Clarkson er eldsnöggur, kannski stundum um of.

Nú hefur hann Jeremy Clarkson víst fengið lokaaðvörun hjá BBC vegna vanhugsaðra ummæla.

Það vill svo til að ég ræddi stuttlega við Clarkson fyrir rúmum 20 árum við Litlu kaffistofuna og kynntist því þar, hve snjall og eldfljótur hann er í tilsvörum. Það er ómetanlegur kostur fyrir mann eins og hann að vera leiftursnöggur upp á lagið og orðheppinn, en hraðinn getur líka valdið því að úr verði vanhugsuð orð.

Clarkson var að taka myndir fyrir Top Gear þegar ég lenti fisinu Skaftinu rétt við kaffistofuna og dró þetta 120 kílóa flygildi auðveldlega inn á planið að bensíndælu til að fylla á það.

Clarkson fannst þetta skondið, fór að spjalla við mig og vildi vita á mér deili, hvað ég hefði sýslað um dagana. Síðan var tekið upp örstutt atriði sem rataði í þátt um Ísland, sem vakti athygli víða á landi og þjóð og hefur síðan skolað inn á Youtube.

En ekkert af undirbúningsspjallinu að þessu atriði var tekið upp á myndband, en mér var það eftirminnilegt hvað hann var hnyttinn og snöggur upp á lagið í tilsvörum.  

Hann undirbjó sig vel og vildi vita sem öll deili á mér og hvað ég gerði. Ég sagði að erfitt væri að velja.

"Segðu mér það allt og svo veljum við úr því og tökum smá atriði upp," svaraði hann.

Ég sagði honum að ég hefði gert allan andskotann um dagana, verið námsmaður, unnið í sveit og í verkamannavinnu og garðyrkjuvinnu sem unglingur, leikið í leikhúsunum, verið skemmtikraftur, orðið atvinnuflugmaður og flugkennari, samið tónlist, texta og skrifað bækur, keppt í ralli, orðið fréttamaður og dagskrárgerðarmaður og sitthvað fleira.

"Sem fréttamaður gætirðu kannski sagt mér frá því hvernig þjóðinni vegnar um þessar mundir?" spurði Clarkson.   

"Henni vegnar ágætlega,", svaraði ég, "en að vísu er örlítil kreppa svo að þrátt fyrir atvinnuleysi sé yfirleitt lítið hér, hefur það vaxið aðeins."

"Það er engin furða," sagði Clarkson, "þú tekur svo mörg störf frá öðrum að það kemst enginn að fyrir þér."

Ég hlýt að taka svari Clarksons og biðja honum vægðar, þótt eitthvað hafi dottið óhugsað úr munni hans vegna þess hve snöggur hann er upp á lagið. Sæti síst á mér að kasta úr glerhúsi í því efni.   

 

Clarkson fær lokaviðvörun

Athugasemdir

[Þorsteinn Briem, 4.5.2014 kl. 03:53]

Allan gerir andskotann,
Ómar hér á landi,
út um hvipp og hvapp er hann,
karlinn sífljúgandi.

[Gunnar Heiðarsson, 4.5.2014 kl. 07:35]

Það er rangt sem kemur fram í fyrrihluta fréttarinnar, að Clarkson neiti alfarið að biðjast afsökunnar. Í seinnihlutanum kemur hins vegar sannleikurinn í ljós. Clarkson hefur þegar beðist afsökunnar og það opinberlega. Fyrri frétt mbl.is um þetta mál segir einnig frá þeirri afsökunnarbeiðni. 

Hitt er undarlegt að það skuli verða svona mikið mál út af þessi, þar sem atriðið kom ekki fram í þættinum. Einhver lak því hins vegar á netið og miklu nær að rannsaka hvernig stendur á því að efni sem BBC er að vinna skuli lenda þar án leifis. Það er orðið frekar hart ef þáttagerðamenn geta ekki gert grín sín á milli, af hættu við að einhver myndatökumaður taki það upp og láti á alvefinn.

Það er deginum ljósara að enginn útvarps eða sjónvarpsþáttur nýtur viðlíka vinsælda og Top Gear. Jafnvel frábærir þættir Attenborough ná ekki sömu vinsældum.  En þessi skemmtiþáttur á sér einnig andstæðinga og þeir vilja hann burtu.

Top Gear er fyrst og fremst skemmtiþáttur. Grinið heggur oft nærri fólki og því það vandmeðfarið. Sú staðreynd að þetta atriði var ekki notað í þættinum sýnir kannski best hversu meðvitaðir stjórnendur þáttanna eru um það.