Sérgróðaöflin látin ráða?

Það hefur flogið fyrir að skipulagsyfirvöld í Rangárþingi eystra standi frammi fyrir tveimur úrslitakostum þeirra sem ætla sér að planta niður hóteli þannig að það skemmi fyrir útsýni frá hringveginum að Skógafossi. 

Annars vegar að hafa hótelið og allt sem á eftir að koma í kringum það á þeim stað sem fjárfestarnir heimta. 

Eða að það verði ekki byggt neitt hótel. 

2007 er aftur hér. 

Á ferðum um Noreg liggur leiðin fram hjá nokkrum frægum fossum, svo sem Væringjafossi og Laatefossi. 

Hvergi hefur mönnum dottið í hug að fara að planta niður stórum byggingum þannig að þær taki fyrir útsýni að þessum fossum. 

Hjá Væringjafossi er hótelið vel til hliðar við fossinn og alls ekki í vegi fyrir ferðamönnum, sem eru á leið að fossinum. 

Sama er að segja um Laatefossinn þar sem byggingar eru hvergi nærri fossinum. 

Núverandi byggingar á Skógum eru á fínum stað, hæfilega langt frá veginum til þess að ekki sé truflun á hótelinu frá umferðinni um veginn, og þar er nóg rými fyrir fleiri byggingar. 

Í Bogaþjóðgarði (Arches National Park) í Utah-ríki í Bandaríkjunum er frægasti steinboginn svonefndur Viðkvæmi bogi (Delicate Arch) sem prýðir skjaldarmerki ríkisins, hvorki meira né minna. 

Ekkert hótel er nálægt þessum steinboga og raunar hvergi í þessum þjóðgarði, en væri áreiðanlega búið að umkringja hann af hótelum ef þetta væri á Íslandi. 

Þeir sem vilja að fjárfesta í nýju hóteli við Skóga ætla sér að græða sem mest á útsýninu úr hótelinu sjálfu og herbergjum þess og þeir græða þeim mun meira sem útsýni frá veginum er verra. 

Til þess að geta selt gistinguna á sem hæstu verði skirrast þeir ekki við að heimta sem mesta röskun á útsýni annarra til fossins og svo virðist sem þeir eigi undarlega greiða leið að sveitarstjórnarmönnum, sem eiga að standa vörð um hagsmuni almennings en ekki einhverra gróðapunga.

Þetta mál er ekkert einkamál þeirra sem hafa rekið það með endemis offorsi.

Skógafoss og næsta umhverfi hans er náttúruverðmæti sem okkur ber öllum að varðveita fyrir Íslendinga alla og mannkynið allt.  

Andstaða við staðsetningu nýs hótels

Athugasemdir

[Gunnar Heiðarsson, 16.2.2015 kl. 19:27]

Ef einungis þessir tveir kostir eru í stöðunni fyrir skipulagsyfirvöld í Rangárþingi eystra, ætti valið ekki að vefjast fyrir þeim. Ekkert hótel.

Það eru fleiri fjárfestar til en þeir sem vilja loka fossinn af og klárt mál að einhverjir eru tilbúnir í uppbyggingu þarna á skynsamlegum nótum. Kannski ekki strax, en að því kemur.

[Þorsteinn Briem, 16.2.2015 kl. 19:50]

Væntanlega getur hótel verið einhvers staðar á þessu svæði án þess að það komi í veg fyrir útsýni frá hringveginum að Skógafossi.

[Haukur Kristinsson (IP-tala skráð) 16.2.2015 kl. 19:53]

Það þarf svo sannarlega að hafa vakandi auga með þessu liði. Þessum græðgis og gróða pungum er trúandi til alls. Og bændurnir, sofandi út í haga. Eða eru þeir enn í Reykjavík að mótmæla símanum, blindfullir?

[Jón Logi (IP-tala skráð) 17.2.2015 kl. 09:30]

 Bændur eru í minnihluta sveitarstjórnar, - 2 af 7 og ein bóndakona. Þeir eru á móti þessu, jafnmikið og símastrengsmenn voru á móti loftskeytum. Sjá hér:
http://www.hvolsvollur.is/stjornsysla/sveitarstjorn/

Heimamenn undir fjöllum skilst mér að velflestir séu á móti.