Fjórar hliðstæður frá fyrri tíð.

Enginn furða er þótt vangaveltur vakni vegna hins dularfulla hvarfs MM370 á dögunum þess efnis, að þotan hafi fyrir mistök verið skotin niður af herflugvél.

Að minnsta kosti fjórum sinnum  áður hefur slíkt komið upp og í tvö þeirra skipta voru það hervélar sem skutu viðkomandi þotur niður.

Rússnesk herþota skaut niður kóreska farþegaþotu sem fór fyrir mistök inn í sovéska lofthelgi norður af Japan 1. september 1983 og Bandaríkjamenn skutu niður íranska farþegaþotu fyrir mistök yfir Persaflóa 1988.

Þriðja skiptið af þessu tagi gerðis þegar ítölsk rannsóknarnefnd sló því föstu eftir margra ára rannsókn að herþota frá Líbíu hefði skotið niður farþegavél norður af Sikiley.

Mjög reyndur og snjall sænskur sérfræðingur í flugslysarannsóknum komst að lokum að þeirri niðurstöðu að sprengja í farangri vélarinnar hefði grandað henni. Þegar gögnin, sem sú niðurstaða grundvallaðist á, eru skoðuð verður sú niðurstaða að teljast sennilegri en niðurstaða Ítala.   

Fjórða tilfellið var þegar farþegaflugvél fórst á Norðursjó á áttunda áratugnum á sama tíma og orrustuþotur voru þar að heræfingum.

Í upphafi var leitt getum að því að herþota hefði farið svo nálægt henni á ógnarhraða að það hefði valdið því að vélin hrapaði stjórnlaus í hafið.

Í ljós kom að þetta var röng tilgáta. Bilun í stéli vélarinnar olli slysinu.  

Í öllum þessum fjórum tilfellum var vitað hvar vélarnar fórust en sú er ekki raunin varðandi MH370.

Þess vegna verður tilgátan um að herflugvél hafi grandað henni að teljast hæpin.

Var þotan skotin niður á heræfingu?

Athugasemdir

[Vilhjálmur Eyþórsson, 19.5.2014 kl. 19:48]

Þetta tal um margar stefnubreytingar vélarinnar byggir á vægast sagt ótraustum heimildum.

Ef eldur hefur komið upp, sem er langlíklegast er nánast óhugsandi að vélin hafi beygt nema einu sinni áður en flugmennirnir urðu óvígir. Langlíklegast er að það hafi verið í átt að næsta flugvelli, sem er í vestur. Það sást til flugvélar við Maldive- eyjar á þessum tíma, sem eru nákvæmlega í stefnunni, en hún hélt svo áfram og kann að hafa endað í Indlandshafi nálægt Seychelles- eyjum, norður af Madagaskar.

[Leifur Hákonarson (IP-tala skráð) 19.5.2014 kl. 21:20]

Ómar, þú gleymir KE902 árið 1978, hún villtist í okkar svæði, flaug upp með Noregsströnd og var skotin niður austur af Finnlandi á leið út úr sovéskri lofthelgi eftir að hafa flogið yfir viðkvæmasta hérað þeirra blessaðra.

Ég var á vakt í flugstjórn þegar þetta var, það losaði okkur við talsvert umstang að áhöfnin þóttist allaf vera á réttri leið og tilkynnti sig inn til Kanadamanna norðvestur af Grænlandi svo þeir þurftu að leita - sem var auðvitað árangurslaust.

Flest kort af atburðarásinni  sýna flugleiðina yfir Grænland en það er nokkuð ljóst að þeir flugu í norðaustur upp með Noregi en ekki í norðvestur. Farþegarnir munu hafa veifað orrustuflugmönnunum (héldu þá vera frá Anchorage) áður en fjórir metrar voru skotnir af vinstri vængnum. Wikipedia veit afganginn :-)

Sem sagt - sama flugfélagið missti TVÆR farþegaflugvélar fyrir hendi Sovétmanna með fimm ára millibili - sumir myndu kalla það kæruleysi.