Íslands þúsund ár

5.3.2014 | 11:39

Það þarf sterk bein til að þola góða daga.

Ofangreint máltæki má orða á ýmsa vegu. Eitt afbrigðið er að allt vald spilli og mikið vald gerspilli.

Sama meirihlutavaldið hefur verið við lýði í Garðabæ frá upphafi bæjarfélagsins og hvað varanleika snertir er langlífi þess Íslandsmet.

Langt fram eftir síðustu öld gilti svipað um meirihlutana í Reykjavík, á Ólafsfirði og í Neskaupstað, en síðan varð sú saga öll.

En Garðabæjarmeirihlutinn hefur átt einstakan feril og því yrðu það mikil tíðindi ef hann félli í kosningunum í vor.

Ein hættan, sem vofir yfir svo langvarandi völdum, er sú að jafnvel þótt valdhafarnir leggi sig fram um að fara vel með vald sitt myndist smám saman í áratuganna rás sú staða, að valdið fer að fá á sig guðlegan blæ, það er, að aftur og aftur komi í ljós að ekkert virðist geta haggað því að valdhafarnir fari sínu fram að geðþótta.

Þegar ég fór að kafa ofan í vinnubrögðin varðandi lagningu Álftanesvegar varð ég fyrir ákveðnu áfalli.

Mér, eins og öllum öðrum, hafði verið talin trú um að núverandi Álftanesvegur væri hættulegasti vegarkafli á höfuðborgarsvæðinu og að umferðin um hann væri meiri en vegurinn þyldi.

Greinilega hefur þetta haft áhrif á þá ákvörðun fjárveitingavaldsins að veita fé til gerðar nýs Álftanesvegar á sama tíma og ákveðið var að veita ekki krónu til neinna vegabóta í Reykjavík í næstu 10 ár.

Þegar farið var ofan í staðreyndir og tölur kom allt annað í ljós. Innan borgarmarka Reykjavíkur voru margir sambærilegir vegarkaflar með miklu hærri slysatíðni og margfalt meiri umferð en Álftanesvegur.

21 sambærilegur vegarkafli á höfuðborgarsvæðinu var með meiri slysatíðni á hverja ekna milljón kílómetra síðustu fimm ár, sem tölur liggja fyrir um, en Álftanesvegur, - og rúmlega 6000 bíla umferð á dag var langt fyrir neðan þau viðmiðunarmörk, sem sett eru um breikkun hliðstæðra vega, en þau hljóða upp á það að þegar umferðin fari yfir 15000 bíla þurfi að breikka viðkomandi veg upp í 2+1 veg.

Þegar hugsað er um það að bæjarstjórnarmeirihlutinn í Garðabæ skyldi komast upp með það að villa svona mikið um fyrir svona mörgum fer mann að gruna að slíkt gerist aðeins þegar menn eru orðnir því vanir um áratuga skeið að fá því framgengt sem þeir vilja.

Þeir töldu sig til dæmis greinilega geta ráðið því að vild hvort haldið yrði prófkjör innan meirihlutaflokkskins eða ekki og höfðu greinilega litlar áhyggjur af því hvaða aðferði yrði notuð til að raða á framboðslistann.

Nú virðist annað vera að koma í ljós.

Ég þekki svosem ekki til innviða bæjarstjórnmála og málefna og manna í hinum ýmsu framboðum í Garðabæ.

En aðeins það að í skoðankönnun skuli grónasti og langlífasti bæjarstjórnarmeirihluti í sögu Íslands vera fallinn segir manni að "there is something rotten in the city of Garðabær."

Að minnsta kosti bendir það til þess að máltækið að það þurfi sterk bein til að þola góða daga sé í fullu gildi, jafnt í Garðabæ sem annars staðar.

	„Meirihlutinn í Garðabæ fallinn“
Ábyrgðarmaður færslu Tilkynna um óviðeigandi tengingu við frétt

Flokkur: Bloggar | Breytt s.d. kl. 11:48 | Facebook

Athugasemdir

Sæll Ómar.

Til að leiðrétta misskilning - hér er engin skoðanakönnun í spilinu. Hér er um að ræða tilvitnun í Pál Hilmarsson fráfarandi bæjarfulltrúa sem fékk ekki þann framgang sem hann helst hefði viljað á lista uppstillingarnefndar.

Torfi Geir (IP-tala skráð) 5.3.2014 kl. 11:56

Vald spillir manninum og því meira vald sem einstaklingi er gefið yfir öðrum, því verri verður misnotkunin. Ekki síst hjá sjallabjálfum á skerinu.

Ættum við þó að þekkja, eða hvað? Eru innbyggjarar búnir að gleyma afglapanum Dabba og Hruninu?

Haukur Kristinsson (IP-tala skráð) 5.3.2014 kl. 15:43

Í fréttinni sem bloggpistillinn er tengdur við, Torfi Geir, eru sýndar niðurstöður nýrrar skoðanakönnunar í Garðabæ, þar sem núverandi meirihluti fær aðeins 37,7%.

"Hér er engin skoðanakönnun með í spilinu" segir þú.

Jæja? Þessi skoðankönnun er kynnt á mbl.is með: "Meirihlutinn í Garðabæ er fallinn".

Ómar Ragnarsson, 5.3.2014 kl. 18:10

Ómar, þessi skoðanakönnun á við um Hafnarfjörð sem kemur upp þegar fréttin er skoðuð. Það er hægt að fletta niður á skoðanakönnun um Garðabæ, sem segir 57% fylgi D-lista. Þessi nýjasta uppákoma kann að skerða það niður fyrir 50%.

Hvumpinn, 5.3.2014 kl. 18:41