Máttur hugans viðurkenndur en gylliboðin oft ótrúleg.

Ég hygg að varla sé til sá maður sem ekki hefur fengið gylliboð varðandi lækningar á hvers kyns sjúkdómum og líkamsástandi. Dæmi: 

Fyrir 36 árum féll ég fram fyrir mig af háu sviði í gamla samkomuhúsinu á Kirkjubæjarklaustri í lok lagsins Sveitaball, ætlaði að breyta fallinu í heljarstökk, en kom beint niður á höfuðið. 

Var aumur í nokkrar vikur en skánaði og hélt að allt væri í lagi.

En hnykkti síðan óafvitandi fimm árum síðar á meiðslinu á sjöunda hálslið frá 1979 með því að fara kollhnís afturábak á sviði í flutningi sama lags kvöld eftir kvöld á Broadway. 

Röntgenmyndir sýndu skýrt, að sjöundi hryggjarliður hefði skaddast það mikið að opið fyrir afltaugina út í hægri handlegg hafði hafði breyst úr því að vera kringlótt í það að vera aðeins mjó rifa, þannig að afltaugin hafði aðeins brot af því rými sem hún þarf að hafa. 

Læknar töldu mögulegt að fara inn að opinu með skurðlækningatæki og víkka það með því að skafa burtu kalkaðan örvef sem stíflaði taugaropið en með því værin tekin áhætta vegna nálægðar við mænuna. 

Niðurstaðan var einföld: Maður tekur ekki áhættu með sjöunda hryggjarlið með aðgerð sem getur lamað mann frá brjósti og niður úr. 

Nýlega fór ég í ómskoðun vegna vaxandi óþæginda og verkja en niðurstaðan er aftur sú sama: Meðan taugin er aðeins klemmd en ekki skemmd, borgar sig ekki að taka neina áhættu. 

Á þessum 36 árum hafa ótrúlega margir boðið mér upp á töfralausnir sem geti læknað þetta. 

Þegar ég hef sagt þeim að ég hafi sjálfur séð á röntgenmyndum, að um er að ræða harðan beinvef sem aðeins verkfæri geti fjarlægt, hafa þessir sölumenn samt haldið því fram að hægt sé að lækna þetta með ýmsum töframeðulum og eyða með þeim skemmdinni eða jafnvel með hálfgerðum andalækningum.

Vantrú mín á þessum gylliboðum stafar samt ekki af því að ég trúi ekki á mátt andans og hugans.

Þvert á móti tel ég hugurinn, andinn, sé fjórða víddin í tilverunni og sköpunarverkinu, raunar grundvöllur þess alls, og að sumum sé gefinn miklu meiri hæfileiki en öðrum til þess að senda hugskeyti eða taka á móti þeim.

Get ég nefnt dæmi sem styrkja mig í þessari trú á alveldissálina og mátt hugsans og andans.

En þegar þetta er komið langt út fyrir alla skynsemi, svo að það upphefur "beinharðar" staðreyndir í orðsins fyllstu merkingu svo að ömurlegt er að horfa á það á sjónvarpsskjánum, og ætlunin að hafa morð fjár af sjúklingum með ólæknandi sjúkdóma með því að spila á örvæntingu þeirra, er verið að skemma fyrir eðlilegri nálgun. 

Gaman væri að vita hvernig sölumaðurinn harði getur fullyrt, þegar hann er minntur á að rannsókn á hans kranavatni sýni, að það sé nær alveg eins og annað kranavatn, að hann "viti betur".

Ég kynntist Svani Sigurbjörnssyni lækni ágætlega fyrir átta árum og met hann síðan mikils fyrir réttlætiskennd og manngæsku sem nýtist mörgum í starfi hans og samtaka á borð við Siðmennt. 

Mér fannst athyglisvert og þótti vænt um, að í yfirvegaðri og vandaðri samantekt hans á lækningamætti fjölda lyfja og aðferða, sem hann sýndi okkur í Kastljósi, skyldi hann ekki afneita því mikilvægi andlegs hugarástands sjúklinga sem ekki er hægt að mæla beint, en hefur oft gríðarmikil áhrif til lækninga og bótar á heilsu.

Hann taldi rétt að láta óáreitta trú á ósannaðan árangur sem ekki skaðaði árangur sannaðra aðferða, en varaði við gylliboðum, sem eyðilegðu árangur sannaðra aðferða. 

Sama gerði landlæknir og þannig þarf að nálgast þetta mál.    

Ættu að ráðfæra sig við lækna

Athugasemdir

[Þorsteinn Briem, 5.3.2015 kl. 01:21]

Framsókn orðin niðurnídd,
næstum er nú horfin,
finnst nú bara í fjórðu vídd,
fjandi niðursorfin.

[Þorsteinn Briem, 5.3.2015 kl. 02:28]

Fjölmargir Rússar hafa mikinn áhuga á fjarhrifum (telepathy).

Kynntist því fyrst hjá rússneskri eiginkonu Óla föðurbróður í Svíþjóð.

Vinkona mín í Moskvu, ein ríkasta kona Rússlands og einn af innstu koppum í búri Pútíns, hefur mikinn áhuga á þessu fyrirbæri.

Hún er dyggur lesandi þessa bloggs og þar af leiðandi langt frá því að vera kjáni.

[Jón Logi (IP-tala skráð) 5.3.2015 kl. 06:51]

Nú skal ég leggja smá inn hérna.
Fyrir nokkrum árum var dóttir mín stöðugt með berkjubólgu. Sett aftur og aftur á sýklalyf, en ekki vannst slagurinn.
Eitt sinn sem oft, var ég hjá lækni með hana, og spurði nú bara í kerskni minni hvort að ekki væru til einhver alvöru lyf, - ekki bara þetta "sítrómax-ógeð"
Hann tók þetta alvarlega. Sagði mér að sonur hans, þá 8 ára ef ég man rétt, hefði haft sama vandamál og á endanum hefði hann sett hann á grasalyf!
Ég hafði samband við grasalækni og fékk bragðlausa blöndu sem hægt var að smygla út í bæði vatn og mjólk. Og viti menn! Henni bara batnaði og hefur verið hin hraustasta síðan!
Það sem hann sagði mér var hans skoðun, og ansi merkileg. Einfaldlega að okkar hefðbundnu lækningar geri sitt og það vitum við. Penicillin er til dæmis ótrúlegt lyf.
En....læknavísindi nútímans eiga eftir að kafa ofan í fjölmörar aðrar lækningar sem stundaðar hafa verið í hundruðir og jafnvel þúsundir ára.
Þetta virkar saman sagði hann, og það stóðst.

[Ómar Ragnarsson, 5.3.2015 kl. 09:16]

Grasalyfið þetta fellur væntanlega inn í þann stað á yfirliti Svans læknis, þar sem ekki er amast við því, af því að ekkert annað liggur fyrir en að það valdi engum vandræðum. 

Gallinn við alla lyfjagjöf og meðferð hjá einstaklingi er sá, að eftir á getur verið svo erfitt að afsanna að honum hefði ekki batnað hvort eð var.