Fært til sjónflugs norður en ófært sömu leið suður.

Svo ótrúlega sem það kann að hljóma getur verið ófært til sjónflugs frá Sauðárkróki til Reykjavíkur á sama tíma sem það er fært til flugs frá Reykjavík til Sauðárkróks. 

Þetta á við veður líkt því sem var í dag á þessari flugleið. 

Stundum ná élin ekki hátt og hægt að smokra sér yfir þau eða yfir éljagarða, þar sem eru skörð í þá. 

En að undanförnu hafa verið dæmi þess að éljaklakkarnir hafi náð upp í meira en 20 þúsund fet. Við slík skilyrði er oft ófært til flugs vegna éljanna, ef þau eru mjög dimm.

Í dag bar 40 hnúta suðvestanvindur éljagarðana frá Reykjavík í átt til Skagafjarðar.

Það þýddi, að hver éljagarður og jafnframt hver sólarglenna á milli þeirra var tæpa þrjár klukkustundir á leiðinni frá Reykjavík til Sauðárkróks.

Þetta auðveldaði mjög sjónflug þessa leið, ef viðkomandi flugmaður gaf sér nægan tíma til þess að halda sig inni á birtusvæðunum á milli éljanna ef él framundan virtist loka leiðinni.

Þá var fræðilega hægt að fljúga í heiðskíru veðri og sólskini alla leið á þremur tímum og jafnvel styttri tíma ef fær leið fannst í gegnum élin eða skörð á milli þeirra.

Ef engin él hefðu verið eða engar tafir vegna þeirra hefði flugtíminn orðið 50 mínútur. 

Öðru máli gilti um að fljúga frá Króki til Reykjavíkur. Mótvindurinn gerði það að verkum að jafnvel þótt engin él væru, varð flugtíminn, án nokkurra tafa vegna élja, tvær klukkustundir í stað 1 klst og 20 mínútna í logni.

Ofan á þetta hefði bæst að ef við segjum að 20 mínútur hafi liðið á milli éljagarðanna í dag hafi allt að tíu stykki verið á leiðinni hverju sinni og flugmaðurinn því neyðst til að fljúga í gegnum þá alla og einnig í gegnum sex viðbótar éljagarða, sem komust inn á leiðina á meðan á fluginu stóð.

Við blasir, að þetta hefur verið vonlaust í jafn dimmum éljum og voru í dag.

Nú er rétt að geta þess, að élin verða minni og auðveldari viðfangs þegar komið er norður fyrir heiðar og þá styttast flugtímarnir, sem nefndir eru hér að ofan. 

En tæplega hálf leiðin er sunnan heiða, svo að meginniðurstaðan er þessi: 

Það gat verið fært til sjónflugs frá Reykjavík til Sauðárkróks í dag að því gefnu að flugmaðurinn hefði nóg flugþol og gæfi sér nægan tíma, en ófært á sama tíma frá Sauðárkróki til Reykjavíkur.    

Lenti heilu og höldnu

Athugasemdir

[Bjarni Gunnlaugur (IP-tala skráð) 28.3.2015 kl. 00:31]

Góð pæling.

Hér er mögnuð atburðarás er sýnir hversu erfið élin geta verið í sjónflugi, saga af dómgreindarbresti,dugnaði,mistökum,láni í óláni, atburðarás sem leiddi til slyss og er ekkert voðalega erfitt að ímynda sér að hver og einn lítt reyndur einkaflugmaður gæti lent í þrátt fyrir allt.  Til þess eru jú flugslysaskýrslur að læra af mistökum annarra.

http://ww2.rnf.is/media/skyrslur/2003/TF-FTR_-_lokaskyrsla_send_til_adila_mals_-_Sett_a_vefinn.pdf