Ótal svipaðar frásagnir og misáreiðanlegir vitnisburðir.

Í mörgum tilfellum, þar sem flugvélar hafa horfið, hafa komið fram margir vitnisburðir fólks sem taldi sig hafa séð þær eða heyrt í þeim, en það reyndist síðan ekki hafa við rök að styðjast.

Hér á Íslandi hefur slíkt gerst oft og stundum torveldað og flækt leit að vélunum.

Nefna má tvö dæmi.

Þegar TF-ROM hvarf á leiðinni frá Reykjavík til Akureyrar fyrir rúmum 40 árum taldi fjöldi fólks sig hafa orðið vart við ferðir vélarinnar allt norður á Tröllaskaga. Fyrir bragði var leitin að vélinni þanin yfir gríðarlega stórt svæði allt þar til hún fannst á langlíklegasta staðnum, þar sem henni hefði getað hlekkst á.

Þegar flugvélin Geysir hvarf í september 1950 á leið frá Evrópu til Reykjavíkur, gerðist svipað og vitnisburðir bárust frá svæði, sem teygði sig ótrúlega langt norðu fyrir áætlaða flugleið vélarinnar.

Þar varð niðurstaðan öfug við það sem varð við hvarf TF-ROM, það er, að vitnisburðirnir frá því svæði sem lengst var frá flugleið vélarinnar, í Álftafirði, reyndust þeir einu réttu.

Fyrsta flugleit, sem ég man eftir, var þegar Avro Anson týndist á leiðinni milli Vestmannaeyja og Reykjavíkur.

Ég man eftir blaðasöludreng í Bankastræti sem kallaði upp fyrirsögn þess efnis að flugvélin hefði getað farist í Esjunni.

Hið rétta var að hún fórst utan í Skálafelli við sunnanverða Hellisheiði.

Undarlegt er hve löngu eftir hvarf MH370 kemur fram vitnisburður sjónarvotts af Indlandshafi.

En dæmin, sem nefnd eru hér á undan, sýna, að afar erfitt er að flokka vitnisburði í sundur eftir því hve sennilegir þeir eru.  

Telur sig hafa séð þotuna alelda

Athugasemdir

[B.N. (IP-tala skráð) 4.6.2014 kl. 07:38]

Ef þessi frásögn er rétt ætti brak úr vélinni tel ég að vera búið að finnast bara fyrir tilviljun á þessu svæði

Baldvin Nielsen

[Eyjólfur Jónsson, 4.6.2014 kl. 11:32]

Þarna eru þá komnir 3 sem hafa séð það sama á sama svæði, en hvort það var flugvél er ekki gott að vita. En einkennilegt  með feluleikinn í þessu!

[Þorsteinn Briem, 4.6.2014 kl. 12:45]

Flugvélar fara tæpast langar leiðir alelda.

[Hörður Þórðarson, 4.6.2014 kl. 19:01]

Mér finnst vera mikil skítalykt af þessu máli. Sennilegast finnst mér að vélin hafi verið skotin niður fyrir slysni. Þetta "wild goose chase" ástrala finnst mér benda til þess að þeir hafi eitthvað að fela, eða að þeir séu að hjálpa einhverjum öðrum að fela eitthvað.

[Grímur (IP-tala skráð) 4.6.2014 kl. 20:08]

Á tímabili sáu sumir Íslendingar ísbirni í hverjum firði

þótt aldrei tækist að rekja slóð þeirra