"Gamla" veðrið komið aftur?

Síðustu 15 ár virðumst við Íslendingar vera orðnir of góðu vanir hvað veður og fiskigöngur snertir. Meðalhitinn á landinu og í hafinu suðvestur af því hefur fallið, en er þó bara um margt á svipuðu róli og var áratugum saman á árunum 1965-1995. 

Þá var enginn makríll og gott ef það var nokkur kolmunni, og fyrir 1970 var loðnan aldrei nefnd. 

Makríllinn virðist góðgjarn og friðsamur fiskur, því að ekki var fyrr farið ætlunin að setja hann í svo umdeildan kvótabúnin að þjóðarátök í formi allsherjar rifrildis vegna þjóðaratkvæðagreiðslu í forsetakosningum blöstu við, fór hann tók til sinna ráða og lét sig hverfa, að því eð virðist til að mótmæla því hve þrætugjörn við erum.    

Ég minnist fyrstu vikunnar í júlí eitt sumar á áttunda áratugnum þegar hann blés á suðvestan og hitinn var þetta mest 6-7 stig yfir hádaginn.

Það kann að vera að snjórinn á Laugaveginum sé með eindæmum um þessar mundir, en á þessum árum "í gamla daga" vissi enginn betur en að Laugavegurinn væri gata í Reykjavík og Eyjabakkar gata í Breiðholtinu.

Við erum fljót að gleyma, - hið kunna gullfiskaminni er samt við sig.

Og fréttasviðið nær skammt út frá Reykjavík. Norðan Vatnajökuls þar sem Holuhraun bíður eftir ferðamönnum, er snjólétt og verður sennilega fært þar um víða nokkuð fyrr en í meðalári.

Nú virðast aðeins nokkrir dagar í það að ég fari í fyrstu vorferðina á Sauðárflugvöll á Brúaröræfum til þess að taka þar smávegis til hendinni og auglýsa völlinn opinn og nothæfan fyrir allar flugvélar, sem fljúga innanlands.  

Fjöldi á leið í Laugavegsferðir

Athugasemdir

[Hilmar Hafsteinsson (IP-tala skráð) 11.6.2015 kl. 07:29]

Kostuleg bloggfærsla glópahlýnunarsinna í fullkominni afneitun.

Það kann að vera að snjórinn á Laugaveginum sé með eindæmum um þessar mundir, en Holuhraunið er snjólétt!

Náttúrulegar sveiflur hafa stjórnað veðráttu á jörðinni frá ómunatíð, Mann-gerð hlýindi stafa hins vegar af föndri undirsáta Barack Hussein Obama hjá NASA/NOAA með GISS-mælitölur.

[Þorkell Guðbrands (IP-tala skráð) 11.6.2015 kl. 18:17]

Örlítil ábending varðandi loðnuna, blessaða. Loðnugöngur voru þekktar fyrir 1970 og voru nokkuð árvissar en mismiklar eftir árum. Fólk á okkar aldri og eldra man vel eftir páskahrotunum svokölluðu, sem tengdust árvissum hrygningargöngum þessa smávaxna fisks og þess að átvaglið þorskur fylgdi í kjölfarið og át yfir sig af veisluföngunum. Sveiflur voru hinsvegar þá sem nú í stofnstærð loðnunnar og höfðu bein áhrif á þorskstofninn. Fiskifræðingar telja að hlýr sjór sé ekki samskonar áhrifavaldur í lífi og afkomu loðnunnar og t.d. makrílsins. Við, sem lifðum og hrærðumst í sjávarútvegi fyrir 1970 erum svolítið hissa þegar talað er um að fyrir 1970 hafi loðna aldrei verið nefnd. Um það er loðnan gekk á miðin, var yfirleitt skipt yfir í net, því eftir að hún var mætt á svæðið, þýddi ekkert að bjóða henni upp á beitta línu, nema fyrst eftir að hún kom í veiðanlegu formi upp að norðaustur og austur ströndinni var í einhverjum tilvikum reynt að veiða hana og flytja suður og vestur um fyrir línubátana til að nota í beitu áður en kvikindin gengu á miðin. En þetta var aldrei í miklu magni að mig minnir.

[Ómar Ragnarsson, 11.6.2015 kl. 19:05]

"Norðan Vatnajökuls, þar sem Holuhraun bíður ferðamanna..." þýðir svæðið norðan Vatnajökuls, sem leiðin að Holuhrauni liggur um, alveg frá Dyngjujökli norður á Mývatnsöræfi. 

[Hallgrímur Hrafn Gíslason, 12.6.2015 kl. 10:10]

Reyndar var byrjað að veiða loðnu 1963 og eftir ´64 í tölverðu magni og öll ár eftir það utan eitt ár um 1980 þegar loðnan fannst ekki í nægu magni til að veiðar yrðu leifðar.