Erfiðast: Lítið þjóðfélag og stutt síðan.

Síðbúin ákvörðun ríkissaksóknara um að lýsa yfir vanhæfni til að að veita endurupptökunefnd umsögn um viðhorf sitt til Guðmundar- og Geirfinnsmála lýsir í hnotskurn því sem er einna erfiðast við þetta mál, sem enn er eins og fleinn í samvisku þjóðarinnar:  - Þjóðfélag okkar er svo lítið, - það eru svo margir tengdir málinu á einn eða annan hátt og það virðist ekki vera nógu langt um liðið til þess að menn fái sig til þess að afgreiða það á þann eina hátt sem getur orðið lokalausnin.

Það verður að líta á það að stór hluti þjóðarinnar, jafnvel meirihluti hennar, hrópaði á það og heimtaði á sínum tíma að einhverjir yrðu sakfelldir fyrir hvarf tveggja manna, jafnvel þótt engin vissi hvað af þeim hefði orðið og að það vantaði bæði lík, morðvopn, tengngu óskyldra mannshvarfa og ástæður til meintra morða á þeim, sem hurfu. 

Þetta voru nornaveiðar, og nornaveiðar eru miskunnarlausar og eira engu, heimta dómsmorð ef svo ber undir.  

Málaferlin smugu inn í heiftarlega pólitíska baráttu þessara ára og drógu æðstu ráðamenn þjóðarinnar og sóma- og heiðurmenn inn i þau, sem gerði þau enn verri viðfangs og viðkvæmari enn ella hefði orðið fyrir fáránlega marga. 

Það verða 40 ár á næsta ári frá mannshvörfunum, sem þyrluðu moldviðrinu, stærstu sakamálum okkar tíma, upp, og það kann að sýnast langur tími en er virðist þó í raun of stuttur tími til þess að menn megni að gera málin almennilega upp, því miður.  

Réttast að víkja sæti

Athugasemdir

[Þorsteinn Briem, 2.10.2014 kl. 02:00]

Íslendingar eru of skyldir sjálfum sér.

En tímarnir breytast og kaffi nú gefið út um svefnherbergisglugga ömmu minnar á Baldursgötu 26.

[Pjetur Hafstein Lárusson, 2.10.2014 kl. 11:11]

Blessaður Ómar og fyrirgefðu framhleypnina.  Þannig er, að ég hef verið að pára niður hitt og þetta frá liðinni tíð, m.a. samskipti mín við Stefán Hörð Grímsson.  Sumt af þessu hef ég birt á fésbókinni undanfarnar helgar. 

En hvað um það.  Stefán Hörður sagði mér eitt sinn frá því, að Thorsari einn fór til Ameríku og lærði box.  Þegar heim kom, skoraði hann þáverandi Íslandsmeistara á hólm, en var rotaður í fyrsta höggi.  Íslandsmeistarinn var víst hálfgerður óreglugemsi.  Og nú er það spurningin, veistu hver maðurinn var?

Með fyrirfram þökkum,

Pjetur Hafstein Lárusson

[Ómar Ragnarsson, 2.10.2014 kl. 13:40]

Ef þú ert að spyrja um Thorsarann þá minnir mig að Thor Thors hafi lært hnefaleika.