Að sitja andspænis 40 tonna skriðdreka - eða F-15 orrustuþotu.

Fræg er myndin af litla Kínverjanum, sem stóð fyrir framan skriðdrekann á Torgi hins himneska friðar fyrir réttum 25 árum. Hvernig skyldi það vera að standa svona lítill og gersamlega varnarlaus andspænis svona öflugu 40 tonna þungu tákni um hrátt vald?

Hugur minn reikar til 21. október 2013 til lífsreynslu, sem ég hefði aldrei ímyndað mér fyrirfram að ég ætti eftir að upplifa en fólst í því að sitja ásamt fleirum í Gálgahrauni fyrir fram 40 tonna íslenskan skriðdreka, stærsta skriðbeltatæki Íslands, sem að vísu var ekki með fallbyssur eða vélbyssur, en þess í stað risastóra og þunga ýtutönn og skriðbelti sem gátu kramið vesaling eins og mig líkt og lítinn maur.

Þarna varð mér ljóst hvernig það væri að sitja svona lítill og gersamlega varnarlaus andspænis 40 tonna þungu tákni um hrátt vald.  

Drekanum fylgdi 60 manna víkingasveit með gasbrúsa, handjárn og kylfur, og skriðbeltatækið kom aðeins þennan eina dag í Gálgahraun og hefur ekki sést þar siðan.

En dagurinn var vel notaður eftir að valdinu hafði verið beitt og skriðbeltatækið malaði ósnortið hraunið mélinu smærra eftir endilöngu fyrirhuguðu vegstæði og olli mestu mögulegu náttúruspjöllum, sem hægt var að framkvæma á einum degi.  

60 manna víkingasveit var 58 mönnum fleira en þurfti til að bera vesaling minn í burtu. Af hverju þurfti allan þennan her manns og stærsta skriðdreka landsins þarna, bara þennan eina dag ?

Svarið getur varla verið nema eitt: Sýna þurfti hrátt valdið á sem allra áhrifaríkastan hátt.

Á þessum degi reikar hugur minn líka til sumarsins 1999 þegar ég var á flugi yfir hálendi Íslands og átti tæknilega möguleika á að lenda á einhverjum af þeim örfáu merktu lendingarstöðum, sem þar eru.

En þennan dag átti ég ekki löglega möguleika á þessu, því að búið var að lýsa yfir flugbannsvæði yfir stórum hluta hálendisins til þess að F-15 orrustu- og loftárásaþotur NATO gætu æft sig í heræfingunni Norður-Víkingi, þar sem æft var hvernig fást skyldi við íslenskt náttúruverndarfólk, ef það yrði þar einhvern tíma með mótmælaaðgerðir.  

Ég er ekki að grínast. Þetta var svona.  

F-15 orrustuþotur, öflugustu orrustuþotur heims, geta ekki lent neins staðar á hálendinu til þess að setja út lið til að fást við náttúruverndarfólk.

Það þarf heldur ekki F-15 þotur til að skoða hvað sé á seyði. F-15 þotur eru hannaðar til tvenns: Að berjast við óvinaþotur og varla mun sá tími koma að íslenskt náttúruverndarfólk ráði yfir slíku.

Eða að gera loftárás og sprengja skotmarkið í tætlur. Í þessu tilfelli var náttúruverndarfólk eina skotmarkið, sem æfð var árás á.

Ég flaug í kringum bannsvæðið þennan dag en velti því fyrir mér hvað myndi gerast ef ég virti bannið að vettugi, flygi inn á bannsvæðið, lenti á lendingarbraut, dræpi á hreyflinum, settist þar niður og nyti öræfakyrrðarinnar.

Spurningarnar voru athyglisverðar og hafa skerpst síðar eftir ahyglisverða athugun Andra Snæs Magnasonar á þessari heræfingu:

Myndu F-15 þoturnar ráðast að mér á flugi, veita mér aðvörun og síðan granda mér og FRÚnni, enda komið fínt tilefni til að æfingin yrði sem raunverulegust?   

Myndu þær ráðast að mér sitjandi og setja ærandi afturbrennarann á í lágflugi yfir mig?

Eða myndu þær granda skotmarkinu með skothríð og sprengjuvarpi úr því að það barst svona upp í hendurnar á þeim?

Eða yrði ég kærður, lögsóttur og dæmdur fyrir tiltækið? Send víkingasveit til að yfirbuga "hryðjuverkamanninn" sem þá var reyndar aðeins venjulegur fréttamaður án nokkurra tengsla við náttúruverndarfólk?  

Hvers vegna var náttúruverndarfólk talið helsta hryðjuverkaógn, sem steðjaði að íslensku þjóðinni, svo mikil ógn, að mesta herveldi heims í mesta hernaðarbandalagi heims þyrfti að setja upp sérstaka heræfingu vegna þess ?

Hvers vegna þurfti að æfa flugmenn á F-!5 þotum í aðgerðum gegn náttúruverndarfólki á íslenska hálendinu?

Þessar spurningar kunna að sýnast yfirdrifnar og fáránlegar, en dettur engum í hug að uppsetning og framkvæmd Norður-Víkings 1999 hafi verið fáránleg ?

Eða var þessi mikla aðgerð að því leyti til hliðstæð skriðdreka- og víkingasveitarsýningunni í Gálgahrauni að sýna þyrfti fram á eins mikla yfirburði hins hráa valds og unnt væri, - "til skræk og advarsel" eins og danskurinn orðar það?  

Síðasti fanginn af Torginu

Athugasemdir

[Þorsteinn Briem, 4.6.2014 kl. 23:20]

Á Kína stærsta Korputorg,
kom þar Óli grísinn,
Pekingönd í Pekingborg,
og pöndu sá hann hnýsinn.

[Vilhjálmur Gunnarsson (IP-tala skráð) 5.6.2014 kl. 05:31]

Með fullri virðingu Ómar þá eiga uppákoman í Gálgahrauni og atburðirnir á Torgi hins himneska friðar akkúrat ekkert sameiginlegt.

[Jón Logi (IP-tala skráð) 5.6.2014 kl. 13:30]

Ég átti leið yfir þverárbrú um þetta leyti og var "tékkaður" af auðsýnilegum mönnum í felulitum. Sáust langa leið út af trjágreinum í hjálmum með trjálausan bakgrunn. Hefði verið nær að hafa túnþöku á hjálminum, en ég stóðst freisinguna að bjóða slíkt :D

[Ómar Ragnarsson, 5.6.2014 kl. 16:02]

Það er rétt, Vilhjálmur, að kínverskir ráðamenn í ríki alræðis og kúgunar létu brytja andófsmenn niður og hafa ekki einu sinni gefið upp hve margir voru drepnir. Og kúgunin og alræðið ríkir enn þar í landi.

En orðin "akkúrat ekkert sameiginlegt" myndu eiga við ef látið hefði verið nægja að láta venjulega lögreglumenn taka okkur upp í Gálgahrauni og bera okkur í burtu.

Í staðinn var beitt stærsta skriðbeltatæki landsins sem hvorki fyrr né síðar sást eða hefur sést í Gálgahrauni og vopnaðri víkingasveit til að flytja fólk í fangelsi. Það var beitt valdi langt umfram lögboðið meðalhóf.    

Og eftir stendur spurningin: Af hverju var talin svo mikil ógn að náttúruverndarfólki á hálendi Íslands 1999 að það þyrfti að heræfingu með mikilvirkustu drápstólum nútímans til að æfa viðbrögð við því ?