Afar lúmskur sjúkdómur: Bakflæði.

Það var ekki fyrr en fyrir um tuttugu árum sem orðið bakflæði varð skyndilega að einhvers konar tískuorði í umræðunni hér á landi um sjúkdóma og heilsufar. 

Hér á landi var talað um brjóstsviða eða nábít ef mönnum varð illt á þann hátt sem fylgir bakflæði. 

Tveir nákomnir ættingjar mínir hafa greinst með bakflæði og í bæði skiptin var fyrst farið að leita að einhverju í hálsi sem orsök þess hvernig einkennini birtust í raddböndum og hálsi. 

Í fyrra tilfellinu var hafin leit að krabbameini þegar hið sanna uppgötvaðist. 

Ástæðan var sú að í láréttri legustöðu í svefni á næturnar rann magasýra upp í kok og brenndi raddbönd og háls. 

Ætla má að læknar Bandaríkjaforseta séu í fremstu röð, en svo er að sjá að sjúkdómsgreiningin hafi samt vafist fyrir þeim í fyrstu. 

1996 uppgötvaðist að ég væri með þennan fjanda og þá kom í ljós að ég hafði verið með bakflæðið allt frá tíu ára aldri þegar ég var í sveit í Langadalnum og hljóp til að ná í kýrnar eftir kvöldmat. 

Þá fékk ég svo slæmar magakveisur að engu lagi var líkt. Bóndinn á bænum, Björg,ömmusystir mín, var systir hins fræga smáskammtalæknis (hómópata) Bjarna Runólfssonar, og kunni ráð við þessu. Hún gaf mér natron og kveisan rénaði. 

1986 fékk ég þetta aftur en fékk ekki alveg rétta greiningu. Aftur var ég slæmur um hríð 1993 en hin endanlega sjúkdómsgreining kom ekki fyrr en eftir miklar meltingartruflanir upp úr og niður úr 1996.

Þá var fyrst með speglun á ristli, maga og vélinda hægt að taka á þessu með lyfjagjöf að einhverju gagni.

Bakflæðissjúklingar eiga kost á uppskurði þar sem neðsti hluti vélindans er þrengdur og gefst það flestum afar vel.

Þó eru dæmi þess að þetta hefur ekki tekist og orðið að endurtaka uppskurðinn.

Ég hef látið lyfjanotkun ásamt aðgát í mataræði nægja fram að þessu hvað sem síðar verður.  

Við speglun gefst manni færi á að sjá innyfli sín sjálfur, og vélindað var heldur betur eldrautt eins og svöðusár allan hringinn neðst við magaopið. 

Obama þjáist af bakflæði

Athugasemdir

[Sesselja Guðm. (IP-tala skráð) 7.12.2014 kl. 03:05]

Þekki þennan leiða mínus í heilsufari. Hósti um nætur (truflar svefn) og ræma að morgni. Minn læknir vill allsekki skera og telur að það sé tímabundinn friður, sem og að fólk geti ekki kastað upp eftirleiðis.  Þá er bara að halda frá sýrumyndun með því að borða hollt og ekki stuttu fyrir svefn.  Og drekka heitt sítrónuvatn með hunangi upp við dogg í rúminu - og lesa Moggann eða Guðberg!

[Arna (IP-tala skráð) 7.12.2014 kl. 09:04]

Bara ekki borða neitt síðustu 3-4 tímana áður en maður leggur sig

[Aztec, 7.12.2014 kl. 19:58]

"Bakflæðissjúklingar eiga kost á uppskurði þar sem neðsti hluti vélindans er þrengdur og gefst það flestum afar vel. Þó eru dæmi þess að þetta hefur ekki tekist og orðið að endurtaka uppskurðinn."

Þú ert væntanlega ekki að tala um Ísland.

Kunningi minn hefur þjáðst af óþægindum í hálsi alla sína ævi, og síðan þegar hann var kominn á sextugsaldur og hann kominn með stöðuga brjóstverki og mæði, greindist með meðfætt þindarslit. Þá fór hann fram á við sérhæfðan skurðlækni að hann yrði skorinn upp og magaopið þrengt á einhvern hátt. Þessari beiðni var hafnað með óskiljalegum hroka og dónaskap af hálfu þessa skurðlæknis.

Þá fór kunningi minn til heimilislæknisins síns og bað hann um tilvísun á annan skurðlækni. Þessu synjaði læknirinn og sagðist geta bara ávísað honum pillur og þá yrði allt gott. Þannig eru íslenzkir heimilislæknar, flestallir í vasa/á launalista lyfjafyrirtækjanna og hafa einungis áhuga á að fela einkennin í staðinn fyrir að lækna sjúkdóminn.

Kunningi minn er nú fluttur til annars lands í N-Evrópu og fær væntanlega lausn sinna mála þar eins og svo margir aðrir.

[Jón Logi (IP-tala skráð) 7.12.2014 kl. 20:43]

Það er skorið við þessu hérlendis. Móðir mín fór í þetta. En ekki er það gallalust, - allt eins líklegt að maður geti hvorki ropað né kastað upp eftirleiðis.
Sjálfur er ég svona, - þindarslitinn eftir óhapp, og með "aukamaga" á stærð við sítrónu ofan á vélindanu, og svo var bruni á vélindanu kominn af stað.
Vilji maður færustu skurðlækna í þetta getur maður farið utan, en þá tekur Íslenska heibrigðiskerfið engann kostnaðarþátt. Þetta losar milljónina í Frakklandi, þar sem mér skilst að heimsmeistarinn í þessum bróderingum starfi. Svo er það ca mánuður án áreynslu á eftir.
Þessu má smella framan í fésið á viðkomandi lækni.

[sveinn sigurður ólafsson (IP-tala skráð) 10.12.2014 kl. 12:18]

Ég hef hærra undir kollinum þegar ég sef og drekk mjólk þegar ég er sem verstur. (lækkar sýrustigið.)

Þetta böggar mig sjaldan núorðið. Kominn með höndl á þetta. 


Annars er mamma eins og hún fór í uppskurðinn. Hún er verri á eftir. 

Persónulega kem ég ekki nærri læknum og þeirra pillum og hnífum. 

Veist aldrei hvaða vandræði fylgja pillunni og þeir eru ekkert sérstaklega færir með hnífinn.