75 ára afmæli þriggja innrása.

Í handbók um Seinni heimsstyrjöldina, þar sem atburðarás hvers einasta dags er rakin frá upphafinu 1. september 1939 til 1. september 1945 tekur 10. maí 1940 mest rými. 

Ástæðan er sú að þennan dag voru þrjár innrásir á dagskrá. Í fyrsta lagi hin mikla innrás Þjóðverja inn í Niðurlönd og Frakkland, í öðru lagi innrás Breta í Ísland og í þriðja lagi innrás, sem sjaldan er nefnd, af því að ekki varð af henni, en það var innrás Þjóðverja í Ísland og sem Hitler setti á dagskrá. 

Ástæðan fyrir því að Foringinn gerði það var að samstundis sem hann frétti af því að Bretar hefðu tekið Ísland skipaði hann Raeder hershöfðingja að gera hið snarasta áætlun um það að hernema Ísland og hrekja Breta þaðan. Hitler fékk eitt af sínum frægu bræðisköstum viði þetta tækifæri. 

Hernám Breta hafði nefnilega mikilvægi, sem aldrei er minnst á, en það er sú staðreynd að það fól það í sér, að fyrsta skipti í sex ár höfðu Bandamenn frumkvæði í baráttunni við Hitler, en hann og Öxulveldin höfðu ævinlega fram að því haft frumkvæðið, alls tíu sinnum í röð, og ævinlega haft betur.

Þessi tíu skipti voru innrás Ítala í Abbesíníu 1935, hertaka Rínarlanda 1936, borgarastyrjöldin á Spáni 1936-39, innrás Japana í Kína 1937, innlimun Austurríkis 1938, innlimun Súdetahéraðanna 1938, innlimun Tékkóslóvakíu 1939, innlimun Albaníu 1939, hernám Póllands 1939 og hernám Danmerkur og Noregs 1940. 

Hitler skipaði fyrir um innrásina í Ísland þar sem hann var staddur í neðanjarðarbyrgi sínu í Eifel-fjöllum nálægt vesturlandamærum Þýskalands. 

Í tengslum við rannsóknir mínar á þessum málum fyrir kvikmynd / bók fór ég í leiðangur árið 2010 til þess að finna leifarnar af þessu byrgi og taka myndir þar, því að þetta er sögulegur staður fyrir okkur Íslendinga. 

Það var ekki auðvelt að finna byrgið, því að þegar Bandamenn náðu staðnum í janúar 1945 sprengdu þeir það í tætlur og síðan þá hafa Þjóðverjar ekkert gert með þennan stað. 

Fyrir hreina tilviljun hitti ég á rétta manninn, sem var að leggja bíl sínum í stæði ekki langt frá, og var tilbúinn að að leiðbeina mér til byrgisins, enda ætti hann heima næst því af öllum íbúum svæðisins. 

Byrgið er að vísu fallið saman, en þó er hægt að klöngrast inn í það á milli fallinna og brotinna þykkra steinveggja og standa í sömu sporum og Foringinn þegar hann skipaði fyrir um innrás sem hefði þýtt þjóðarharmleik fyrir Íslendinga.

Síðan má ekki gleyma því að 10. maí 1940 tók Winston Churchill við embætti forsætisráðherra Bretlands og fékk aukinn meðbyr fyrir hugmyndum sínum um að hernema Íslands og taka forystu fyrir einbeittri baráttu gegn Öxulveldunum.   

 

Athugasemdir

[Daníel Sigurðsson, 10.5.2015 kl. 21:00]

"75 ára afmæli þriggja innrása", segir þú. 

Er þetta ekki full-reyfarakennd fyrirsögn þar sem ekkert varð af hugsanlegri innrás Þjóðverja í Ísland?

Um miðbik pistilsins skrifar þú:

“Hitler skipaði fyrir um innrásina í Ísland þar sem hann var staddur í neðanjarðarbyrgi sínu í Eifel-fjöllum nálægt vesturlandamærum Þýskalands.“

Þarna er líka ofílagt að mínu mati, a.m.k. ef þessi setning þín á að jafngilda því að Hitler hafi fyrirskipað innrás í Ísland sem hann gerði aldrei. Enda hefði þá fyrirskipun Hitlers verið framfylgt. Varla þarf nokkur velkjast í vafa um það.

Það væri vel þegið að fá vitneskju um heiti og höfund þessarar handókar um Seinni heimsstyrjöldina sem þú vitnar til, ef þú vildir vera svo vænn.

[Ómar Ragnarsson, 10.5.2015 kl. 21:36]

Það er rétt hjá þér, að Hitler fyrirskipaði ekki innrás í Ísland í Eifel-fjöllunum en hann fyrirskipaði Raeder að gera Winnrásaráætlun og skal ég skerpa á þessu í texta mínum.

Þór Whitehead fjallaði nokkuð ítarlega um þessa áætlun sem Raeder gerði og bar heitið "Ikarus"

Bókin "Cronology of "World war II" týndist hér á heimili mínu um daginn en mig minnir að höfundur hennar heiti Christopher Argyle.  

[Ómar Ragnarsson, 10.5.2015 kl. 21:49]

Þess má geta að ég er að leita að bókinni þessa dagana, því að ég þarf að klára að lesa hana yfir í þriðja sinn á skipulegan hátt. 

Í fyrsta skiptið las ég hana dag frá degi frá 1. september 1989 til 1. september 1995, í annað skiptið frá 1. september 1999 til 1. september 2005 og er nú að klára þriðja lesturinn sem byrjaði 1. september 2009. 

Auk þessa hefur hún í ótal skipti reynst góð uppflettibók. 

[Droplaugur (IP-tala skráð) 13.5.2015 kl. 10:29]

Eftir innrásina í Noreg ,,misstu þjóðverjar nokkur skip og andspyrnan í noregi varð meiri en menn héldu,,,að auk var Hitler með þá hugaráráttu að vera með mikinn fastaher í vestur noregi því hann hélt að bretar myndu taka álasund og ströndina sunnar með stórum herþannig að hann hafði bara ekki vikt í sjóhernað breta til sóknar eftir að þeir  misstu  biskmark ,,,og kafbátar þjóðverja voru eina sóknarvopnið eftir það ,,og var þeim mikið beitt og framleiðsla aukin ,,skipið Tirpits spilaði vörn inní fyrði   eftir Bismark harmleikinn  Norðmenn sögðu mér að .Hitler hefði brennt  mikið af bóndabæum í vestur noregi til að hamla breska hernum ef hann kæmi.  Sá her kom aldrei . Hitler brenndi að auk Varsjá niður í öreindarúst . Stalín í skiftingu evrópu var á gráu svæði þar við bandamenn vegna póllands.  Bauðst þá í diplómatísku framhjáhlaupi til að byggja Varsjá eftir gömlum ljósmyndum.,,,,sem hann stóð við 110 prósent,,,nema gyðingahverfið hann vildi ekki gera neitt fyrir gyðingana,,,og er hið fræga gyðinga hverfi póllands hljómskálagarður  í dag.