Aldarafmæli loftárása á almenning.

19. janúar  síðastliðinn átti eitthvert svívirðilegasta athæfi stríðssögunar, skipulagðar og vísvitandi oftárásir á almenning, aldar afmæli. Þýskt Zeppelin loftskip flaug af hafi þennan dag inn yfir bæina Great Yarmouth og King´s Lynn á Englandi og varpaði sprengjum á þau.

Í kjölfarið fylgdi stigvaxandi lofthernaður af þessu tagi af hendi stríðsþjóðanna.

Í upphafi stríðsins höfðu einstaka flugmenn varpað sprengjum með höndunum á París, en árásin á Great Yarmouth og King´s Lynn er talin fyrsta loftárásin til þess gerð að drepa almenna borgara.  

Tíu fórust og tuttugu særðust í þessari fyrstu loftárás á almenna borgara 19. janúar 1915, en á þeirri öld, sem síðan er liðin, hafa drápin stigmagnast með aukinni hernaðartækni og milljónir manna verið drepnir á þennan hátt.

Engin þessara loftárása, allt til mannskæðustu árásanna á Hiroshima og Tokyo 1945, þar sem á annað hundrað þúsund manns voru drepnir í hvorri árás,  hefur verið skilgreind sem stríðsglæpur, enda hafa helstu stórveldin á þessum tíma ráðið ferðinni í því að skilgreina, hvað séu stríðsglæpir og hvað ekki.

Dapurlegast er þó að það voru kristnar þjóðir sem hófu hernað af þessu tagi og hafa síðan verið stórtækastar á þessu svipði, - voru nær einar um hituna fram til 1937, þegar Japanir bættust í hópinn í innrás sinni í Kína.

Þetta er ömurleg mótsögn við það brautryðjendastarf sem kristnar þjóðir hafa unnið í mannréttindamálum og lýðræði í samræmi við kenningar kristninnar.

Nokkur nöfn eru þekktust í sögu loftárásanna, árásin á spænska fjallabæinn Guernica 1937, árásirnar á London og aðrar breskar borgir veturinn 1940-41, árásin á Belgrad í apríl 1941, þar sem 17 þúsund voru drepnir, á Hamborg í júlí 1943, þar sem 42 þúsund voru drepnir, stór hluti þeirra í nýrri tegund af eldhafi eða eldstormum, sem soguðu fórnarlömbin inn í sig, og síðan svipuð árás á Dresden í janúar 1945 og Tokyo í sumarið 1945 þar sem meira en 100 þúsund fórust.

Í öllum þessum árásum var ekki um að ræða að eyða verksmiðjum fyrst og fremst eins og sést vel af mannfjöldanum sem fórst, svo sem í Belgrad, Dresden og Tokyo. Í Belgrad var einfaldlega ekkert skotmark sem hafði beina hernaðarlega þýðingu, heldur aðeins um það að ræða að "refsa" Júgóslövum og árásin nefnd "Operation Strafgericht".    

Tvær kristnar þjóðir, Bandaríkjamenn og Rússar, hafa í Kalda stríðinu komið sér upp vopnabúrum, sem getur eytt öllu lífi á jörðinni með lofthernaði á grundvelli hernaðarkenningarinnar MAD (Mutual Assured Destruction) eða GAGA, (Gagnkvæm Altæk Gereyðing Allra). 

Í stærstu loftárásum síðustu 100 ára voru hundruð þúsunda venjulegra borgara brenndir lifandi. En um það gildir það sem Stalín sagði, að það að drepa einn mann er morð en að drepa milljón er bara tala.

Þessi orð hafa minnt á sig þegar villimenn Íslamska ríkisins hafa brennt flugmann lifandi fyrir opnum tjöldum fjölmiðla svo að vakið hefur mikinn hrylling og viðbrögð um allan heim. 

 

Hefndinni hvergi nærri lokið

Athugasemdir

[Ómar Ragnarsson, 5.2.2015 kl. 21:05]

Stalín tókst aldrei að drepa rússneska kristni og hún heldur velli eystra enn í dag. Tölurnar um fallna í fyrstu loftárásinni á almenna borgara fyrir öld eru réttar, 10 látnir og 20 slasaðir. En þetta var alveg nýtt og þótti váleg og mikil frétt þá, enda rétt blábyrjunin á því drápsæði sem var að ganga í garð. 

[JónLogi (IP-tala skráð) 5.2.2015 kl. 21:37]

Ekki voru fjöldamorðin í Nanking og Manilla byggð á loftárásum né kristni, né af kristnum komin. Enginn fleytir heldur kertum yfir þeim ósköpum, enda gleymast þau voðaverk yfir þeim blossum sem settu síðasta kistunaglann í seinni heimstyrjöld....

[Þorsteinn Briem, 5.2.2015 kl. 22:39]

Enginn er betri en annar einungis vegna þess að hann aðhyllist einhver trúarbrögð.

[Ómar Bjarki Kristjánsson, 5.2.2015 kl. 23:57]

Stríðið stöðvaði aðför Stalíns að kirkjunni.   Trúin varð svo áhrifarík til að móbilisera fólkið í herinn og að berjast gegn innrás Nazista.  Og trúin var alltaf mikilvæg í fyrri stríðum Rússa og mikil saga þar að baki.

Í framhaldinu í raun leyfði Stalín starfsemi Rétttrúnaðarkirkjunnar aftur þarna um 192/1943.

En starfsemin var samt alltaf háð ákveðnum takmörkunum og það þurftu réttir menn að vera þar aðal eða með samþykki Flokksinns o.s.frv.

En ofsóknir liðu samt ekki undir lok við þetta og Krúsjoff tók aftur upp stefnu á vegum ríkis þar sem ofsóknum var beitt. 

[Ómar Ragnarsson, 6.2.2015 kl. 00:32]

Ég sé fyrst nú að orðið "þúsund" datt niður í tölunum um mannfall í Tokyo mannskæðustu árásunum.

Rétt er að taka undir það með Jóni Loga að stríðsrekstur Japana í Kína á árunum 1937 til 1945 var sennilega enn hryllilegri en dæmi eru um annars staðar.  

[Brynjólfur Þorvarðsson, 6.2.2015 kl. 05:48]

Sumir hafa sagt að fyrsta "loftárásin" á almenna borgara hafi verið eldflaugaárás Englendinga á Kaupmannahöfn 1807. Borgin brann og talið er að 195 manns hafi látið lífið.

En hvernig færðu það út, Ómar, að mannréttindi og lýðræði sé í samræmi við kenningar kristninnar? Ekki er mér kunnugt um eina einustu kristna kennisetningu sem hvetur til þess sem afkristnaðir franskir heimspekingar fundu upp og kallast mannréttindi - né til lýðræðis.

Kristni var ríkistrú flestra Evrópuríkja í minnst 1000 ár, oftast nær 1500 árum, og hvergi í sögu hennar er að finna áherslur á mannréttindi og lýðræði. Afkristnun samfélagsins á 19. og 20. öld leiddi til þess samfélags sem við búum við í dag, og sjálfsagt er helsti áhrifaþátturinn í hvorutveggja, afkristnun og mannréttindum/lýðræði, aukin velmegun og aukin menntun.

[Jón Logi (IP-tala skráð) 6.2.2015 kl. 07:37]

Fyrsta loftárásin sem beindist gegn almennum borgurum var á Feneyjar 1849. Notaðir voru loftbelgir.
Eldstormar í loftárásum komu svo til í seinna stríði, - sá fyrsti í árásinni á Hamborg 1943. Þessu fyrirbrigði var ekki stjórnað, heldur átti sér einfaldlega stað. Aftur svo í Dresden og Tókýó. Hefði annar eldstormur komið skömmu eftir loftárásina á Hamborg er reyndar talið líklegt að Þjóðverjar hefðu gefist upp. Eftir Hamborg hugleiddi Göbbels þann kost, svo og herráðið, og Hitler heimsótti ekki borgina eftir það.
Það er reyndar samhengi í þessum þungu loftárásum og villimennsku þeirra þjóða sem urðu fyrir þeim. Loftárásirnar á Tókýó og Dresden eru nokkru eftir uppgötvun veruleikans í Auschwitz annars vegar og Manilla hins vegar. Það var lítil miskunn gagnvart óvini sem uppfartaði sig svona. Hroðalegt einfaldlega, - og eins og venjulega eru fórnarlömbin óbreyttir borgarar.

[Móri (IP-tala skráð) 6.2.2015 kl. 16:51]

Enn í dag gera bandafylkjamenn loftárásir, bæði með fjarstýrðum og "venjulegum" flugförum á almenna borgara og drepa bæði fullorðna og börn, sjúklinga og gamalmenni, húsdýr og hvað sem fyrir verður af fullkomnu miskunnarleysi og tilgangsleysi, bara fyrir ánægjuna af því að drepa fólk! Það talar enginn fjölmiðill eða aðrir á svokölluðum Vesturlöndum um hryðjuverk í því sambandi?