Þekktur bíll, "Skuggi", genginn aftur ?

Þekkt er sagan um Kristínu (Christine), Plymouth 58, sem gekk aftur, ók mannlaus og gerði heilmikinn usla. Í morgun fékk ég óvenjulega upphringingu lögreglunnar, sem minnir á þessa mögnuðu sögu, ekki hvað síst vegna þess að hin nýja sögupersóna ber hið skuggalega heiti, "Skuggi".

Málavextir eru þessir: Klukkan þrjú síðastliðinn föstudag varð það harður árekstur á Sæbrautinni að lögregla var kölluð til. Vitni bar að bláleitur Suzuki Samurai með númerinu KF-416 hefði valdið árekstrinum.

Svona jeppar eru orðnir afar fátíðir og ætti því að vera auðvelt að hafa upp á Suzuki Samurai með númerinu KF-416 og eiganda hans.

Lögreglufulltrúi, sem hefur svona flott gögn í höndum, hlýtur að vera ánægður með það. 

Að minnsta kosti myndi ég vera það í sporum hans.   

"Ertu með pappír upp á það?" var spurt í sögu Laxness. Hér á eftir verða atriði, sem skjalfest pappírsgögn eru yfir, skáletruð. 

Þannig vill til að ég er eigandi Suzuki Samurai árgerð 1986 sem hefur fastanúmerið KF-416 og berast böndin því heldur betur að mér og þessum jeppa. Óvenju rakið mál, afar fágætur bíll og eigandinn þekktur.

Umræddur smájeppi varð reyndar þekktur á sínum tíma fyrir það að í stórri grein í tímaritinu National Geographic var sagt frá því að hann hefði árum saman verið farartæki mitt og gististaður víða um land,  einkum á norðausturhálendinu, á öllum árstímum.

Ég byrjaði að nefna hann nafninu "Skuggi" fyrir nokkrum árum.

Við leit að myndum af Skugga finn ég bara þrjár, sem voru teknar í 15 stiga frosti af honum sem gististað við svonefndar Lindur, heitar laugar, sem sökkt var í Hálslón.

Þessar myndir vekja upp góðar minningar frá samskiptum okkar Skugga, sem hófstu fyrst árið 2002, þegar ég keypti hann fyrir 80 þúsund kall. Sagði frá honum í bloggpistli 17. desember 2009, sem bar heitið: "Skuggi", nútíma Ford T."

Hvað um það, öll rök hnigu að því að ég hefði verið á þessum bíl á Sæbrautinni klukkan þrjú á föstudaginn, valdið þar árekstri, en stungið af.

En ég lenti strax í vandræðum í morgun með að staðfesta þetta við lögregluna með óyggjandi gögnum og játa.

Og ég ætti raunar afar erfitt með það vegna þess að ég er það þekktur, að erfitt er fyrir mig að fara huldu höfði og því fullt af vitnum sem sáu mig allt annars staðar á meintum afbrotstíma.

Ég var nefnilega í Hafnarfirði klukkan þrjú á föstudag að sinna nokkrum erindum þar.

Hafði verið á pústverkstæðinu BJB um klukkan tvö á bíl mínum, rauðum Daihatsu Cuore árgerð 1988 með númerinu A-467 og var sagt að koma aftur klukkan þrjú.

Hringdi í konu mína og sagðist myndu sinna erindum í Hafnarfirði fram eftir degi, fór í Landsbankaútibúið og átti þar viðskipti og fékk kvittun um þau.  

Keypti eina pylsu fyrir utan, ók í geymslusvæðið í Hafnarfirði og síðan þaðan til baka og kom í afgreiðslu BJB klukkan nákvæmlega þrjár mínútur yfir þrjú. Man það vel, af því að ég var þremur mínútum of seinn.

Og allan tímann var ég á litla Cuore fornbílnum, sem er sá eini gangfæri af þessari gerð hérna megin á landinu (annar er á Akureyri) og gerólíkur Suzuki Samurai.  

Ég hringdi í Geymslusvæðið og bað vin minn þar um að taka til sín litla ljósmyndatösku, sem ég hafði gleymt þar.

Dvaldi í húsakynnum BJB fram yfir klukkan fimm og tók þar meðal annars myndir af Suzuki Coolcar, sem ég birti um kvöldið á blogginu.

En hvað um bláleitan Suzuki Samurai árgerð 1986 með númerinu KF-416?  

Jú, þannig vill til að stutt er siðan ég gætti að þessum bíl mínum þegar ég var á ferð á Selfossi. Hann er reyndar kolsvartur með gulleitum brettaköntum en ekki bláleitur. Skráður svartur í gögnum og einmitt núna var ég að finna mynd af honum, tekna á Egilsstöðum árið 2007.   

Fyrir nokkrum árum fór ég á Selfoss  til fyrirlesturs á klúbbi einum á þessum bíl, en það kviknaði í greyinu í Ölfusinu á bakaleið, rafleiðslur og kúplingsbarki brunnu, konan mín sótti mig þangað úr Reykjavík, og ég skildi bílinn eftir. 

Vinur minn eystra tók að sér daginn eftir að fara með bílinn að verkstæði á Selfossi og númerin á honum voru lögð inn, en ekki man ég hvort ég gerði það í Reykjavík eða vinur minn eða ég gerði það á Selfossi. Bíllinn var tekinn úr tryggingu.

Það langt er síðan að búið ætti að vera að farga númerunum.  

Skuggi hefur síðan verið á sama stað á Selfossi í öll þessi ár að því er ég best veit. Fljótlega voru hjólin tekin af honum og stendur hann í því ástandi þar enn,hjólalaus. Ég hef fylgst reglulega með honum og einnig þeir, sem vinna þar hjá.

Stutt er síðan ég leit síðast á hann.

Nú er spurningin þessi:

Úr því að þessi fágæti bíll olli árekstri á Sæbraut síðastliðinn föstudag, hvernig komust hjólin undir hann, hvernig komust númerin á hann, hvaðan komu þau númer, hver ók honum til Reykjavíkur og olli usla á Sæbrautinni ?

Þegar ég lagði bílnum voru allir gírarnir ónýtir nema fjórði gír. Ég ók honum af stað í fjórða gír í lága drifinu og skipti síðan með tvíkúplingu yfir í háa drifið og notaði þessi tvö hraðastig, "high and low" eins og gert var á gamla Ford.  Þeir eru orðnir býsna fáir, þessir af gamla skólanum, sem gætu ekið þessum bíl. Hver skyldi hafa getað gert það?

Var bíllinn sprautaður með nýjum lit? Var gert við kúplingsbarkann, rafleiðslurnar og gírkassann?

Ég á reyndar rauðan ökufæran Suzuki Fox árgerð 1986 með núminu IB 327, sem hefur staðið kyrrstæður á stæði fyrir utan Fróðengi 7 síðustu vikur. Erfitt er að flækja honum inn í áreksturinn á Sæbrautinni.    

Ég átti ljósbláan Fox fyrir 12 árum sem ég seldi og hef ekki séð síðan.

Þess má geta að "Læðan" í þáttunum "Næturvaktin" er af þessari gerð, er blá að lit, þannig að vitni gæti hafa látið lit þess þekkta bíls villa um fyrir sér og sýnst hann vera bláleitur þótt liturinn hafi verið annað.

Nú er spurningin: Er svarti Suzuki Samuraiinn "Skuggi" genginn aftur eins og Christine og byrjaður að haga sér eins og hún? Langar hann til að komast aftur á síður National Geographic?   

Ég bíð spenntur eftir svarinu. Kannski einhver lumi á gagnlegum upplýsingum.  

 

Nýrri bíla og hærra skilagjald

Athugasemdir

[Þorsteinn Briem, 7.4.2014 kl. 15:22]

Gæti best trúað að þetta skuggalega mál, flugvélarhvarfið dularfulla og Geirfinnsmálið leysist á einu bretti.

[TJ (IP-tala skráð) 7.4.2014 kl. 19:25]

Lenti eitt sinn í svipuðu; fékk upphringingu frá lögreglu og var spurður hvort ég ætti bifreið með tilteknu skráningarnúmeri, sem hafði verið ekið aftan á aðra bifreið á götu í Reykjavík.

Ég kannaðist við númerið, enda átti ég bifreið með þessu fastnúmeri en ég gat frætt lögregluþjóninn um að í fyrsta lagi hefði þessi bifreið ekki komið til höfuðborgarinnar í nokkur ár, í öðru lagi væri búið að leggja númerin inn, í þriðja lagi væri aftari hluti undirvagns orðinn að vélsleðakerru norður í landi, í fjórða lagi væri búið að farga afgangnum (eftir að allt brúklegt hafði verið fjarlægt) og í fimmta og síðasta lagi hefði ég m.a.s. fengið greitt skilagjaldið!

Það er skemmst frá því að segja að ég þurfti ekki að hafa frekari áhyggjur af þessu máli. Annað hvort gaf sá sem aftanákeyrslunni olli upp rangt skráningarnúmer af ráðnum hug, eða þá að sá sem ekið var á hafi skráð niður rangt númer.

A.m.k. þykir mér ólíklegt að Peugeot 309 gæti leikið eftir listir Plymouth "58. Það yrði heldur ekki eins ógnvænleg bíómynd! :-)