Samsöngur reyndist vel í vinnu stjórnlagaráðs.

Fyrir fáu af því sem ég hef tekið mér fyrir hendur hef ég kviðið jafn mikið og því að starfa í stjórnlagaráði.

Í ráðinu var allt litróf þjóðfélagsins, allt frá ysta hægri til ysta vinstri og anarkisma, frá 24 ára konu til sjötugs karls, frá bónda að norðan til stærðfræðings með pólsku nafni. 

Helmingur fólksins hafði áður starfað á vegum flokka, allt upp í þingmennsku og skiptust nákvæmlega í sömu hlutföllum og þá voru á milli stærðar flokkanna .

Ekki vantaði ótrú og hrakspár um starfið, enda engin furða, því að miðað við viðvarandi ósætti á Alþingi voru líkurnar á tómu þrasi og togstreitu yfirgnæfandi.

Eins og þetta virtist vonlaust og kvíðvænlegt fyrirfram hef ég sjaldan orðið jafn undrandi og glaður yfir nokkrum hlut eins og því hvernig þetta varð þvert á móti að skemmtilegustu og mest gefandi vinnu, sem ég hef tekið þátt í.

Mikilsvert var að frá upphafi og í nokkrar launalausar undirbúningsvikur áður en eiginlega starfið hófst, var unnið afar skipulega og markvisst að því að búa til vinnuplan og áætlun um það hvernig starfið yrði framkvæmt og meðal annars höfð hliðsjón af vinnulagi með vísindalegu heiti sem reynst hafði vel erlendis.

Sumt af því sem gerði það ómögulega mögulegt virtst ekki stórt í sniðum, svo sem það að framkvæma þá tillögu Þorvaldar Gylfasonar að hefja hvern fund alls ráðsins með hressandi og sameinandi söng.

Þetta reyndist afar vel. 

Vill byrja þingfundi á söng

Athugasemdir

[Espolin (IP-tala skráð) 24.6.2015 kl. 01:31]

Það kallast múgsefjun. Mjög vinsælt hér á árum áður að taka lagið til að þjappa hópnum og eyða einstaklingshyggjunni áður en farið var í að berja á gyðingum. Þá þarf ekki nema ör fáa einstaklinga til að leiða stóran hóp sem aldrei færi þá leið sem einstaklingar. "Kórinn" verður hin lifandi vera og einstaklingarnir hætta að hugsa sjálfstætt. Það ómögulega verður mögulegt og hið óhugsandi verður að veruleika.

[Elín Sigurðardóttir (IP-tala skráð) 24.6.2015 kl. 08:41]

Geta ekki allir haft svona samsöng heima hjá sér og fengið borgað fyrir það?  Það kæmi sér afar vel.

[Ómar Ragnarsson, 24.6.2015 kl. 10:37]

Í stjórnlagaráði hættu einstaklingarnir ekki að hugsa sjálfstætt og einstaklingshyggjunni var ekki eytt meira en það, að á opnum fundum ráðsins, sem sjónvarpað var beint, voru á annað hundrað atkvæðagreiðslur um tillögur einstakra fulltrúa. 

Enginn fulltrúi var alltaf í meirihluta, heldur lentum við öll oft í minnihluta og oft í meirihluta. 

Sem dæmi má nefna að tillaga mín um að með hliðsjón af ákvæðinu um að eignarrétturinn væri heilagur, en síðan væru nefndar undantekningar frá því, væri annað ákvæði í upphafi kaflans um náttúruna: "Náttúra Íslands er heilög" og í tengslum við það fylgdi hvernig því yrði nánar skipað og hvaða undantekningar yrðu á því. 

Þetta var fellt með litlum atkvæðamun og einnig var felld með eins atkvæðis mun tillaga að transfólk yrði nefnt í upptalningu hópa í mannréttindaákvæðinu.

Samt sem áður var unnið á grundvelli þessara niðurstaðna með jákvæðni að leiðarljósi að því að laða fram bestu mögulegu niðurstöðu í stað þess að einstakir hópar hlypu niður í skotgrafir eins lenska hefur verið á Alþingi. 

Í nefndinni, sem vann að kosningakafla stjórnarskrárinnar, komu strax fram afar ólík sjónarhorn, allt frá því að hafa einstaklingskjördæmi og mikið misvægi atkvæða, yfir í það að hafa landið eitt kjördæmi og að hver kjósandi mætti kjósa hvaða frambjóðendur sem hann vildi á öllum listum.

Undir góðri stjórn Pavels nefndarformanns unnum við úr þessum hugmyndum á þann hátt að sérlega áhugaverð og góð niðurstaða fannst.   

[Espolin (IP-tala skráð) 24.6.2015 kl. 12:57]

Undir góðri stjórn Pavels....

Múgsefjun virkar best þegar einstaklingurinn telur sig ekki vera undir stjórn annars. Þegar einstaklingurinn heldur að hjarðhegðun hafi engin áhrif á hann og kaupir fótanuddtæki vegna þess að það sé akkúrat hluturinn sem hann getur ekki verið án.

Múgæsing, hjarðhegðun og heilaþvottur eru náskyld fyrirbæri. Og leiðtogar kunna að leiða hóp í allar áttir þó einstaklingarnir telji sig hafa frjálsan vilja. Eitt trikk sem gjarnan er notað er að spyrja aðeins spurninga þar sem "já" er svarið. Allt virðist þá jákvætt og án áhrifa frá öðrum. Þannig má leiða fórnarlambið ánægðan frá eigin sannfæringum og lífsskoðunum. Og fórnarlambið er sannfært um að það hafi ekki verið beitt blekkingum.

Oft er það þannig að þátttakendur sjá ekki hvað er að ske og telja sig vera að gera hlutina af frjálsum og fúsum vilja án áhrifa frá öðrum. Kaupa fótanuddtæki, gefa sértrúarsöfnuði eigur sínar, semja stjórnarskrá, grýta þinghús o.s.frv. Og undrun þeirra er mikil og skilningur lítill þegar utanaðkomandi sjá ekki snilldina.