Líka barnasprengja 1941.

Eftir mesta efnahagshrun Íslandssögunnar var kreppa óhjákvæmileg, rétt eins og kreppa var óhjákvæmileg hér eftir að heimskreppan skall upp úr 1930. Sú kreppa dýpkaði sérstaklega hér á landi við hrun saltfiskmarkaðarins á Spáni vegna borgarastyrjaldarinnar þar 1936-39 og varð dýpst árið 1939 og fyrstu mánuði ársins 1940.  

Af því leiddi að árgangarnir á síðustu árum fjórða áratugarins voru frekar smáir, ekkert stærri en kreppuárgangarnir þar á undan.

Þetta sást vel á stúdentafjöldanum í M.R. 20 árum síðar, árin 1959 og 1960.  

Þótt hernám Breta 10. maí færði Íslendingum bullandi atvinnu og tekjur, fór afleiðinganna hvað snerti fæðingar ekki að gæta fyrr en níu mánuðum síðar, eða á árinu 1941.

Þótt ég sé fæddur í september 1940 er ég hreinræktað kreppubarn, svo fátækir voru kornungir foreldrar mínir í desember 1939.  

Innan við hundrað stúdentar voru brautskráðir frá M.R. 1960, en árið eftir og raunar eftir það varð fjölgunarsprengja.

Eðlilega voru allra fyrstu árin eftir Hrunið erfið en síðustu tvö ár hefur verið hægur efnahagsbati og er enn.

Ávextirnar af því eru hinir sömu og árið 1941, stórfjölgun fæddra barna.   

Sprengja í barneignum í sumar

Athugasemdir

[Ásmundur (IP-tala skráð) 14.6.2014 kl. 23:49]

1964 voru nýstudentar frá MR yfir tvö hundruð svo að  fjöldi þeirra hefur meira en tvöfaldast á aðeins fjórum árum. Reyndar var þetta met ekki slegið fyrr en fáeinum árum seinna.

[Þorsteinn Briem, 15.6.2014 kl. 00:52]

Fjölmennustu fæðingarárgangar Íslandssögunnar
Röð	Ár	Lifandi fæddir alls	Drengir	Stúlkur	Frjósemi
1	2009	5.026	2.561	2.465	2,22
2	1960	4.916	2.547	2.369	4,27
3	2010	4.907	2.523	2.384	2,20
4	1959	4.837	2.501	2.336	4,24
5	2008	4.835	2.470	2.365	2,14
6	1963	4.820	2.471	2.349	3,98
7	1964	4.787	2.375	2.412	3,86
8	1990	4.768	2.431	2.337	2,31
9	1957	4.725	2.469	2.256	4,20
10	1965	4.721	2.450	2.271	3,71

[Espolin (IP-tala skráð) 15.6.2014 kl. 01:59]

 "yfir meðaltali á flest­um fæðing­ar­deild­um á land­inu" miðað við tímabundnar og varanlegar lokanir minni fæðingardeilda vegna samdráttar í heilbrigðisþjónustu þá er fjölgun á stærri deildunum ekkert óeðlileg og þýðir ekki endilega fjölgun fæðinga. Alvöru fréttamaður hefði fundið heildartöluna til að hafa raunverulega frétt frekar en vangaveltur byggðar á ágiskunum. Sá er munurinn á vönduðum vinnubrögðum fagmanna og fálmkenndum þreifingum fréttasóða.

[Hrólfur Þ Hraundal, 15.6.2014 kl. 07:48]

Það er sniðugt eins og svo margt hér á spaugstofulandinu, hvað sprengingar eru orðnar algengar.

Það verður sprenging í bílasölu, sprenging í fæðingum og þá ef að líkum lætur sprengingar í uppáferðum og það er sama hvar er hlustað, aukning á sér ekki stað lengur, heldur virðist allt vera að springa í loft upp.

Því nær sem dregur að  fjölmiðlum því meira verður um sprengingar.  Væri ekki hægt að senda þetta sprengjufólk í jarðgangagerð?      

[Ómar Ragnarsson, 15.6.2014 kl. 10:23]

Réttmætar athugasemdir. Þegar fréttin er lesin dofnar strax yfir "sprengingunni" sem fullyrt er að sé í sumar, þótt sumarið sé varla byrjað, og smám saman fjarar sprengingin út og verður að fálmkenndri spá.