Besti staðurinn, - undir framsætunum.

Ford T var hvorki með bensíndælu né vatnsdælu. Það var í samræmi við kjörorð Henry Ford: "Það, sem er ekki í bílnumm bilar aldrei".

Þegar vélin hitaði upp vatnið í kælikerfinu, steig heita vatnið upp en það kalda, sem var þyngra, sökk niður. Kerfið var hannað þannig, að þetta myndaði hringrás. En hún var ófullnægjandi og þegar vélarafl var aukið í arftökunum, varð ekki komist hjá því að hafa vatnsdælu.

Benzíngeymirinn var rétt fyrir aftan og ofan vélina, beint fyrir framan framrúðuna, í Ford T, og bensínið rann því niður í vélina fyrir þyngdaraflinu, svo að bensíndæla var óþörf,  Svipað var þetta löngu síðar í Trabant.

En þettta var hættulegur staður vegna eldhættu, og því var geymirinn fluttur aftast í Fordbíla síðari tíma. Á síðari hluta 20. aldarinnar reyndist afturendinn líka vera varasamur staður á ýmsum bílum, svo sem fyrstu gerðinni af Ford Escort, Opel Kadett og Ford Pinto. 

Á Youtube má finna mynd af prófun, þar sem ekið er aftan á Ford Pinto svo að kviknar í honum.  

Sjálfur kom ég að dauðaslysi á Reykjanesbraut á þessum árum, þar sem Ford Escort snerist í hálku svo að bíll, sem kom úr gagnstæðri átt, ók á afturenda Escortsins, sem stóð þar með í ljósum logum, svo að ökumaðurinn brann inni í bílnum.  

Fyrir 75 árum var Willysjeppinn hannaður þannig að bensíngeymirinn var undir öðru framsætinu.

Kostir þess voru margir. 1. Geymirinn var nálægt þungamiðju bílsins og neðan við hana og jók því stöðugleika hans. 2.  Geymirinn var eins langt frá útjöðrum bílsins og unnt var að hafa hann og íkveikjhætta við árekstur því í lágmarki. 3. Geymirinn losaði um rými í afturhluta bílsins.

Næstum 70 árum síðar komu Honda-verksmiðjurnar með þá snilldarlausn varðandi rýmisnýtingu í Honda Jazz bílnum að hafa geyminn undir framsætum eins og hafði verið á Willys.

Fyrsta gerðin af Jazz var aðeins 3,85 metra löng en bauð samt upp á 350 lítra farangursrými, sem var miklu meira en á bílum af þessari stærð og jafnvel talsvert meira en á bílum sem voru hálfum metra lengri.

Ókostur þessarar staðsetningar getur verið sú að stela rými fyrir fætur aftursætisfarþega undir framsætunum, en hönnuðum Jazz tókst að lágmarka það óhagræði.

Nú kemur HR-V með geyminn þarna og er það vel. Þar á hann að vera.  

Honda með nýjan H-RV

Athugasemdir

[Már Elíson, 14.9.2014 kl. 23:20]

Ég eignaðist eitt sinn Ford Pinto ....Vissi ekki af þessari gífurlegu hættu fyrr en mér var bent á, og losaði mig þá við hann eins fljótt og ég gat.

Það var hins vegar glæpamaður sem plataði þennan bíl inn á mig, skömm fyrir hann (Gunnar) en þessi bíll gerði mér ekkert illt þennan stutta tíma meðan ég átti hann, en ég vissi af hættunni og get ekki fyrirgefið óþokkanum sem seldi mér hann, vitandi af innbyggða gallanum. - Þetta var ( og er ennþá) sölumaður dauðans.

[Stefán Þ Ingólfsson, 15.9.2014 kl. 00:07]

Minn fyrsti bíll var Willys jeppi,hann var með bensíntankinn undir bílstjórasætinu og var hann með mjög stóru loki sem lak þegar ég lenti í því óhappi að velta bílnum á hliðina ofan í skurð. Upp gaus mikil bensínlykt og vorum við bræðurnir fljótir að koma okkur út og sluppum með skrekkinn. Ég hef oft hugsað til þess hvað hefði getað gerst ef við hefðum verið reykjandi.

[Stefán Þ Ingólfsson, 15.9.2014 kl. 00:16]

Tekið skal fram að áfyllingin (lokið) var undir sætinu og þurfti að lyfta sætinu til að fylla á tankinn.

[Bjarni Gunnlaugur (IP-tala skráð) 15.9.2014 kl. 08:04]

Már @1 Hvernig losaðirðu þig við bílinn?  Hentirðu honum eða plataðir þú hann inn á einhvern annann eða sagðirðu þeim sem keypti frá gallanum?

[Már Elíson, 15.9.2014 kl. 08:17]

Bjarni#4 - Til að svara rætinni hugsun þinni þá henti ég honum, að sjálfsögðu. - Eða datt þér eitthvað annað í hug ?