Ísland viðundur, skaðvaldur í hafið í boði okkar sjálfra.

Ein líklegasta ástæðan fyrir því að skaðræðiskvikindið kóngakrabbi skjóti upp kollinum í norðlægum höfum er talin sú, að lirfur hans hafi borist með skipum hingað frá suðrænum höfum í kjölfestuvatni skipanna og komist út í hafið við útskolun á þessu mengaða vatni, sem líka má við skólp af verstu gerð.

Kóngakrabbinn, sem kallaður er stórvaxinn ræningi, er nú kominn í hafið hér við land og þarf engan að undra það. Hann er hingað í boði okkar sjálfra og þakkar pent fyrir sig.  

Í desember 2011 var hár á bloggsíðunni vakin athygli á því að einn reyndasti íslenski skipstjórinn, sem hefur stjórnað stórum flutningaskipum á öllum heimsins höfum, meðal annars í flutningi súráls til Íslands frá Ástralíu, hefði lýst því yfir í viðtali við blað starfsmanna Ísals, að hvergi í heiminum væri eins auðvelt að skola hverrri þeirri drullu og óþverra í hafið sem skipstjórar vildu en hér við land.

Slíkt viðgengist ekki einu sinni hjá löndum í Afríku og Asíu. .

Kvað hann skipstjóra stórra skipa nánast hlakka til að koma til Íslands, því að við strendur annarra landa væri hart eftirlit og strangar refsingar við brotum, jafnvel missir skipstjórnarréttinda ævilangt og fangelsisdómur við því að sleppa neinu í hafið frá skipum. Þetta má lesa í mynd af tímaritsviðtalinu, sem ég birti á facebook síðu minni.

Hér á landi ríkis hins vegar enn sinnuleysi um hafið og ástand þess eins og sést vel á ofnagreindu og því, að þrátt fyrir að allar rannsóknir skorti, á nú að margfalda laxeldi í fjörðum landsins með ófyrirsjáanlegum afleiðingum.     

Stórvaxinn ræningi í Breiðamerkurdýpi

Athugasemdir

[Þorsteinn Briem, 1.5.2014 kl. 21:41]

Lög um varnir gegn mengun hafs og stranda nr. 33/2004:

"25. gr. Refsiviðurlög.

Brot gegn lögum þessum og reglugerðum settum samkvæmt þeim varða sektum eða fangelsi allt að tveimur árum nema þyngri refsing liggi við samkvæmt öðrum lögum. Sé um stórfelld eða ítrekuð ásetningsbrot að ræða skulu þau varða fangelsi allt að fjórum árum.

Tilraun til brota og hlutdeild í brotum á lögum þessum og reglugerðum settum samkvæmt þeim er refsiverð eftir því sem segir í III. kafla almennra hegningarlaga.

26. gr. Sektir.

Sektir má ákvarða lögaðila þó að sök verði ekki sönnuð á fyrirsvarsmenn eða starfsmenn hans eða aðra þá einstaklinga sem í þágu hans starfa, enda hafi brotið orðið eða getað orðið til hagsbóta fyrir lögaðilann. Þó skal lögaðili ekki sæta refsingu ef um óhapp er að ræða. Einnig má, með sama skilorði, gera lögaðila sekt ef fyrirsvarsmenn eða starfsmenn hans eða aðrir einstaklingar sem í þágu hans starfa gerast sekir um brot eða ef það stafar af ófullnægjandi tækjabúnaði eða verkstjórn.

27. gr. Farbann.

Ef brotið er gegn ákvæðum laga þessara og brotið tengist skipi skal skipið sett í farbann og er eigi heimilt að láta það laust fyrr en málinu er lokið og sekt auk málskostnaðar greidd að fullu, svo og kostnaður eftirlitsaðila. Um farbann fer að ákvæðum laga um eftirlit með skipum.

Þó er heimilt að láta skip laust fyrr ef sett er bankatrygging eða önnur trygging jafngild til greiðslu sektar og alls kostnaðar.

Til tryggingar greiðslu sektar samkvæmt grein þessari, málskostnaðar og kostnaðar eftirlitsaðila skal vera lögveð í skipinu í tvö ár."

"Viðauki I.

A. Starfsemi sem getur valdið bráðamengun á hafi eða ströndum vegna eðlis starfseminnar og/eða nálægðar hennar við sjó.

   1. Fiskimjölsverksmiðjur.
   2. Álframleiðsla.
   3. Áburðarframleiðsla.
   4. Sements- og kalkframleiðsla.
   5. Kísiljárnframleiðsla.
   6. Kísilmálmframleiðsla. ..."

[Bjarni Gunnlaugur (IP-tala skráð) 2.5.2014 kl. 08:01]

Af hverju gefurðu þér að krabbinn hafi komið með skipi, getur ekki verið að hann komi frá Norgegi undir eigin "vélarafli"?    Hitt er annað mál að andvaraleysið er slæmt!

[Ómar Ragnarsson, 2.5.2014 kl. 08:59]

Ég gef mér þetta ekki, heldur vísindamennirnir í fréttunum um þetta. Ef þú lest viðtalið við hinn þrautreynda íslenska skipstjóra um þetta sérðu, að það er stórt atriði í þessu að hér við land geti menn í mesta hugsanlegum friði, sem finnst á jarðríki, verið að losa sig við úrgang, drullu og vatn hvaðan sem er úr heiminum.

Skipstjórinn veit sínu viti. Við þekkjum afleiðingarnar af innflutningi hrúta og minnka, sem þó komu frá nágrannalöndunum, en það er eins og við höldum að allt öðru máli gildi um lífríki hafsins.  

[Karl (IP-tala skráð) 5.5.2014 kl. 11:52]

Krabbinn barst á norðlægar slóðir af því að Rússar "gróðursettu" hann með það í huga að nýta hann.