Stingur í stúf við áróður talsmanna áliðnaðarins.

Að undanförnu hefur farið fram sérkennileg deila á milli Ketils Sigurjónssonar orkubloggara og launaðra talsmanna áliðnaðarins um orkuverðið, sem fyrirtækin borga hér á landi. 

Ketill hefur flett ofan af upplýsingagjöf talsmannanna varðandi orkuverðið og meðal annars sýnt fram á að Alcoa og Norðurál borgi lægra verð en í Afríku, álfu arðráns og fátæktar.

Talsmennirnir hafa skrifað hverja blaðagreinina á fætur annarri um það hve vel fyrirtækin séu rekin, hvað gengi áliðnaðarins sé gott í heiminum og álverðið hátt og hvað álverin leggi mikið til þjóðarbúskaparins.  

Svo dettur allt í einu inn setning í einni frétt fyrir nokkrum dögum: Álverð hefur ekki verið lægra á heimsmarkaði í sex ár! 

Og síðan einn fréttaskýringaþáttur í fyrra um það að Alcoa borgi ekki krónu í tekjuskatt af ca 20 milljarða króna árlegum tekjum sínum, heldur komi gróðanum ósnertum úr landi með bókhaldsbrellum. 

Samkvæmt upplýsingum Ketils borgar álverið í Straumsvík heldur skárra verð fyrir orkuna en Alcoa og Norðurál þannig að það er í áttina að sanngjörnu verði, en nú kemur forstjórinn í Straumvík fram og lýsir því þannig, að álverið sé á heljarþröm vegna þess hvað Íslendingar séu frekir í viðskiptum með orku og vinnuafl. 

Slæm staða í Straumsvík

Athugasemdir

[Snorri Hansson, 8.8.2015 kl. 11:40]

Þú fylgist illa með Ómar.  Eftir hrunið 2008 hafa verið fréttir og greinar líklega í þúsunda tali um erfiðleika í áliðnaði og öðrum málmiðnaði í heiminum. Ekki síst vegna þess að Kína margfaldaði sína framleiðslu og eru ríflega sjálfum sér nógir af áli. Það munar um minna.

Það að Alkoa borgar ekki tekjuskatt er auðvitað stóralvarlegt mál . Að samningur sé með slíkum veikleika sýnir að við verðum  að nota heimsins bestu sérfræðinga í samningatækni, rétt eins og þeir, til þess að útiloka smugur í svona stórum langtíma samningum.

[Þorsteinn Briem, 8.8.2015 kl. 13:47]

Í gær:

"Rannveig Rist forstjóri Rio Tinto Alcan sendi starfsmönnum bréf í dag þar sem hún útskýrir afstöðu fyrirtækisins."

"Rannveig segir í bréfinu að ... fyrirtækið hafi tapað samtals sjö milljörðum árin 2012 og 2013 og að hagnaður fyrirtækisins aðeins verið 0,3% arðsemi eigin fjár."

"En þrátt fyrir að ... staða á mörkuðum sé slæm erum við enn til viðræðu um áþekkar launahækkanir og aðrir á Íslandi hafa samið um að undanförnu. Þetta teljum við að sé vel boðið.""

[Kristbjörn Árnason, 8.8.2015 kl. 14:48]

"Rannveig segir í bréfinu að ... fyrirtækið hafi tapað samtals sjö milljörðum árin 2012 og 2013 og að hagnaður fyrirtækisins aðeins verið 0,3% arðsemi eigin fjár."

Þetta er mjög athyglisverð setning.  Þetta segir að það sé ekki raunverulegt tap, heldur miklu fremur að fjarfestingin skili RÍÓ TINTÓ minni ávöxtun en þeir hafðu reiknað með.

Í þessu sambandi er vert að velta því fyrir sér hversu mikil ávöxtun er af Kárahnjúkavirkjun. Ég er alveg viss um, að það er miklu minni ávöxtun

[Ómar Bjarki Kristjánsson, 8.8.2015 kl. 15:37]

Það er ekki ofmælt að margt skrítilegt er að koma upp þessi misserin með álverin og stóriðjuna hérna.

Skrítilegt í þeirri merkingu að allt er það þvert á fullyrðingar og gífuryrði áróðursmanna stóriðju og alþjóðlegra stóriðjufyrirtækja ásamt framsjöllum.

[Ómar Ragnarsson, 8.8.2015 kl. 22:05]

Ég er aðeins að vitna í fullyrðingar talsmanna álveranna um glæsilegt umhverfi álvera heimsins og gott ástand á á heimsmarkaði. 

Ég hef einmitt "fylgst vel með" í meira en áratug, og greindi meðal annars frá spám um áhrif gerða Kínverja sem hafa komið fram síðustu ár og af þessum sökum hef ég furðað mig á glansmyndunum, sem áltrúarmennirnir hafa dregið upp. 

[Hábeinn (IP-tala skráð) 9.8.2015 kl. 13:33]

Það vekur athygli hversu oft Ómar vitnar í fullyrðingar sem hvergi er að finna nema hjá honum sjálfum en hann eignar öðrum. Þanng virðast þeir sem hann er andsnúinn stöðugt koma með hinar fáránlegustu yfirlýsingar og fullyrðingar. Þetta er þekkt áróðursbragð hinna rökþrota, eigna andstæðingunum heimskulegar fullyrðingar þegar ekki er hægt að rökstyðja sitt mál.