"Túrbínutrixið" í fullum gangi.

2007 voru hafnar framkvæmdir við álver í Helguvík með undirskrift samkomulags við þrjá aðila að minnst tólf, sem málið varðar, en þá eru ekki teknir með í reikninginn allir landeigendur og aðrir, sem málið mun varða beint og óbeint.

Þetta var sama aðferð og nota átti við að koma svonefndri Gljúfurversvirkjun á koppinn með því að kaupa svo stórar túrbínur í Laxárvirkjun að öllum aðilum, sem málið myndi snerta síðar, til dæmis landeigendum í Laxárdal, sem til stóð að sökkva, yrði stillt upp við vegg og lýst yfir ábyrgð á hendur þeim ef þeir ætluðu að mögla og eyðileggja þá fjármuni, sem búið væri að eyða í túrbínur og annan undirbúningskostnað.

Sigurður Gizurarson, snjall lögfræðingu andófsmanna, sneri þessu við í sínum málflutningi með þeim rökum, að með þessari siðlausu ákvörðun hefðu virkjanaforkólfarnir tekið áhættu, sem þeir ættu sjálfir að borga, ekki þeir sem siðleysið beindist gegn.

Uppi í erminni var eignarnám rétt eins og nú á að beita á Suðurnesjum.

Munurinn er sá, að 1970 þurfti dínamit til þess að stöðva hinar ofboðslegu náttúrufórnir, sem menn hefðu annars verið tilbúnir til að standa að.

Það er dapurlegt og sýnir, að okkur virðist ekki hafa miðað hænufet áfram á þeim 43 árum, sem liðin eru frá Laxárdeilunni, hvað varðar siðlausa framkomu gagnvart landi, þjóð og komandi kynslóðum í því sem Nóbelskáldið kallaði réttilega "hernaðinn gegn landinu" það merkisár 1970.

Túrbínutrixið virkaði í álversmálununum fyrir austan, þar sem fyrst var látið í veðri vaka að álverið yrði aðeins 120 þúsund tonn, en það síðan þrefaldað þegar búið var að stilla mönnum upp við vegg og valta yfir þá, og nú síðast virkaði það í Gálgahrauni þar sem blekkingum og ofríki var beitt til að þvinga fram vilja valdsins.  

Þeir sem keyra þessa stefnu áfram gera það sallarólegir vitandi það, að það þarf ekki annað til að valta yfir allt og alla en að sýna yfirburði valdsins í formi 60 lögreglumanna í skotheldum vestum með kylfur og handjárn sem loka umferð út í heilt bæjarfélag og beita stærsta skriðbeltatæki landsins gegn 25 persónum, - hreyfingarlausu og áhaldalausu fólki, sem fært er í fangelsi, en síðan eru níu teknir útúr og fá á sig ákæru með kröfu um að verða sett á sakaskrá og taka út refsingu.

13-15 þúsund manna mótmælaganga 2006 og 5 þúsund manna útifundur 1. maí 2013 hagga ekki við "hinum ósnertanlegu" frekar en að stökkva vatni á gæs.

Þvert á móti herða þeir hernaðinnn gegn landinu sem aldrei fyrr.

  

Heimilt að taka jarðir eignarnámi

Athugasemdir

[Predikarinn - Cacoethes scribendi , 27.2.2014 kl. 03:49]

Sammála þér Ómar !

Um áratugi hafa allar ríkisstjórnir tekið hagsmuni þeirra sem reisa raforkulínur fram yfir lögvarin þinglýst eignarrðéttindi jarðnæðis og fengið slíka skika á „slikk” þegar eignaarnámsbætur voru ákvarðaðar.

Þessi háttsemi á að heyra liðinni tíð. Alltaf á að vera á endanum að vera hægt að meta eignir jarðeiganda til fjár og einnig hvers virði landnæðið sem óskað er eftir er þeim sem leggja línurnar.

Nú svo kann að vera að jarðeigandinn vilji alls ekki selja af landi sínu þá verða línumenn að fara aðrar leiðir sem eru falar fyrir eitthvert fé.

Ég krefst þess að stjórnvöld hætti þessu ofríki og láti menn um að semja sín á milli.

[Þorsteinn Briem, 27.2.2014 kl. 08:49]

Landsvirkjun tapaði 4,4 milljörðum króna árið 2013 vegna lækkandi álverðs

[Þorsteinn Briem, 27.2.2014 kl. 08:53]

26.2.2014 (í gær):

"Fram til ársins 2018 eru afborganir Landsvirkjunar á erlendum lánum áætlaðar um 128 milljarðar króna.

Langstærstur hluti af handbæru fé fyrirtækisins frá rekstri mun því líkt og síðustu ár fara í að standa skil á afborgunum erlendra skulda."

Áhersla lögð á að lækka miklar erlendar skuldir Landsvirkjunar næstu árin

[Ómar Ragnarsson, 27.2.2014 kl. 11:48]

Hugsunin á bak við slagorðið "orkufrekur iðnaður" er magn frekar en gæði, magn frekar en raunverulegur arður. Slík hugsun getur endað með því ástandi að því meiri sem salan er, því meira verði tapið.

[Predikarinn - Cacoethes scribendi , 27.2.2014 kl. 13:04]

Dr. Sigurður Jóhannesson Zoëga hagfræðingur hjá Hagfræðistofnun H. Í. skrifaði um það í upphafi ásamt fleirum sérfróðum mönnum að miðað við orkuverð sem fyrirhugað var þegar ráðist var í gerð Kárahnjúkavirkjunar að sú virkjun myndi aldrei borga sig nema hún yrði niðurgreidd af almennum orkunotendum/skattgreiðendum - sem hefur enimitt komið á daginn.

[Sigurður Sunnanvindur (IP-tala skráð) 28.2.2014 kl. 20:06]

https://www.facebook.com/photo.php?fbid=472839019509046&set=a.329106290548987.1073741827.303274063132210&type=1&theater

[kristinn geir steindórsson briem (IP-tala skráð) 28.2.2014 kl. 22:35]

skil ekki rök ráðherrans með þessa línu. ef það er rétt að hluti línunar liggi um vatnsverndarsvæðier áhvörðuninn en dularfylldri. kanski er eina ástæðan sú að með þessari legu níta þeir gamla línuveiginn. en þá þurfa þeir að borga fult verð fyrir landið. þekki það af eigin reinslu hvernig landsvirkjun vinnur bíst ekki við að landsnet sé skára