Skásta læknaviðtalið hingað til ?

Á Eyjunni í dag held ég að Björn Ingi Hrafnsson hafi átt skásta fjölmiðlaviðtalið sem hingað til hefur verið tekið vegna læknadeilunnar. Þar hjálpaði til ssú ákvörðun BInga að fara út fyrir þá sem eru inniá átakasviðinu núna og ræða við Björn Zoega.

Það var ekki aðeins að Björn Zoega gæti talað meira opinskátt og frjálsar um deilunar en þeir sem eru í forsvari fyrir deiluaðilum, og hefði góða sýn og þekkingu á umræðuefninui í ljósi fyrri yfirmannsstarfa á Landsspítalanum, heldur lagði BIngi réttar spurningar fyrir hann, svo sem þá grundvallarspurningu hver munurinn væri á hálaunuðum læknum og öðrum langskólagengnum mönnum sem líka væru með há laun. 

Svar Björns staðfesti það sem haldið hefur verið fram hér á bloggsíðunni, að á sérsviðu sínum hafa læknarnir sem hæst hafa launin starfað það lengi erlendis, bæði í sérfræðinámi og starfi, og eru það eftirsóttir á alþjóðlegum vinnumarkaði, svo sem í löndum innan EES, að þeir eiga auðvelt með að fá störf og vera hnútum næstum jafn kunnugir ytra og hér heima. 

Sé munur á aðstöðu og launum of mikill á milli Íslands og annarra landa, fara þeir einfaldlega úr landi á vit miklu betri kjara en hér og eiga auðveldara með það en flestir aðir. Ég hef nefnt dæmi um þetta, sem eru sláandi. 

Þess vegna verður að nást fram almennur skilningur á þessari sérstöðu, sem felur í sér helsta grundvallaratriði vandamálsins.

Sé þessi skilningur fyrir hendi og skynsamleg sáttaviðleitni, ætti að vera að ná sátt um lausn, sem þrátt fyrir meiri kjarabætur til lækna en samrýmast kjarakröfum annarra stétta, verður ekki látið gefa tilefni til það mikilla allsherja launahækkana annarra stétta og hópa, að verðbólgan fari úr böndum með þeim afleiðingum að enginn verður bættari og allir sitja eftir með sárt ennið, líka læknarnir.  

Vilja sáttanefnd í læknadeiluna

Athugasemdir

[Wilhelm Emilsson, 15.12.2014 kl. 03:35]

Takk fyrir að benda á þetta viðtal. Síðuhafi skrifar: „Þess vegna verður að nást fram almennur skilningur á þessari sérstöðu [spekileka], sem felur í sér helsta grundvallaratriði vandamálsins." 

En er ekki spekileki (brain drain) nokkuð sem á sér stað í öðrum starfsgreinum og í öðrum löndum? Með öðrum orðum, eru læknar raunverulega í svo mikilli sérstöðu þegar að þessu atriði kemur? Ef laun lækna hækka allt í einu miklu meira en laun annarra stétta, hvers vegna ættu aðrar stéttir að slá af kröfum sínum?  

Forsvarsmenn lækna setja málið þannig fram að aðgerðir þeirra snúist um grunnlaun lækna og að vernda heilbrigðiskerfið, ef ég skil málið rétt, en það sem kemur fram hér er að málið snýst um laun hæst launuðust sérfræðinganna.

En það er að sjálfsögðu löngu kominn tími á skynsama sáttaviðleytni og stjórnarandstaðan bendir á leið til þess, þ.e.a.s að setja sáttanefnd í verkið. Vonanda hlustar ríkisstjórnin á það.

[Þorsteinn Briem, 15.12.2014 kl. 07:52]

Ansi margt þar alveg klárt,
opin mörg hér kaunin,
Ómar nú með ennið sárt,
aldrei góð hans launin.

[Bjarni Gunnlaugur (IP-tala skráð) 15.12.2014 kl. 08:18]

Sammála því að þáttur Björns Inga er það skásta sem hingað til hefur sést í umræðum um þetta mál.

Spekileki er ágætt orð (sem ég heyrði fyrst í þættinum) um sérstæði þessa vanda. Ekki má gleyma öðrum heilbrigðisstarfsmönnum heldur, sem vel geta farið héðan sé launamunur of hár.

Ágætt að velta fyrir sér í þessu samhengi hvernig tekið hefur verið á skorti á kennurum og faglærðu leiksólastarfsfólki. Þar hafa ófaglærðir í gegn um tíðina, hiklaust verið fengnir til að fylla í skörðin.  Dettur einhverjum í hug að láta laghenntan bifvélavirkja skera sig upp í stað skurðlæknis? ;-)    

      En þó enginn væri spekilekinn þá er ekki í lagi með grunnlaun lækna.Hitt er enn óljóst (a.m.k. mér) þ.e. hvernig eru yfirvinnulaun þeirra uppbyggð? Hafa þeir há heildarlaun vegna mikillar vinnu eingöngu eða er frá gamalli tíð búið að lauma kjarabótum í yfirvinnuna vegna svipaðra vandammála og nú að hygla læknum sérstaklega í launum án þess að aðrir fylgi?

 Einn vandi íslenskrar kjarabaráttu er ógegnsæi vegna bútasaums og sparðatínings fyrri ára.

[Jon Hjaltalín Magnússon (IP-tala skráð) 15.12.2014 kl. 09:00]

Ómar þú segir: "..sem þrátt fyrir meiri kjarabætur til lækna en samrýmast kjarakröfum annarra stétta".

Væri ekki heimsklassa heilbrigðisþjónusta einhver besta "kjarabót" allra Íslendinga til að geta notið lífsins og elliáranna!

[Kjartan Sigurgeirsson, 15.12.2014 kl. 13:41]

Eftir lestur um óhemju mikið vinnuálag lækna spyr maður sig, gilda engin vinnuverndarlög yfir þetta fólk? 

[Wilhelm Emilsson, 16.12.2014 kl. 01:58]

Góður punktur hjá Kjartani.