AÐ VERA VIÐBÚINN

Margir hafa æst sig út af ESB að undanförnu. Það er þó að mínu viti ekki kosningamál að sækja umsvifalaust um inngöngu. Enginn leggur það til. Hins vegar finnst mér það ábyrgðarleysi að vera ekki við öllu búinn. Enginn veit með vissu hve vel krónan mun spjara sig á næstu árum og hvort og í hve miklum mæli evran muni sækja á.

Þá verða menn að vera viðbúnir því að gera ráðstafanir í samræmi við það ástand sem kann að skapast. Ferlið er langt: Að uppfylla skilyrði um inngöngu, forma samningsskilyrði, fara í viðræður, athuga um stjórnarskrárbreytingu og halda þjóðaratkvæði. Þetta getur tekið meira en eitt kjörtímabil.

Hingað til hafa menn einblínt á það eitt að hafa bara plan A: Að bíða og eiga það á hættu að vera óviðbúinn þegar eitthvað kemur upp á. Það er hins vegar hygginna manna háttur að því að hafa líka plan B: Vera víðbúinn og hafa unnið heimavinnu sína ef til þess kemur að ESB verður á dagskrá.  

EES-samningurinn hefur dugað okkur vel, haft mikil og góð áhrif á mörgum sviðum, og nú vilja allir þá Lilju kveðið hafa þótt sumir berðust hatramlega gegn þeim samningi á sínum tíma. Að ýmsu leyti höfum við afsalað lagasetningu okkar í hendur alþjóðlegum stofnunum og þurfum að sæta því, svo sem dómum mannréttindadómstóls. Samt teljum við okkur fullvalda þjóð og erum stolt af því.

Aðalatriðið er að hafa full og óskoruð yfirráð yfir auðlindum lands og sjávar. Ef sú skoðun sem Þorsteinn Pálsson viðraði nýlega, að það sé hægt tryggja það í raun í samningum við ESB þá gæti það verið lausn sem hægt yrði að una við ef það ástand kæmi upp að aðildarumsókn yrði á dagskrá.  

Athugasemdir

[Óskar Helgi Helgason (IP-tala skráð) 16.4.2007 kl. 23:57]

Heill og sæll, Ómar !

Eftir því, sem á hefir liðið útmánuði; þá hvarflar að mér; hvort grunnhyggni eða þá hrein og klár æfintýramennska sé megin undirrót hinnar ágætu Íslandshreyfingar - lifandi lands. Dapurlegt er til þess að vita, að þið; frumkvöðlar hreyfingarinnar; hver kennd er við okkar föðurland, skulið, já skulið ýja að því, að Ísland sæki um inngöngu, í hið nýja Stór- Þýzkaland og þess ryckti.

Til hvers var þá unnin, frelsisbarátta þjóðarinnar, á undanförnum rúmlega tveim öldum ? Eru kannski hinir kapítalízku ''útrásar'' liðar farnir að leggja línur ykkar, um ofurvald peninganna, umfram manngildið, og þá nauðsyn, að forða því; að Íslendingar verði ei kaffærðir í þjóða hafi meginlands Evrópu ? Hélt, að þið eftirlétuð hinum flokkunum Evrópu glamrið.

Jah.... miklir menn erum við, Hrólfur minn.

Með beztu kveðjum, úr Árnesþingi /

Óskar Helgi Helgason, frá Gamla Hrauni og Hvítárvöllum

[Jónas Björgvin Antonsson, 18.4.2007 kl. 10:22]

Sæll.

Mér fannst þú góður í gær. Hressandi að sjá "pólitíkus" sem svarar hreint, snarpt og án undanbragða. Mér fannst hugmyndin um flugvöllinn athygliverð og myndi gjarnan vilja sjá þig skrifa um hana nokkrar línur hér á blogginu. Ég held það þurfi bæði kjark og áræði til þess að leggja fram nýjar hugmyndir og það er gott að einhver er tilbúinn til þess að gera það.

J#