Haustin og vorin henta vel.

Það hefur tekið okkur Íslendinga marga áratugi að átta okkur á því að erlendir ferðamenn koma ekki til Íslands til þess að leita eftir miklum og varanlegum sólarhita í logni og heiðríkju eins og við gerum þegar við förum til sólarlanda.

Einkum koma sólarlandabúar ekki til Íslands í þessu skyni, því að þeir hafa nóg af sólarsterkju, logni og molluhita heima hjá sér og eru að leita að nýrri upplifun.

Á sama hátt er það eðlilegt að við leitum suður á bóginn til að upplifa eitthvað nýtt. En að sumu leyti er hásumarið ekki heppilegasti tíminn til þess.

Hvort tveggja er, að þá eru veðrið og birtan best hér heima og hitasvækjan mest í suðurlöndum. Með vaxandi ferðamannastraumi er einnig mest þörf fyrir vinnandi hendur hér heima á helsta álagstíma ferðamannatímans hér heima.  

Vorin og haustin henta okkur betur til utanferða, enda vinnum við betur upp svalann hér heima á þeim tíma ársins en um hásumarið.

Þess vegna er æskilegt að skapa sveigjanleika í atvinnulífinu til þess að þeir árstímar verði meira notaðir til utanferða en verið hefur.  

 

Sólarlandaferðir seljast betur

Athugasemdir

[Þorsteinn Briem, 18.5.2014 kl. 14:48]

15.5.2014 (síðastliðinn fimmtudag):

"Fyrstu þrjá mánuði þessa árs komu hingað 60.489 bresk­ir ferðamenn en yfir sum­ar­mánuðina í fyrra voru þeir rúm­lega helm­ingi færri, eða 27.138 sam­kvæmt taln­ingu Ferðamála­stofu.

Vetr­ar­ferðir til Íslands eru því mun vin­sælli meðal Breta en ferðalög hingað yfir sum­ar­mánuðina."

[Haukur Kristinsson (IP-tala skráð) 18.5.2014 kl. 14:51]

Haustin og vorin henta vel. Rétt Ómar!

Var í Grikklandi (Temeni, Peleponessos) allan nóvember mánuð fram í desember og svo aftur í mars fram í apríl. Frábær timi, ekki síst fyrir Íslendinga, leyfi ég mér að fullyrða.

Kalt á nóttunni og fram eftir morgni, en hlýtt síðdegis, jafnvel veður fyrir sund og sólbað.

Flesta daga sólskin, en þess á milli rigning, en snjókoma í fjöllum. Baðaði mig í þalassa í nóvember, en ekki í mars. 

Verðið afar sanngjarnt og meira framboð af grænmeti, ávöxtum, kjöti og jafnvel fiski en þekkist á Íslandi. Fyrir heilt brauð borgaði ég hjá bakaranum (fúrnaris) 70 lepta (cent), ca. 110 kr. 

Grísk náttúra er stórkostleg og á fornleifar Grikkja þarf ekki að minna.

Gott að heyra að Krít hafi vinninginn, vinir mínir Grikkar þurfa á því að halda að ferðamenn heimsæki þá. Atvinnuleysið er allt of mikið. 

Mæli svo sannarlega með Hellas. Kalo taxíði!