Rétt skal vera rétt, - en hvað er svo rétt ?

Þegar tveir eða fleiri segja frá sameiginlegri upplifun getur hún orðið býsna ólík. Það virðist eiga við um frásagnirnar af framboði Framsóknarmanna sem nú hefur rekið upp á sker að því er virðist.

Ef af blönduðu framboði hefði orðið, er líklegt að einhver óflokksbundinn "flugvallarsinni" hefði verið settur í annað sæti listans, því að  út af fyrir sig er ekkert óvenjulegt né óeðlilegt við það að flokkar landsins fari í samvinnu hver annan eða við öfl utan flokka í byggðakosningum á Íslandi og Framsóknarmenn hafa gert það alveg eins og aðrir.

Þá hefur verið raðað á listanna samkomulagi aflanna, sem í hlut áttu.  

Sem dæmi má nefna að 1938 buðu kratar og kommar fram sameiginlegan lista í Reykjavík, og í 12 ár, frá 1994 til 2006, var R-listinn við völd, en framsóknarmenn voru meðal fjögurra aðila að því sameiginlega framboði.

Menn spyrja eðilega hvers vegna flokknum hafi gengið jafn vel og raun bar vitni í alþingiskosningunum 2013 en gangi svona herfilega nú.

Ástæðan liggur í augum uppi: 2013 var lofað lausn á skuldavanda heimilanna upp á hundruð milljarða króna en engin slík loforð er hægt að gefa í borgarstjórnarkosningum.

Framsóknarmönnum hefur alltaf reynst það erfitt að mynda bakland í Reykjavík. Það þótti fáheyrt þegar Rannveig Þorsteinsdóttir komst á þing fyrir Framóknarflokkinn í Reykjavík 1949, en það var vegna þess að hún gaf stórt kosningaloforð um það að "segja fjárplógsstarfseminni stríð á hendur", þ. e. að útrýma skíkri starfsemi.

Þótti hún koma skörulega fram og vera til alls vís.  

Auðvitað varð ekkert úr efndum og Framsókn varð að sætta sig við það að þessi ár, 1949-1953, urðu einu árin fyrstu hálfa öldina eftir stofnun flokksins, að fá engan þingmann í Reykjavík.

Flokkurinn er ekki enn búinn að bíta úr nálinni varðandi REI-klúðrið 2007 og vandræðasögu og bruðliö í Orkuveitu Reykjavíkur, en einn angi hennar birtist í blaðafrétt í dag um að Hellisheiðarvirkjun sé stærsti mengunarvaldur á Íslandi á sama tíma og keppst er við að dásama hana sem framleiðanda "endurnýjanlegrar og hreinnar orku" þegar ljóst er að hún er hvorugt.  

  

Höfnuðu ekki hugmynd Guðna

Athugasemdir

[Þorsteinn Briem, 26.4.2014 kl. 17:49]

Það er rétt að það sé rangt,
það er ekki loðið,
það er stutt og það er langt,
það er miðjumoðið.

[Haukur Kristinsson (IP-tala skráð) 26.4.2014 kl. 18:56]

Þetta er nú meiri hálfvitagangurinn hjá Framsókn, en einnig og ekki síður hjá fjölmiðlum og bloggurum.

Maddaman er með þetta 1-2% fylgi í borginni og það skiptir sko Núll máli hver leiðir listann hjá þessum fáeinu hræðum. Daginn út og daginn inn er ekki fjallað um annað en hver verði oddviti 1-2% hópsins, Óskar, Guðni eða jafnvel sjálfur Hriflu-Jónas.

Pólitíkin á skerinu, djísus kræst!

[E (IP-tala skráð) 26.4.2014 kl. 19:50]

Sammála Hauki Kristinssyni. Framsókn er sem betur fer hluti af þeirri fortíð, sem við viljum öll gleyma sem fyrst. Svo þarf að jafna atkvæðisrétt til alþingiskosninga þannig að framsóknarmenn komist sem fæstir inn á þing á grundvelli misvægis atkvæða.

[Sigurður Antonsson, 26.4.2014 kl. 21:44]

Venjulegir frambjóðendur sem vilja þjóna komast varla að í sölumennskunni.

Frambjóðandi Framsóknar í aftur sætinu virðist hafa verið yfirgefin og vanræktur í öllum atganginum. Kona með hlutverk og skipulagsvit. Pólitíkin virðist því miður ganga út á sýndarmennsku fremur en málefni.

"Rannveig Þorsteinsdóttir komst á þing fyrir Reykvíkinga 1949." Á árunum á eftir voru einstaklingar í sjálfstæðum atvinnurekstri lagðir í einelti. Svo einhvern árangur hefur áróður hennar haft.

[Ómar Bjarki Kristjánsson, 26.4.2014 kl. 22:48]

Er ekki bara dáldið til í því sem Nubo hinn kínverski sagði? ,,Þetta eru leikarar", sagði hann.

Að öðru leiti virðist ýmislegt benda til að deilur hafi orðið innan Framsóknar. Af hverju nákvæmlega þessar deilur spruttu er hinsvegar óljóst.

Það eru talsverðar líkur til að heimildarmaður Mogga - sé enginn annar en Guðni nokkur Ágústsson. Enda hann og ritstjórinn ágætiskunningjar frá fyrri tíð og seinni líklega.

Það sem hefur komið fram er að Guðni vildi kalla framboðið Framsókn og Flugvallasinnar.

Framsóknarfélagið og/eða ráðamenn hjá Framsókn virðast hafa sett honum stólinn fyrir dyrnar með það.

Það er í sjálfu sér hægt að skilja þá afstöðu því það hlýtur að vera sérkennilegt að vera í félagi um flokk og leggja á sigvinnu og sona því viðvíkjandi - svo kemur bara einhver fv. ráðherra af Suðurlandi og ætlar að handraða kunningjum sínum á listann sem jafnvel eru ekkert í flokknum.

Guðni hefur líka upplýst það að þessir óflokksbundnu sem hann var búinn að fá til liðs við sig á listann, hafi horfið frá stuðningi eftir að það mátti ekki kalla framboðið Fra,sókn og Flugvallasinna.

Þá er áhugaverða spurningin: Hverja var Guðni búinn að fá til liðs við sig í framboð í Flugvallararm framboðsins?

Einhvernveginn grunar mann jafnvel að útvarp Saga tengist inní þetta. Það hefði náttúrulega verið krúsíalt að hafa ÚS með sér.

[Jón Logi (IP-tala skráð) 27.4.2014 kl. 10:03]

Ég held að Guðni hafi ekkert misskilið með það að þessari hugmynd var hafnað.
Spurning hvort flugvallarsinnar setja fram framboð....Guðnalausir.