Nauðsyn aukinna rannsókna og átaks gegn "áunnri fáfræði".

Ég heyrði á einhverri ljósvakarásinni að framlög til hafrannsókna hafi verið dregin saman á sama tíma sem brýn og ný verkefni hrannast upp.

Þótt kuldatrúarmenn haldi enn fast við það að veðurfar hafi ekki hlýnað og þvertaka fyrir að neinar breytingar í loftslagi og lífríki sé af mannavöldum horfum við upp á súrnun og hlýnun sjávar án þess að sjá megi að menn eigi nægar skýringar á þessum breytingum og afleiðingum þeirra.

Hrun sandsílastofnsins er talin meginorsök hruns lundastofnsins og fleiri strandfugla. En hvað um vaxandi súrnun sjávar?  

Svo er ekki að sjá að spáð hafi verið fyrir um þessi hrun og óljóst virðist hvaða áhrif og hve mikil súrnun sjávar muni hafa á fiskistofnana og sjávarfang.

"Síldin lagðist frá" var viðkvæðið á Raufarhöfn, þegar ég kom þangað nokkrum árum eftir hrun síldarstofnsins og tók þar viðtöl við fólk.

Í þess huga var óhugsandi að veiðin á síldinni hér og í Noregi hefð átt nokkurn þátt í því að sildin hvarf skyndilega.

Flestir þekkja fyrirbærið áunna sykursýki, en það er fleira sem fólk getur áunnið.  

Þeir, sem andmæla nauðsyn rannsókna virðast margir gera það til þess að firra sig allri vitneskju um orsakir og afleiðingar.  Á ótal sviðum er tilhneiging til að vita sem minnst af því að það gæti verið óþægilegt.

 Það má kalla þetta fyrirbæri "áunna fáfræði" og hún gagnast þeim mest sem vilja vaða áfram af sem mestri græði og ábyrgðarleysi gagnvart framtíðinni.

Þegar það kom inn á borð þingnefndar fyrir tveimur árum að jarðvarmavirkjanir væru eins og námugröftur og einungis gert það skilyrði, að varmi og virkjanir entust í 50 ár, heyrðust viðbrögð hjá þingmönnum á borð við: "Ekki vissi ég það."

Samt hafði þetta legið fyrir í áratugi.   

   

Líkur á að lundavarp misfarist enn á ný

Athugasemdir

[Jón Valur Jensson, 14.6.2014 kl. 15:01]

áunninni -- þurrkaðu svo þetta innlegg út. :)

[Ómar Bjarki Kristjánsson, 14.6.2014 kl. 17:18]

Já já, blessaður vertu. Það er hægt að ávinna sér margt og margt.

Td. er alveg frægt að hægt er að verða áunninn vitleysingur eins og ofsa-hægrimenn sýna uppá dag hvern nánast.

[Erlingur Alfreð Jónsson, 14.6.2014 kl. 17:33]

Það er hægt að nota rökin um "áunna fáfræði" um alla umræðu ef uppi er gagnrýni á málflutning málshefjanda sem er honum ekki að skapi. Þá séu gagnrýnendur bara fáfróðir, illa lesnir eða bara vitlausir. Slíkt er ansi algengt á bloggsíðum og kommentakerfum. 

[Jósef Smári Ásmundsson, 14.6.2014 kl. 17:43]

Ég held að Gleymskan sé eina áunna fáfræðin sem til er svona fræðilega séð svo eiginlega er þetta rangnefni hjá þér. Það er miklu fremur að hægt sé að kalla þetta að loka skilningarvitunum fyrir þekktum staðreyndum. En svo er spurning hvort staðreyndirnar séu á hreinu. Það er hægt að efast um hlutina sem þá eru ekki lengur staðreyndir.