frumvarp á Alþingi um að sá kostur verði athugaður af alvöru.

Nú kunna einhverjir að segja að með því að erlendir ferðamenn sleppi við að ferðast fram og til baka milli Keflavíkurflugvvallar og Skaftafells og fái tækifæri til þess að lenda alveg við jaðar Vatnajökulsþjóðgarðs, séum við að minnka tekjur af þeim vegna þess að þeir ferðist hugsanlega minna fyrir bragðið.

Ef aðrar þjóðir væru á svipaðri skoðun væru þær ekki með millilandaflugvelli í neinum borgum nema höfuðborgunum til þess að þvinga ferðamenn til þess að ferðast sem lengsta leið til vinsælustu ferðamannastaðanna.

Það gera þær auðvitað ekki því að ferðamannfjöldinn verður því meiri sem boðið er upp á fleiri möguleika til ferða.

Frá Hornafirði liggja góðar ferðaleiðir til beggja átta. Aðeins 130 kílómetrar eru þaðan til Skaftafells í stað 370 frá Keflavík ( 240 km styttra), - og 185 kílómetrar til Egilsstaða um Öxi, 246 um Fjarðaleiðina í stað 722 frá Reykjavík (685 um Öxi), - 400 kílómetrum styttra)   

Verði nýttur sem millilandaflugvöllur

Athugasemdir

[Haukur Kristinsson (IP-tala skráð) 20.2.2014 kl. 22:35]

Átta mig ekki alveg á umræðunni. Var ekki nýlega verið að tala um að lengingu brautar Egilsstaðaflugvallar (EGS). Og nú skal gera slíkt hið sama við Hornafjarðarflugvöll (HFN).

Jú, HFN liggur nær Evrópu en EGS, en munurinn er sára lítill, ef ég man rétt, aðeins 10 - 20 NM. Þegar ég var að fljúga á einshreyfilsvélum frá Sviss via New Castle til Íslands, lenti ég oftast í Hornafirði, en hafði Egilsstaði sem varaflugvöll. Og eins og ég sagði, munurinn er lítill.

Auðvitað væri flott að hafa "airport of entry" víða, t.d. á Húsavík, en það kostar sitt.

[Jón Logi (IP-tala skráð) 21.2.2014 kl. 16:48]

Egilsstaðir hafa þjónað millilandaflugi smá tíma (LTU), en braut í styttra lagi. En skemmtilegur staður að byrja á.
Hornafjörður býður líklegast upp á mun meiri möguleika með braut/brautir.
Báðir eiga erindi í þetta, og reyndar Aðaldalur líka!
Hvað voru farþegar margir þegar Leiffstöð var byggð?