"Bjart framundan og væntanleg uppsveifla í áliðnaðinum"?

Það hefur ekki vantað hástemmd lýsingarorð hjá talsmönnum álveranna undanfarnar vikur um það hve bjart væri framundan og komandi uppsveifla í áliðnaðinum. 

Þeir hafa líka andmælt harðlega öllum efasemdum um dýrð áltrúarinnar. 

Og seinast í dag vantar heldur ekki að álver við Skagaströnd sé frábær kostur og bjart framundan í því máli að sögn forsvarsmönnum þar á bæ.

Talsmaður Norðuráls segir að litilfjörlegt atriði þurfi að leysa til þess að álver í Helguvík geti farið á fullan skrið. 

 

Áltrúarmennirnir andmæltu líka ákaft þeirri spá fyrir áratug að stórfjölgun álvera í Kína myndi fella heimsmarkaðsverðið.

En það er einmitt það sem gerst hefur og engin teikn um að álverðið, sem er í sögulegu lágmarki og talsvert lægra en miðað var við í arðsemisútreikningum Kárahnjúkavirkjunar, muni hækka í fyrirsjáanlegri framtíð.

Stöðugt hefur verið talað um aukna notkun áls í bifreiðum. En um leið og hagkerfi staðna stöðvast sú þróun líka, enda hefur hún verið mest í framleiðslu dýrra bíla, af því að þrátt fyrir lágt verð á áli, er það miklu dýrari málmur en stál og hefur auk þess eignast skæðan keppinaut í koltrefjaefnum. 

Ákvörðun stjórnar starfsmannafélagsins í Straumsvík um að aflýsa verkfalli er því skynsamleg í ljósi ástandsins, sem blasir við þrátt fyrir að reynt sé að leyna því. 

 

 

Ræða aftur saman á föstudaginn

Athugasemdir

[Þorsteinn Briem, 12.8.2015 kl. 19:51]

Síðastliðinn föstudag:

"Rannveig Rist forstjóri Rio Tinto Alcan sendi starfsmönnum bréf í dag þar sem hún útskýrir afstöðu fyrirtækisins."

"Rannveig segir í bréfinu að ... fyrirtækið hafi tapað samtals sjö milljörðum árin 2012 og 2013 og að hagnaður fyrirtækisins aðeins verið 0,3% arðsemi eigin fjár."

"En þrátt fyrir að ... staða á mörkuðum sé slæm erum við enn til viðræðu um áþekkar launahækkanir og aðrir á Íslandi hafa samið um að undanförnu. Þetta teljum við að sé vel boðið.""

[Þorsteinn Briem, 12.8.2015 kl. 20:25]

Vændi at­vinnu­tæki­færi fyr­ir kon­ur á Skagaströnd - Hannes Hólmsteinn Gissurarson

[Hábeinn (IP-tala skráð) 12.8.2015 kl. 21:15]

"Það hefur ekki vantað hástemmd lýsingarorð hjá talsmönnum álveranna undanfarnar vikur um það hve bjart væri framundan og komandi uppsveifla í áliðnaðinum." Og hverjir eru þessir talsmenn álveranna? Hvar hafa þessi hástemmdu lýsingarorð fallið? Það er von að maður spyrji þegar fullyrðingar þínar um yfirlýsingar manna er oft erfitt að finna annarstaðar en hjá þér. Tilvitnanir þínar virðast æði oft vera hreinn tilbúningur. Hverjir eru þessir talsmenn álveranna og hvar hafa þessi hástemmdu lýsingarorð fallið?

[Ómar Ragnarsson, 12.8.2015 kl. 23:49]

Tveir þeirra eru nafngreindir í nýjasta orkupistli Ketils Sigurjónssonar og fullyrðingar þeirra teknar í nefið. 

Sama gerði Ketill í orkupistli sínum þar á undan varðandi samanburð á orkuverði til álvera hér á landi og í öðrum löndum og heimsálfum. 

Talsmenn álvera svo sem Halldór Blöndal hafa líka skrifað blaðagreinar til að mæra áliðnaðinn ef það skyldi hafa farið fram hjá þér. 

Þú ert býsna iðinn við væna mig um lygar ("hreinn tilbúningur") og fráfræði, Hábeinn, en ættir kannski að líta í eigin barm. 

[Anna Sigríður Guðmundsdóttir, 13.8.2015 kl. 00:32]

Það eina góða er þekking og það eina vonda er fáfræði. Sókrates.

M.b.kv.

[Kristján P. Gudmundsson, 13.8.2015 kl. 01:50]

Gott blogg Ómar Ragnarsson !

Kveðja,

Kristján Pétur guðmundsson

[Hábeinn (IP-tala skráð) 13.8.2015 kl. 02:20]

Þú getur semsagt ekki sagt hverjir þessir talsmenn álveranna eru og hvareða hvenær þessi hástemmdu lýsingarorð hafa fallið undanfarnar vikur. En heldur að þú hafir lesið það einhverstaðar einhverntíman, séð einhver nöfn og flokkar alla sem ekki eru þér og Katli sammála sem "talsmenn álveranna". Hjá hvaða álveri starfar Halldór Blöndal sem talsmaður og hvað hefur hann sagt síðustu vikurnar? "Það hefur ekki vantað hástemmd lýsingarorð hjá talsmönnum álveranna undanfarnar vikur..." kallast því skáldskapur nema annað verði sannað.

[Helga Kristjánsdóttir, 13.8.2015 kl. 07:34]

 Góður Hábeinn.

[Ómar Ragnarsson, 13.8.2015 kl. 08:24]

Jæja. Þið viljið ekki fara inn á orkublogg Ketils Sigurjónssonar heldur haldið áfram að væna mig um stórfelldar og ítrekaðar lygar. 

Nöfnin, sem þið viljið ekki viðurkenna að séu til, eru Pétur Blöndal framkvæmdastjóri Samáls, Samtaka fyrirtækja í áliðnaði, og sem dæmi um skrif hans er grein eftir hann 10. júní síðastliðinn, sem voru hluti af ritdeilu hans við Ketil sem þið viljið ekki viðurkenna að hafa farið fram. 

Ágúst Hafberg hefur tekið þátt í þessari ritdeilu, en hann er framkvæmdastjóri viðskipta og samskipta hjá Norðuráli. 

Þið eigið bágt, sem stundið svona skrif um "skáldskap" minn og uppdiktaða menn og ummæli þeirra. 

Ég hef hvorki tíma né nennu til þess að vitna í gögn sem þið viljið ekki viðurkenna að séu til. 

[Hábeinn (IP-tala skráð) 13.8.2015 kl. 10:22]

Ég viðurkenni fúslega og hef aldrei neitað að til sé orkublogg, gögn og ýmsar greinar í blöðum og á netinu. En það var ekki ég sem þóttist vera með tilvitnanirnar á hreinu og geta vitnað í þær.

"Talsmenn álvera svo sem Halldór Blöndal hafa líka skrifað.." Hjá hvaða álveri starfar Halldór Blöndal sem talsmaður og hvað hefur hann sagt síðustu vikurnar?

"Það hefur ekki vantað hástemmd lýsingarorð hjá talsmönnum álveranna undanfarnar vikur um það hve bjart væri framundan og komandi uppsveifla í áliðnaðinum.    Þeir hafa líka andmælt harðlega öllum efasemdum um dýrð áltrúarinnar."  Fullyrðingar þínar um yfirlýsingar manna er oft erfitt að finna annarstaðar en hjá þér. Tilvitnanir þínar virðast æði oft vera hreinn tilbúningur. Og getir þú ekki komið með tilvitnanirnar orðrétt þá er lítið að marka það sem þú segir.

[Þorsteinn Briem, 13.8.2015 kl. 16:32]

13.6.2015:

Engin orka til álvers á næstu árum segir Jón Gunnarsson formaður atvinnuveganefndar Alþingis