Andi Hrunsins aftur kominn á kreik?

Í aðdraganda Hrunsins urðu fræg ýmis uppátæki íslenskra viðskiptajöfra, svo sem að kaupa Elton John fyrir uppsett verð til landsins, fljúga bunkum af þyrlum og einkaþotum og reisa voldugar sumarhallir. 

Stórbrotnust var þó áformið um að reisa þvílíka risabyggingu Landsbankans á mest áberandi staðnum í gamla miðbænum, að aðrar byggingar yrðu eins og dúfnakofar í samanburðinum. 

Þetta var sagt að ætti að gera fyrir ofsagróðann af umsvifum íslenskra fjármálasnillinga sem væru að leggja fjármálalíf heimsins að fótum sér. 

Fólk tók andköf af hrifningu við á horfa á myndir af þessum stærsta gullkálfi í sögu norrænna þjóða, sem dansað skyldi í kringum. 

Átta árum síðar virðist sem byrja eigi að grafa þennan gullkálf upp úr gröf sinni og núna fyrir fé almennings.  

Fúlsað er við lóð á eðlilegu og viðráðanlegu verði og bruðlað strax í upphafi fjáraustursins með því að kaupa dýrustu hugsanlegu lóð á stað þar sem viðskiptalífið er þegar að mestu farið í burtu austur eftir borgarlandinu og gamli miðbærinn orðinn fullur af kraðaki hótela og veitingastaða. 

Á sínum tíma var okkur sagt að skrímslið mikla yrði kostað af einkafé ofurmenna á fjármálasviðinu. 

En núna er bankinn að hálfu í eigu almennings og menn depla ekki auga þótt spreða eigi almannafé í nýtt bruðl. 

Enda ekki furða þótt menn sjái hallir í hillingum, svona beint í kjölfarið á því að forsætisráðherrann hefur mælt með því að reisa risa álver í landi eyðijarðar í Skagabyggð án þess að nokkur orka sé fyrir hendi og stóla eigi á það að fé, sem launþegar hafa lagt í lífeyrissjóði, verði notað til að borga brúsann. 

Hefur eitthvað breyst frá árinu 2007?

Hefur eitthvað lagast? 

Eða er andi Hrunsins aftur kominn á kreik? 

 

Landsbankinn hafnaði ódýrari lóðum

Athugasemdir

[Elín Sigurðardóttir (IP-tala skráð) 11.7.2015 kl. 08:48]

Þeir eiga líka og reka fyrirtæki í samkeppni við almenning.  Það þykir sjálfsagðasti hlutur í heimi að skaða samkeppni í landi þar sem ÁTVR er við lýði.

[Bjarni Gunnlaugur (IP-tala skráð) 11.7.2015 kl. 09:33]

Landsbankinn er í boði ykkar Samfylkingarmanna.

Þetta "Frankenstein" skrímsli settuð þið í gang og skópuð alla umgjörð, ásamt V.G. 

[Villi Asgeirsson, 11.7.2015 kl. 09:35]

Skipting eignarhalds á Landsbankanum
Ríkissjóður Íslands: 97,9%.
Landsbankinn hf.: 1,3%.
Starfsfólk bankans: 0,8%.

Ríkið hlýtur að vera í aðstöðu til að stoppa þetta rugl. Ekki að ég sjái Bjarna Ben gera eitthvað svo skynsamlegt, en má ekki reyna? Hefur Alþingi einhver völd í þessu máli?

[Jónas Gunnlaugsson, 11.7.2015 kl. 11:38]

 

 

Fé almennings, fé í lífeyrissjóði.

„Og núna fyrir fé almennings,“

fé er bókhald,

Allir peningar eru bókhald,

Bókhaldið er ávísun á vinnu og hugsun fólksins,

og náttúruauðlindir.

000

„Fé í lífeyrissjóði“

Fé, bókhaldstala í lífeyrissjóði er aðeins bókhald.

Með öðrum orðum, lífeyrissjóðurinn er aðeins hugmynd, tala í tölvu.

Það eina sem getur (greitt þér lífeyri,) annast þig,

er þróttmikið þjóðfélag, þar sem fólkið framleiðir vörur og veitir þjónustu.

Þá er eitthvað til fyrir þetta bókhald, það er lífeyrissjóðinn, til að ávísa á.

Egilsstaðir. 11.06.2015  Jónas Gunnlaugsson

 

[Jónas Gunnlaugsson, 11.7.2015 kl. 12:06]

Eiga lífeyrissjóðir að eiga álver?

Ég veit það ekki, og ég er hugsi.

000

Þegar útlendur aðili kemur og byggir álver, fyrir sína peninga, sitt bókhald, verður sjálfur að standa skil á endurgreiðslu, þá reynir aðilinn að láta verksmiðjuna vera í rekstri.

Ef íslenskur lífeyrissjóður lánar í verksmiðjuna, og það kemur erfitt rekstrartímabil, þá er trúlegt að erlendi aðilinn reyni frekar að halda sinni verksmiðju í útlandinu gangandi.

Ekki er ólíklegt að sagt yrði við íslenska lífeyrissjóðinn.

Þú getur hirt verksmiðjuna, eða lækkað skuldirnar og vextina.

Þitt er valið.

Egilsstaðir, 11.06.2015  Jónas Gunnlaugsson

[Þorsteinn Briem, 11.7.2015 kl. 12:10]

"... bruðlað strax í upphafi fjáraustursins með því að kaupa dýrustu hugsanlegu lóð ..."

Ég hélt að Ómar Ragnarsson vildi víkingasafn á þessari "dýrustu hugsanlegu lóð", í stað þess að hafa það úti á Granda.

[Þorsteinn Briem, 11.7.2015 kl. 12:13]

"... þar sem Ingólfur Arnarson hélt fyrstu landsnámsathöfnina ..."

"Víkin eða Reykja(r)vík er heiti á vík í suðurhluta Kollafjarðar í Faxaflóa. Hún nær frá Laugarnesi í austri að Örfirisey í vestri."

[Þorsteinn Briem, 11.7.2015 kl. 12:30]

"... viðskiptalífið er þegar að mestu farið í burtu austur eftir borgarlandinu ..."

Höfuðstöðvar Arionbanka eru skammt frá Höfðatúni, þar sem nú er stærsta hótel landsins, hvorutveggja vestan Kringlumýrarbrautar í Reykjavík.

Og útibú Íslandsbanka í Lækjargötu er nú á Granda, sem er vestan Lækjargötu.

[Þorsteinn Briem, 11.7.2015 kl. 12:46]

Eins og undir Hörpu verða gríðarstórir bílakjallarar undir nú óbyggðum stórum reitum sitt hvoru megin við Geirsgötu:

[Þorsteinn Briem, 11.7.2015 kl. 13:05]

Í fyrradag:

"Starf­semi Lands­bank­ans í Reykja­vík fer fram í mörg­um hús­um víða í borg­inni. Þar af eru fjór­tán hús í Kvos­inni og aðeins fjög­ur þeirra í eigu bank­ans. Leigu­samn­ing­ar eru flest­ir til skamms tíma, á bil­inu 1-3 ár."

"Með ný­bygg­ingu næst fram mun betri nýt­ing á hús­næði en nú er. Lands­bank­inn rek­ur starf­semi á tæp­lega 29 þúsund fer­metr­um á höfuðborg­ar­svæðinu en ný­bygg­ing­in verður um 14.500 fermetrar auk 2.000 fermetra í kjall­ara fyr­ir tækn­i­rými og fleira.

Með þessu fækk­ar fer­metr­um und­ir starf­semi bank­ans á þessu svæði um allt að 46%."

"Áætlan­ir gera ráð fyr­ir að ár­leg­ur rekstr­ar­kostnaður vegna hús­næðis lækki um 700 millj­ón­ir króna og að fjár­fest­ing­in borgi sig upp á um tíu árum."

Lands­bank­inn bygg­ir við Aust­ur­höfn

[Ómar Bjarki Kristjánsson, 11.7.2015 kl. 16:34]

Það er eitthvað íslenskt við anda hrunsins.

Kannski er íslenski draumurinn andi hrunsins.

Á þessu byggja svo sjallar og framsóknarmenn fylgi sitt flestum til bölvunnar.

[Vilborg Traustadóttir, 11.7.2015 kl. 20:25]

Við lærum aldrei neitt. 

[Óskar Helgi Helgason (IP-tala skráð) 11.7.2015 kl. 20:27]

Sæll Ómar - sem og aðrir gestir þínir !

Það vantaði ekki - skrúðmælgina: sem og fögur fyrirheitin / til okkar reikninga eigenda Sparisjóðsins sáluga á Suðurlandi (í Selfoss skíri): sem og í Vestmannaeyjum á Vordögum s.l.: þá Steinþór Pálsson hóf upp raust sína, til þess að véla okkur til viðskipta, við þetta SKRÍMSLI sitt, sem Landsbankinn er að orðinn, fyrir tilverknað HAND- ÓNÝTRA ísl. stjórnmálamanna: stjórnmálamanna, sem firra sig ALLRI ábyrgð, á stöðu sívaxandi útþenzlu Banka Mafíunnar, hér á landi.

Ekki: var það einu sinni, inni í Gylliboða skvaldri Steinþórs Pálssonar, að hann hygðist lækka sín persónulegu OFUR- laun hjá Banka nefnu sinni - þó ekki væri,nema um svona cirka 6 - 700.000.- Krónur pr. mán., til þess að geta sýnt snefil sómakenndar, til sinna viðvarandi viðskiptavina, hvað þá til þeirra, sem hann hrakti frá Sunnlenzku Sparisjóðunum, aukinheldur.

Nei - aldeilis ekki: þessi Græðginnar ofurseldi Maura- Púki / Steinþór, er svo aldeilis heltekinn gráðugri hentistefnu og ósvífni yfirboðara sinna í stjórnarráðinu suður við Lækjartorg í Reykjavík: þeirra Bjarna Benedikts sonar og Sigmundar Davíðs Gunnlaugssonar / að hann fær að özla áfram, að óbreyttu, í skjóli þeirra andstyggilegu varmenna, húsbænda sinna, áður nefndra.

Er nema von - að Ómari síðuhafa: sem öðrum hófstilltum og hógværum sam löndum hrjósi hugur, við fyrirætlunum þessarra gárunga, og FLOTT RÆFLA ?

Og - enn: grasséra verðtryggingar ómyndin og okur vextirnir, í skjóli þessarra Skúma og varmenna !!!

Hversu lengi - hyggjast landsemnn ætla að líða þessum ódámum sú ósvinna, til dæmis ???

Með beztu kveðjum sem oftar: af Suðurlandi /   

[Þjóðólfur í Frekjuskarði (IP-tala skráð) 11.7.2015 kl. 20:41]

Ómar er stuttur í spuna,

sneyptur sér dansinn duna,

bezta lausnin endanleg er,

byggggðastefnu taka ber,

og byggja Landsbanka-danshöll í Hruna!

 

 

[Óskar Helgi Helgason (IP-tala skráð) 11.7.2015 kl. 22:58]

.... landsmenn: átti að standa þar. Afsakið - hnökra þá, sem ritvillur, sem finnast kunna, í texta mínum / hér efra, að nokkru.

ÓHH

[Bjarni Gunnlaugur (IP-tala skráð) 12.7.2015 kl. 00:18]

Jónas Gunnlaugsson, ég er sammála þér með það að alveg er sama hvaða reikningskúnstir og papírstígrisdýr menn búa til, þeir sem  vinna halda uppi þeim sem ekki vinna.

   Alltof mikið er um að fólk haldi að sjóðir séu sjálfstæð fyrirbæri með sjálfstætt líf. 

Eina sannleikskornið í því að peningarnir vinni fyrir aldraða Íslendinga, en ekki vinnandi Íslendingar,  er þegar lífeyrissjóðirnir fjárfesta erlendis. En þá eru það erlent vinnandi fólk sem halda að einhverju leiti uppi innlendu óvinnandi fólki. 

Ef menn gerðu sér almennilega grein fyrir þessu þá myndum við hætta þessu sjóðasukki lífeyriskerfisins sem er að verða eins og krabbamein í þjóðarlíkamanum, veldur m.a. hækkuðu íbúða- og leiguverði á höfuðborgarsvæðinu.

Miklu eðlilegra og einfaldara væri að taka upp gegnumstreymiskerfi, greiða af sköttum til aldraðra og öryrkja. Enda er það gert í raun hvort sem er.

Pappírstígrisdýrin eru fóðruð annarsstaðar!

[Bjarni Gunnlaugur (IP-tala skráð) 12.7.2015 kl. 00:51]

Menn dönsuðu‘ og dufluðu´í Hruna

og dröbbuðu mjög ritninguna

en misgengið small

í messu varð fall

margan fór þarna að gruna

 

að alls ekki eigi að dansa

og alltaf sé gleðin til vansa

er það nú Guð

sem ekki vill stuð

eða neinn skemmtanabransa

menn ætla að virkja hér víða

með verksmiðjum landið skal prýða

magnað er þá

að misgengi á

sé meiningin enn þá að smíða