Minnismerki um olíuöldina.

Fyrirhugaður kílómetra hár turn í Sádi-Arabíu verður táknrænt minnismerki á hárréttum stað um öldina, sem við lifum á og mun fá heitið olíuöldin þegar fram líða stundir.

Í línuritum um orkunotkun heimsins og notkun olíunnar frá því að hún kom til sögunnar þar til að hún verður uppurin, er línan sem táknar orkunotkunina svipuð í laginu og turninn mikli.

Sádi-Arabía og fólkið sem þar býr verður einnig táknrænt fyrir skammsýni og græðgi núlidandi jarðarbúa, þar sem lykilaðstaða á olíumarkaði hefur skapað jarðveg fyrir stjórnendur sem geta komist upp með nánast hvað sem þeim sýnist í mannréttindabrotum og forneskju auk bruðls og munaðar, en halda þegnunum niðri með því dæla olíuauðnum hæfilega mikið út á meðal þeirra.

Það er raunar gamalkunnug stefna, sem rómversku keisararnir beittu undir heitinu "brauð og leikir". Hér heima kallast það að gefa þeim sem ferðinni ráða færi á "að græða á daginn og grilla á kvöldin".

Sádi-Arabar hafa verið slungnir við að koma sér í mjúkinn hjá mesta herveldi heims og staða þeirra er svo sterk, að þeir áttu ef til vill einna stærstan utanaðkomandi þátt í því að fella Sovétríkin á níunda áratugnum með því að auka framboð á olíu hæfilega mikið til að verðlækkun á heimsmarkaði bitnaði á gjaldeyristekjum Sovétríkjanna.  

Kílómetrahár turn í Sádi-Arabíu

Athugasemdir

[Ólafur Als, 25.4.2014 kl. 14:02]

"þar til að hún verður uppurin" - þú hefur ekkert fyrir þér í þessari fullyrðingu þinni, Ómar, annað en áróður hins fákunnandi. Það sem mun tryggja að nóg verði af slíkum orkugjafa - ef á annað borð er áhugi fyrir að nýta hann - er að af öðrum orkugjöfum er nóg. Skýrasta dæmið er hve sólarsellur eru orðnar hagkvæmar á breiddargráðum nálægt miðbaug og vindorkan stígur sömu skref í átt til hagkvæmni. Orðagjálfur um að olíuna muni þverra er því innantómt. Við þetta má bæta að olíusandar og "shale-oil" dugar mannkyni um hundruðir ára.

[Jósef Smári Ásmundsson, 25.4.2014 kl. 15:25]

Olía er notuð í margt annað en eldsneyti á bíla ,flugvélar og skip.Hún er notuð í bílaiðnaðinum(innréttingar úr plast o.fl.),byggingariðnaðinum og margt margt annað.Olíunotkun til brennslu mun minnka með tilkomu nýrra orkugjafa-ramagnsbíla,sólarsellur,vindorka o.fl. en það líður langur tími þar til olían er uppurin og langur tími þangað til notkun hennar verður hætt.

[Haukur Kristinsson (IP-tala skráð) 25.4.2014 kl. 16:03]

Samkvæmt nýjasta "BP report" er áætlað að í kringum 1300 milljarðar af "olíu-tunnum" (oil barre, 159 l) séu eftir í iðrum jarðar. Það gæti dugað í tæplega 50 ár.

Auðvitað hlýtur að koma að því að olían þverri, en það myndast engin ný á meðan við dælum upp árlega ca. 30 milljörðum "barrel". Því má öllum vera ljóst að einn góðan veðurdag er olían hreinlega "búin".

Það hefur ekkert með áróður eða orðagjálfur gera. Þá skulum við hafa í huga að nær allur efnaiðnaður byggist á jarðolíu og efnum úr henni.

[Eyjólfur Jónsson, 25.4.2014 kl. 17:24]

Og hvernig verður mynnismerkið um fornan frægðarferil íslenskrar alþýðu? Dáin börn og gamalmenni í tvinnuð saman eins og spíran í Frogneparken í Osló sennilega.

[Eyjólfur Jónsson, 25.4.2014 kl. 17:30]

Nú nú ekki fara of hratt, norsarar eru búnið að fynna nýjar olíulyndir við hliðina á þeim gömlu og hafa þær tvöfalt magn á við það sem fundist hefur hingaðtil, svo það er bara að bora og bora strákar tildæmis vestan við Reykjaneshrygginn!! Nú hlaupa allir til og skoða öll kort!! og gerið það bara, það er olía þar líka.

[Jón Logi (IP-tala skráð) 25.4.2014 kl. 17:34]

Í öllum þessum dásemdarbrunnum hlýtur þá að liggja nóg svo að hún lækki svo vel, að við getum hætt að virkja meir að segja. Og ekki hefur viðbreyting iðra-eldsneytis yfir í gastegundir nokkuð að segja, er það?
Haustballið heldur áfram með brauði og leikjum.....

[Ólafur Als, 25.4.2014 kl. 19:22]

Ég sé að fleiri elta uppi þessa vitleysu um að olíuna muni þverra innan tíðar. Viti menn, allt frá því að Hubbert kom fram með spálíkan sitt árið 1956, sem gerði ráð fyrir að um og eftir aldamótin 2000 myndi olíuframleiðslan ná toppi og fara síðan minnkandi, hafa menn verið að spá að olíu muni þverra innan 50 ára eða svo - ef menn hefðu nú fyrir því að skoða hvað í tölum og skilgreiningum felst, þó ekki væri nema að vita hvað "oil reserves" þýðir, þá sjá menn að hér er um sannanlegar birgðir að ræða, að gefinni þeirri tækni sem fyrirfinnst og verði á hverjum tíma. Eftir því sem verð hækkar og tækni fleygir fram, aukast birgðatölur. Að auki hefur bæst við fyrirbærið shale-oil, sem er gífurlega stór óplægður akur sem varlega metið gæti margfaldað núverandi birgðatölur, jafnvel sjöfaldað eða meira. Og ekki má gleyma að sífellt er verið að finna nýjar lindir á landgrunni og víðar. Gríðarlegar lindir er að finna utan stranda Brasilíu, auk Noregs og mun, mun víðar. Olíusandarnir í Alberta geyma alla vega 170 milljarða tunna og reglulega eru þær tölur uppfærðar eftir því sem tækni við að nýta þessa "nýju" olíuauðlind fleygir fram. Hið eina sem gæti haft áhrif á þessa þróun alla er ef aðrar orkulindir verða hagkvæmari, sbr. það sem ég nefndi hér áður að sólarsellur eru brátt á samkeppnisgrundvelli víða nálægt miðbaug og vindmyllur munu e.t.v. innan fáa ára geta keppt víða um heim við hefðbundna orkuframleiðslu (olía, kol, gas, vatn, jarðhita og kjarnorku). Og hver veit nema þróun Þóríum kjarnakljúfa muni gerbreyta viðhorfum manna til kjarnorku. Eins og sést þá er ekkert sem gefur til kynna að olíu muni þverra í náinni framtíð, þó svo að hið fræðilega viðmið geri ráð fyrir að æ "erfiðara" reynist að sækja hana og um síðir verði svo lítið eftir að ekki borgi sig að sækja meira.

[Ólafur Als, 25.4.2014 kl. 19:28]

ps. sumir háðskir hafa bent á að svartsýnisraus um að olíu þverri hafi umfram fjölmargt annað tryggt hærra olíuverð síðari árin ... og þar með tryggt að fylla gullkistur olíuiðnaðarfyrirtækja um heim allan ... hmmmmmmm

[Haukur Kristinsson (IP-tala skráð) 25.4.2014 kl. 19:57]

Enginn að elta uppi vitleysuna Ólafur Als. Okkur er skylt að taka mið af þeirri þekkingu sem við höfum um viðkomandi mál, en ekki af óskhyggju, litaðri af pólitísku viðhorfi.

Þín afstaða minnir á umræðuna um „climate change“, þar sem ignorantar hika ekki við að draga í efa niðurstöður þeirra sem lærðastir eru í faginnu og hafa rannsakað hlutina.

Minnir einnig á afglapa eins og Davíð Oddsson og Gunnar í Krossinum, sem fullyrða að þróunarkenning Darwins væri bara tilgáta, hypótesa, en ekki theóría, sem nær allir fræðimenn segja full sannaða. Hallærisleg og um leið sorgleg  „flat earth“ umræða.

 

En það hefur lengi vakið athygli mína hversu oft svona bull umræður er í gangi á klakanum.

Merki um lítt menntaða þjóð, því miður.

[Ólafur Als, 25.4.2014 kl. 20:02]

Haukur; hér er ekki um afstöðu að ræða, heldur viðrun þekkingar og reynslu undangenginna ára. Þú blandar hér óskyldum atriðum saman til þess að þóknast einhverjum viðhorfum sem ég er ekki að ræða. Vanþekkingin og þvermóðskan býr því hjá þér. Kynntu þér málin, leitaðu þekkingar og svo skulum við tala saman.

[Haukur Kristinsson (IP-tala skráð) 25.4.2014 kl. 20:46]

Ólafur Als. Fyrir neðan tvær slóðir í greinar sem fjalla um "peak oil". 

http://www.forbes.com/sites/quora/2012/07/09/how-many-years-of-oil-do-we-have-left-to-run-our-industrial-civilization-keeping-in-mind-that-oil-is-a-resource-and-has-an-economical-end/

http://science.howstuffworks.com/environmental/green-science/peak-oil.htm

[Ólafur Als, 26.4.2014 kl. 11:00]

Svo virðist, Haukur, sem þú hafir reynt að kynna þér málin. All nokkuð vantar þó enn upp á að betri heildarmynd fáist. Lestu sumt af því sem ég setti hér fram ÁN FORDÓMA og þá sérðu að framundan er ekki skortur á olíu, gasi eða kolum í fyrirsjáanlegri framtíð. Allt útlit fyrir að sólar- og vindorka muni geta séð fyrir vænum hluta orkuþarfar mannkyns og þá á enn eftir að þróa betri og hagkvæmari tækni til þess að nýta sjávarföll og sjávaröldur. Þóríum minntist ég einnig á. Það kæmi mér ekki á óvart ef sólarsellur verði hagkvæmari til raforkuframleiðslu en ýmis hefðbundin framleiðsla innan eins eða tveggja áratuga. Fjölmargt fleira mætti nefna í þessari umræðu allri sem segir mér að framundan eru spennandi tímar á sviði orkumála.